مەلا یادگار سەید عەلی عەبدولواحید پێشنوێژ و وتاربێژی مزگەوتی شێخ تەیب لە سلێمانی بۆ گوڵان:بۆ ئەوەی بگەینە كەناری ئارامی پێویستە هەموومان هاوكاریی سەرۆكی هەرێمی كوردستان بكەین

بارودۆخی ئێستای كوردستان پێویستی بە هێوركردنەوە هەیە، بەڵام هێوركردنەوە لەسەر بنەمای وەلانانی رق و كینە و كردنەوەی دەرگای خۆشەویستی و پێكەوەكاركردن، لەبەر ئەوەی لەم قۆناخە هەستیار و ناسكەی كوردستانی پێدا تێدەپەڕێت، بێجگە لە یەكڕیزی و یەكتری قبووڵكردن، رێگەیەكی دیكە نییە پەنای بۆ بەرین. ئێستا كوردستان بەرامبەر دوژمنێكی دەرەكی و دڕندە بۆتەوە كە ئەویش تیرۆریستانی داعشە و درێژی ئەم بەرەیەی شەڕیش زیاتر لە 1000 كیلۆمەترە، بۆیە ئەگەر ئامانجی هەموومان و هەموو حزبە سیاسییەكان لەم قۆناخەدا تێكشكانی تیرۆریستان و سەركەوتنی پێشمەرگە لەم شەڕە نەبێت، ئەوا ئەو دەرفەتەی بۆمان هاتۆتە پێشەوە لە دەستمان دەچێت. لەم بوارەدا مامۆستایانی ئایینی ئەو توێژە دیارە كۆمەڵگەن كە رۆڵێكی كاریگەریان هەیە بۆ قسەكردن لەسەر ئەم لایەنە هەستیارە كە ئەركی سەرشانی هەر هاووڵاتیەكی كوردستانە. بۆ زیاتر تاوتوێكردن و قسەكردن لەسەر ئەو بابەتەش، ئەم دیمانەیەمان لەگەڵ مامۆستا یادگار سەید عەلی عەبدولواحید پێشنوێژ و وتاربێژی مزگەوتی شێخ تەیب لە سلێمانی سازكرد و بەمجۆرە بۆ گوڵان هاتەئاخاوتن.



* مامۆستایانی ئایینی توێژێكی دیار و كاریگەری ناو كۆمەڵگەی كوردستانن و هەموو كات لەسەر بارودۆخی سیاسی كوردستان قسەی خۆیان هەبووە، بۆیە پرسیارەكەمان لەو خاڵەوە دەست پێدەكەین ئایا ئێوە چۆن سەیری بارودۆخی ئێستای كوردستان دەكەن و چی بكرێت بۆ ئەوەی ئەم ئاژاوەو ناسەقامگیرییە كۆتایی بێت؟
- بە ناوی خوای بەخشەندە و میهرەبان. من ئەم بارودۆخەی كوردستان وەك برینێك دەبینم كە لە ئێستادا هەوكردنێكی زۆری كردووە، بۆیە ئەگەر بمانەوێت ئەم برینە چارەسەر بكەین، ئەوا دەبێت هەوڵبدەین سەرەتا ئەو هەوكردنە نەمێنێت، ئەوجا باس لە چارەسەركردنی بكرێت. بۆیە پێویستە لە ئێستادا هەوڵەكان بۆ ئەوەبن بارگرژی و هەڵچوونەكان خاو بكرێنەوە بۆ ئەوەی ژینگەیەك بێتەئاراوە كە بتوانین تێیدا باس لە كێشەكان بكرێت و رێز لە را و هەوڵەكانی بەرامبەر بگیرێت، هەروەها پێویستە سوود لە شێوازی حوكمڕانیی دەوڵەتانی دیكەی جیهان وەربگرین، كە نزیكترینیان توركیایە. لە توركیا حزبی عەلمانی و ئیسلامی و نەتەوەپەرست بوونیان هەیە، هەمووشیان رێز لە یەكتری دەگرن و بەشداری لە هەڵبژاردن دەكەن و رێزی ئاكامی هەڵبژاردنەكانیش دەگرن، سەرەنجام هەموو ئەمانە خزمەت بە تاك بەتاكی كۆمەڵگەی توركیا دەكەن، حزبەكانی ئێمەش دەبێت بە هەمان شێوە رەفتار بكەن. واتە شێوازی بیركردنەوەی سیاسییان هەرچۆنێك بێت و چەند لە یەكتری جیاواز بن، دەبێت رێزی یەكتری بگرن. ئەوەی لای من سەیرە ئەوەیە بۆچی حزبەكانی كوردستان ناتوانن خۆیان كێشەكانی خۆیان چارەسەر بكەن؟ بۆچی دەبێت هەموو كات لایەنێكی دەرەكی، یان دەوڵەتێكی دەرەكی بێنە نێوانیان بۆ ئەوەی كێشەكانیان بۆ چارەسەر بكات و سەرەنجامیش كۆمەڵێك مەرجی خۆی بەسەریاندا فەرز بكات؟ بۆیە ئێستا كاتی ئەوەیە بارودۆخەكە هێور بكرێتەوە بۆ ئەوەی ژینگەیەك دروست بێت، حزبەكان بتوانن دانوستاندن بكەن و سازش بۆ یەكتری بكەن. حزبە سیاسییەكانی كوردستان لە ئێستادا گرنگە خۆیان رووبەڕووی ئەو پرسیارە بكەنەوە، بۆچی سەد ساڵە خەبات دەكەین و خوێن دەبەخشین، كەچی هەتا ئێستا نە خاوەنی ئاڵای خۆمانین، نە خاوەنی دەوڵەتی سەربەخۆی خۆمانین؟ من پێموایە هەموو نەتەوەیەك دوو دوژمنی سەرەكی هەیە، دوژمنێكیان دەرەكییە، ئەوی دیكەیان دوژمنی ناوخۆییە و پێوەندی بە نەفسی خۆمانەوە هەیە. دوژمنی یەكەمیان زۆر ترسناك نییە، ئەگەر كێشەی ناوخۆیی نەبێت، بەڵام دووەمیان كە دوژمنی ناوخۆییە زۆر بەهێزە و دەبێت زاڵ بین بەسەریدا، سەبارەت بەم لایەنە پەروەردگار دەفەرمووێت: «قُلْ أَعُوذُ بِرَبِّ النَّاسِ. مَلِكِ النَّاسِ. إِلَهِ النَّاسِ. مِن شَرِّ الْوَسْوَاسِ الْخَنَّاسِ. الَّذِي يُوَسْوِسُ فِي صُدُورِ النَّاسِ.» سەیر بكەن بۆ ئەم دوژمنە ناوخۆییە چەندجار پەنا بۆ پەروەردگار دەبات، بەڵام بۆ دوژمنی دەرەكی پەروەردگار دەفەرموێت: «قُلْ أَعُوذُ بِرَبِّ الْفَلَقِ (١) مِنْ شَرِّ مَا خَلَقَ (٢) وَمِنْ شَرِّ غَاسِقٍ إِذَا وَقَبَ (٣) وَمِنْ شَرِّ النَّفَّاثَاتِ فِي الْعُقَدِ (٤) وَمِنْ شَرِّ حَاسِدٍ إِذَا حَسَدَ». سەیر بكەن لە میاندا یەكجار پەنا بۆ پەروەردگار براوە. بۆیە من دەڵێم لە كوردستاندا هیچ لایەك دوژمن نییە، هەموومان برای یەكین و ئەگەر لایەنێك بدۆڕێت، هەموومان دەدۆڕێین و ئەگەر لایەنێك بیباتەوە، هەموومان براوە دەبین.
* ئەگەر لێرەوە باسی رێكخراوی تیرۆریستانی داعش بكەین، كە ئێستا دوژمنە دەرەكییە گەورەكەیە، ئایا چۆن سەیری ئەم دوژمنە ترسناكە دەكەیت، بەتایبەتی كە هەڕەشەیەكی گەورەی لەسەر كوردستان دروستكردووە؟
- وەك پێشتر ئاماژەم پێكرد، تیرۆریستانی داعش دوژمنی دەرەكین، ئەگەر كێشەی ناوخۆییمان نەبێت، دوژمنی دەرەكی زۆر ترسناك نییە، من هیچ كاتێك دوژمنی دەرەكیم بە مەترسیی گەورە نەزانیوە، تەنانەت رژێمی سەدام حوسێن كە ئەنفال و كیمیابارانی كردین، ئەمەش لەبەر ئەوەیە دوژمنی دەرەكی تەنانەت ئەگەر خاكیشمان داگیربكات، ئەگەر ئێستا نەتوانین لێی بسەنینەوە، ئەوا نەوەكانی ئایندە هەر ئازادی دەكەن و لێی دەسەننەوە، بۆیە ئەگەر خۆمان یەكهەڵوێست و یەكڕیز بین و خۆمان لە ناوخۆمان یەكتری قبووڵ بكەین و كێشەكانی خۆمان چارەسەر بكەین، داعش چەند بەهێز بێت، ئەوا لە بەردەم ئیرادەی ئەم میللەتە ناتوانێت خۆی رابگرێت، بۆیە ئێستا شەڕی تیرۆیستانی داعش دووبەرەیە، بەرەیەكیان بەرەی سەربازییە و لەم بەرەیەدا پێشمەرگە قارەمانەكانی كوردستان بە درێژایی زیاتر لە 1000 كیلۆمەتر شەڕی داعش دەكەن و خوای پەروەردگار هیدایەتی داون و سەركەوتنی گەورەیان بەسەر ئەو تیرۆریستانەدا بەدەستهێناوە، لەم بەرەیەدا ئەوان بە چەك و ئاگر هێرشمان دەكەنە سەر و پێشمەرگەش بە چەك و ئاگر تێكیان دەشكێنێت، بەڵام بەرەی دووەم، بەرەی شەڕی فیكرییە لەگەڵ تیرۆریستانی داعش، لەم بەرەیە دەبێت زیاتر مامۆستایانی ئایینی پێشەنگ بن و رووبەڕووی ببنەوە، سوپاس بۆ خوا مامۆستایانی ئایینی ئیسلامی كوردستان لەم بوارەدا رۆڵێكی هێجگار باشیان گێڕاوە. بەڕێز مامۆستا عەلی قەرەداخی پێشنیارێكی كردبوو، كە ژمارەیەك لە سەركردەكانی داعش بێن لەگەڵ كۆمەڵێك زانای ئیسلامی دابنیشن بۆ ئەوەی پێیان بڵێن كە ئەوان هەڵەن و ئەوەی دەیكەن پێوەندی بە ئیسلامەوە نییە، بەڵام داعشەكان بەدەنگ ئەم داوایەوە نەهاتن، ئەم نموونەیە نیشانەی ئەوەیە كە زۆر گرنگە لە رووی فیكرییەوە تیرۆریستانی داعش تێكبشكێندرێن.
* ئەم لایەنەی كە پێی دەڵێن شەڕی فیكری دژی تیرۆریستانی داعش، ئایا پێویست نەبوو وەزارەتی ئەوقافی حكومەتی هەرێمی كوردستان رۆڵێكی گەورە و بەرچاوی تێدا بگێڕێت؟ لەم رووە پێتوانییە وەزارەتی ئەوقاف كەمتەرخەم بووە؟
- من قسە لەسەر كەموكورتیی وەزارەتی ئەوقاف لە كابینەیەكی دیاریكراودا ناكەم، بەڵكو پێموایە لە هەموو كابینەكانی حكومەتی هەرێمی كوردستاندا، وەزارەتی ئەوقاف كەموكورتی هەبووەو لە ئاستی پێویستدا نەبووە، دەبوو زیاتر بایەخ بە مامۆستایانی ئایینی بدرایە، لەبەر ئەوەی مامۆستایانی ئایینی بەردەوام لەناو خەڵكدان و رۆژانە چەندین جار پێشنوێژیی دەكەن و رۆژانی هەینی گوتار دەدەن، لەم لایەنەوە وەك پێویست بایەخیان پێنەدراوە، لایەنیكی دیكە كە دەمەوێت ئاماژەی پێبكەم، ئەوەیە هەموو دەوڵەتانی داگیركاری كوردستان هەوڵیانداوە سوود لە ئایین وەربگرن بۆ سەركوتكردن و چەوسانەوەی نەتەوەی كورد، بەڵام كورد خۆی سوودی لەم ئایینە پیرۆزە وەرنەگرتووە بۆ بەرەوپێشەوە بردنی دۆزە رەواكەی، بۆیە گرنگ بوو لە زانایانی ئایینی ئیسلامی كوردستان لیژنەیەك دروست بكرێت، بۆ ئەوەی سەردانی وڵاتانی عەرەبی و ئیسلامی بكەن و رەوایەتیی كێشەی كورد بۆ ئەوان روون بكەنەوە، هەروەها لەمەش زیاتر لەسەر ئاستی ناوخۆ دیسان مەلا و پیاوانی ئایینی كاریگەری زۆریان بۆ جێبەجێكردنی یاسا و بڕیارەكانی حكومەتی هەرێمی كوردستان هەیە، بۆیە گرنگە حكومەتی هەرێمی كوردستان لە رێگەی وەزارەتی ئەوقافەوە هەوڵ بدات مەلا و پیاوانی ئایینی لەخۆی دانەبڕێت، لەبەر ئەوەی مەلا و پیاوانی ئایینی هاوكارێكی باشی حكومەتی خۆیان دەبن و دەبنە هۆكارێك بۆ ئەوەی یاسا و بڕیارەكانی حكومەت باشتر لەناو خەڵكدا جێبەجێ بكرێت.
* لە كوردستاندا چەندین حزبی ئیسلامی بوونیان هەیە، ئایا تاچەند لەگەڵ ئەوەی كە بەناوی ئایینەوە سیاسەت بكرێت؟
- لای من هەموو حزبە سیاسییەكانی كوردستان وەك یەكن و كە دوعاش دەكەم، دوعای خێر بۆ هەموویان دەكەم، ئەوجا سەبارەت بە حزبە ئیسلامییەكانی كوردستان، كە من خۆم لەگەڵ هەموویان دانیشتووم و لە نزیكەوە دەیاناسم، ئەوان ناڵێن ئێمە بە ئایینی ئیسلام سیاسەت دەكەین، بەڵكو ئەوانیش وەك هەر حزبێكی سیاسیی دیكە سیاسەت دەكەن و بەشداری هەڵبژاردن دەكەن و دەچنە پەرلەمان، بەڵام ئایدیایەكی ئیسلامییان هەیە، ئەمەیان جیاوازە لەوەی كە ئایین بەكاربهێندرێت بۆ سیاسەت، یان بۆ بەرژەوەندیی حزبێك. ئەگەر ئەمە كرا، منیش ئەمەم پێ هەڵەیە، بەڵام حزبێكی سیاسی بە ئایدیایەكی ئیسلامی سیاسەتی خۆی دەكات، ئەمە كێشە نییە، ئەوەی گرنگە ئەوەیە حزب كادری باش بۆ خزمەتی ئەو میللەتە پەروەردە بكات، ئەوجا ئەو حزبە ئیسلامییە، یان شیوعییە، یان نەتەوەیی ئەوە كێشە نییە، گرنگ ئەوەیە خەڵكانی گونجاو لە شوێنی گونجاو دابنرێن بۆ ئەوەی میللەتەكەمان سوودیان لێوەربگرێت. ئەوەی من تێبینم كردووە، لە ناو هەموو حزبە سیاسییەكانی كوردستاندا خەڵكی زۆر باش و دەست پاك و نیشتمانپەروەر بوونی هەیە، لەبەرامبەریشدا لەناو هەموویاندا خەڵكانی گەندەڵ و نابەرپرسیاریش بوونی هەیە، بۆیە لێرەدا كێشەكە ئەوە نییە حزبەكە بە چ ئایدیایەك سیاسەت دەكات، كێشەكە ئەوەیە چۆن خەڵكی گەندەڵ و نابەرپرسیار دوور دەخرێتەوە.
* ئەگەر بگەرێنەوە بۆ مێژووی كوردەواری خۆمان هەست دەكەین، هەموو كات ئاینیی ئیسلام سەرچاوەی لێبوردەیی و پێكەوەژیان بووە، مزگەوت و حوجرەكان قوتابخانەی پەروەردەكردنی سەركردەكانمان بوون. ئێمە كە خاوەنی ئەم مێژووەین بۆچی ناتوانین فیكری داعش بنبڕ بكەین؟
- جوگرافیای كوردستان بەو جۆرەیە بە زۆر لكێنراوین بە عێراقەوە، بۆیە داعشەكانیش وەك هەر داگیركارێكی دیكە چاویان لەوەیە داگیری بكەن، دوای ئەوەش یەكێك لەو هۆكارانەی كە بۆتە هۆكاری ئەوەی بوونی داعش درێژە بكێشێت، ئەوەیە ئەم تیرۆریستانە گەڕانەتەوە شوێنی خۆیان، واتە شام، پێشتر خەڵك لە سعودیە و عێراق و سووریاوە دەچووە ئەفغانستان بۆ ئەوەی هاوكاری رێكخراوی تاڵیبان و قاعیدە بكەن، بەڵام ئێستا لە شوێنی خۆیانن، ئەو تیرۆریستانە بە ناهەق پەلاماری كوردستانیان داوە، بەڵام ئەم پەلاماردانەیان بە شێوەیەكی ئیجابی بۆ كوردستان شكاوەتەوە، من بەو جۆرە سەیری ئەم بارودۆخە دەكەم، ئەگەر لە ناوخۆمان یەكگرتوو بین و كێشە لاوەكی و ناوخۆییەكانمان چارەسەر بكەین، ئەوا ساڵی 2017 تێناپەڕێت دەبینە خاوەنی دەوڵەتی خۆمان و ئاڵای كوردستانی سەربەخۆ دەشەكێتەوە.
* ئێستا ئێمە بەرەیەكی شەڕمان لەگەڵ ئەم تیرۆریستانە هەیە كە زیاتر لە 1000 كیلۆمەترە، لەوەتەی ئەم شەڕە دەستی پێكردووە، سەرۆكی هەرێمی كوردستان راستەوخۆ لە بەرەكانی شەڕ ئامادە بووە. ئایا تاچەند ئامادەبوونی سەرۆكی هەرێمی كوردستان لەناو بەرەكانی شەڕدا كاریگەری لەسەر مۆڕاڵی پێشمەرگە هەبووە؟
- بەشداریكردنی سەرۆكی هەرێمی كوردستان و فەرماندەی حزبە سیاسییەكانی دیكەش لەم شەڕەی داعشدا، بووە هۆكاری ئەوەی ئاراستەی شەڕەكە بگۆڕێت و پێشمەرگە زیاتر بجەنگێت و سەركەوتن تۆمار بكات، ئەوەی لەم شەڕە جێگەی هەڵوەستەكردنە، ئەوەیە كە ژمارەیەكی زۆری فەرماندەكانمان شەهید بوون، ئەمەش مانای ئەوەیە لە شەڕی دژی تیرۆریستانی داعش فەرماندەكان لە پێش پێشمەرگەوەن، لایەنێكی دیكە كە لەم شەڕەدا بەرجەستە بووە، ئەوەیە كە فەرماندەكان هەر هەموویان بە پێشمەرگە دەڵێن وادەڕۆم، ئێوەش دوام كەون، ئەمەشیان كاریگەریی گەورەی كردۆتە سەر مۆرالی پێشمەرگە و بۆتە هۆكاری ئەوەی خوا پشتیوانیان بێت و ئەو سەركەوتنە گەورانە تۆمار بكەن. راستییەكەش هەروایە كاتێك پێشمەرگە دەبینێ فەرماندەكەی پێشی دەكەوێت، ئەوا ئەویش بە هەموو توانای خۆی شەڕدەكات و دوژمن دەشكێنێت، بۆیە جێگەی سەربەرزییە هەر لە سەرۆكی هەرێمی كوردستانەوە تادەگاتە تەواوی فەرماندە سەربازییەكانی پێشمەرگە، هاوشانی پێشمەرگە لە بەرەكانی شەڕدا دەجەنگن.
* ئێستا لە كوردستاندا پرسی هەڵبژاردنی سەرۆكی هەرێمی كوردستان پرسێكی دیكەیە لەو پرسانەی كە حزبەكان لەسەری ناكۆكن. لەم بوارەدا دوو بۆچوون هەیە، لایەك پێی باشە سەرۆكی هەرێم لەناو پەرلەمان هەڵبژێردرێت، لایەكیش داوادەكات راستەوخۆ لەلایەن خەڵكەوە هەڵبژێردرێت، وەك مامۆستایەكی ئایینی لەسەر ئەم پرسە رات چییە؟
- بە هەر شێوازێك سەرۆكی هەرێمی كوردستان هەڵبژێردرێت لای من قبووڵە، بەڵام ئەوەی گرنگە ئەم حزبانە لە سەر شێوازێك بگەنە رێككەوتن، من وای دەبینم ئەو كێشەیە ئەوەندە قورس نییە رێككەوتنی لەسەر نەكرێت. ئەوەی گرنگە ئەوەیە كە پێویستە چەند خاڵێك ڕەچاو بكرێت، یەكەمیان ئەوەیە یاسا سەروەر بێت، دووەمیان ئەوەیە پێویستە سەرۆك دەسەڵاتی هەبێت و بەرامبەر دەسەڵاتەكانی بەرپرسیار بێت، ئەمەش لەبەر ئەوەیە ئەگەر سەرۆك دەسەڵاتی نەبێت، ناتوانێت كارەكانی سەرشانی راپەڕێنێت، بۆیە گرنگە دەسەڵاتی زۆری هەبێت و بە یاساش لە بەرامبەر ئەم دەسەڵاتانەی بەرپرسیار بێت. ئێستا بارودۆخی كوردستان بارودۆخێكی هەستیار و مەترسیدارە، وەك كەشتییەك وایە لەناو ئاگر مەلە دەكات نەك ئاو، بۆیە ئێمە پێویستمان بە سەرۆكێكە كە بەهێز بێت و بتوانێت كابتنێكی باشی ئەم كەشتییە بێت بۆ ئەوەی ئەم كەشتییە بگەیەنێتە كەناری ئارام، ئەم كەشتییە چارەنووسی هەموومانە، ئەمە بەو شێوەیە نییە ئەگەر خوانەخواستە ئەم كەشتییە كون بوو، لایەك زەرەر دەكات و لایەك قازانج، نەخێر، ئەگەر خوانەخواستە ئەو كەشتییە كون بێت، هەموومان زەرەر دەكەین. بۆیە گرنگە هەموومان هاوكاری سەرۆكی هەرێمی كوردستان بكەین، ئەویش پێویستە چاوی لە هەموو گەلەكەی خۆی بێت.
* ئەی سەبارەت بەو هەموو قەیرانەی كە ئێستا رووبەڕووی كوردستان بۆتەوە، ئایا ئەمە باری كەشتییەكەی قورستر نەكردووە؟
- وێڕای شەڕی داعش و گەمارۆی ئابووریی بەغدا كە ماوەی 17-18 مانگە بودجە و مووچەی كوردستانی بڕیووە، دەوڵەتێكی وەك ئەڵمانیا كە یەكێكە لە دەوڵەتە گەورە و دەوڵەمەندەكانی جیهان، وێرای ئەو هەموو بانگەشەی كە گوایە پەنابەر وەردەگرێت، بە هەموو توانای خۆی توانیویەتی 300-400 هەزار پەنابەر وەربگرێت، بەڵام كوردستان كە ژمارەی دانیشتووانی تەنیا 5-6 ملیۆن كەسە، بۆتە لانەی حەوانەوە بۆ نزیكەی دوو ملیۆن ئاوارەو پەنابەر، ئەمە مانای ئەوەیە هەموو خێزانێكی كوردستان پەنابەرێكی بەردەكەوێت بەخێوی بكات، چونكە ئەم ژمارە زۆرەی ئاوارە پێویستی بەهەموو جۆرە خزمەتگوزارییەكی كارەبا و شارەوانی و تەندروستی و نیشتەجێكردن و خوێندن هەیە، ئەمانەش هەمووی رەنگدانەوەی لەسەر تاك بە تاكی هاووڵاتیانی كوردستان دەبێت، بۆیە لە ئێستادا ئەركی سەرشانی هەموو حزبە سیاسییەكانی كوردستانە كە سیاسەتێكی ئەوتۆ دابڕێژن بۆ ئەوەی بتوانن ئەم بارودۆخە تێپەڕێنین.
* ئەگەر باس لە پەرلەمانی كوردستان بكەین، دیارە لە ئێستادا پەرلەمانی كوردستانیش بە قەیرانیكی سیاسیدا تێدەپەڕێت، شارەزایان وای دەبینین، هۆكاری ئەم قەیرانە سیاسییەی پەرلەمان دەگەڕێتەوە بۆ كەمئەزموونی پەرلەمانتارانی ئەم خولە، ئایا چۆن سەیری ئەم قەیرانە سیاسییە دەكەیت؟
- ئەم قەیرانە سیاسییە بە بێ جیاوازی پێوەندی بە هەموو حزبە سیاسییەكانی كوردستانەوە هەیە، حزبەكانی ئێمە كەموكورتیان ئەوەیە، لەسەر بنەمای ئەوەی كێ دەنگی زۆر دەهێنێت، كاندید بۆ پەرلەمان دیاری دەكەن، نەك لەسەر بنەمای ئەوەی تاچەند ئەو كاندیدە سیاسەتمەدارە و ئەزموونی هەیە، بۆیە ئەگەر سەرنج بدەین لە نێو كاندیدەكانی ئەم خولەی پەرلەماندا خەڵكانێك هەن، هیندەی كۆمەڵایەتین، سیاسیی نین، یان بانگخوازە، یان كەسێكی نووسەر، یان رۆژنامەنووسە، دیارە لە ئیش و كاری پەرلەمانیدا ئەم جۆرە كەسانە وەكو پێویست نین، ئەوەی پێویستە لە ناو پەرلەمان كارەكان هەڵبسووڕێنێت، دەبێت زیاتر كەسانی سیاسی بن و خاوەنی ئەزموونی سیاسی بن، من رێزم بۆ هەموو پەرلەمانتارەكان هەیە و رەخنەیان لێ ناگرم، بەڵام گرنگە ئاماژە بە راستییەكان بكەین، كە لەم خولەی پەرلەماندا هەموو ئەوانەی بوونە ئەندام پەرلەمان، ئەو خەڵكانەن كە كەمترین دەسەڵاتیان لەناو حزبەكانی خۆیان هەیە. بۆیە توانای بڕیاردانیان نەبووە و ئەگەر ویستبێتیان بڕیار بدەن، بۆ لای سەركردایەتی حزبەكانیان گەڕاونەتەوە، ئەمەش وایكردووە پرۆسەی بڕیاروەرگرتن قورس بێت و نەتوانن كێشەكان چارەسەر بكەن.