Li gorî peymana ku 18ê Adara 2016an di navbera Tirkiyê û YE de hatibû îmzekirin, pêwîst bû YE 6 milyar euro alîkarî bide Tirkiyê. YE îro daye xuyakirin ku temamiya wê alîkariyê hatiye dan.

Serokê Delegasyona Tirkiyê ya YE Balyoz Nikolaus Meyer Landrut ragihand ku pakêta alîkariyê ya bi qebareya 6 milyar Euroyan ji bo peaberan û welatê mazûvan bi temamî hatiye pêşkêşkirin.

Landrut dibêje, herdû aliyan jî qonaxeke girîng li pey xwe hiştin û divê êdî bala xwe bidin ser wê yekê ku penaber û civaka xwedî mal jî sûdê ji wan projeyan bibînin.

Delegasyona Tirkiyê û YE di daxuyaniyê de dibêje, 8 peymanên dawî jî hatine îmzekirin û ew jî dabînkirina pêwîstiyên serekî, xizmeta tendurustî, parastin, jêrxane, perwerde, damezirandin û geşeya aborî û civakî lixwe digre û qebareya wê 780 milyon Euro ne.

Peymana li ser penaberan dibêje, divê Tirkiyê wan penaberên ku derbasî giravên Yûnanê bûne paşde vegerîne û qebûl bike, tedbîrên pêwîst wergire ku berê xwe nedin Ewrûpayê û li hemberî vê jî wê jî YE barê Tirkiyê di aliyê aborî de sivik bike û 6 milyar euro alîkarî bide.

Lê ew 6 milyar euro, nakevin destê hikûmetê, wê yekser ji bo projeyan bêne terxankirin.

Rudaw