Li Diyarbekirê êdî ji bo hemû rewşên lezgîn welatî dê bikaribin tenê li jimareya 112an bigerin û bi Kurmancî û Zazakî û Tirkî daxwazên xwe bînin zimên.

Ji aliyê Parêzgeriya Diyarbekirê hat ragihandin ku, ji bo çareserkirina pirsgirêkên welatiyan û rewşên lezgîn wan hemû hejmarên hawarçûn û arîkariyê di bin banê yek jimareyê de kom kirine.

Ji niha û pê de welatî dê tenê li jimareya 112 bigerin û bikaribin ji bo rewşên lezgîn xizmetê werbigirin. Li gorî rewşê, karmendên li navenda rewşên lezgîn dê daxwaza welatiyan beralî bike û tîmên hawarçûn û arîkariyê rêke cihê bûyerê. Welatî dê bikaribin daxwazên xwe bi Kurmancî û Zazakî û Tirkî jî bînin zimên. Heta niha her saziyekê jimareyên wan ên cuda hebûn ango jimareya polîs û cenderme û agirkuj û ambulans û daristan û hwd hebûn. Ji 81 bajarên Bakur û Tirkiyeyê niha li 47 bajaran êdî hemû jimareyên hawarçûn û arîkariyê di bin banekê de hatine komkirin.

Parêzgerê Diyarbekirê Munîr Kararoglu li ser vê pergala nû got: “Ev pergaleke hemdem e. Ji bo bajarê me li ser xêrê be. Diyarbekir bajarekî pirziman e. Dê welatî ne tenê bi Tirkî lê dê bi Kurmancî û Zazakî jî bikaribin daxwazên bînin zimên.”

K24