Ciwanekî Kurd ê ji Rojavayê Kurdistanê li Holendayê bûye lîstikvanekî navdar ê futbolê ye.

Ciwanê Kurd Ehmed Nebî ji bajarê Kobaniyê yê Rojavayê Kurdistanê li Holendayê lîstikvanekî navdar ê futbolê ye.

Ehmed Nebî 19 salî ye û 2 sal in li Holendayê dijî.

Sala 2020an dema ku Ehmed Nebî 15 salî bû, di raporeke Rûdawê de gotibû, xewna wî ew e ku xwe bigihîne welatekî pêşketî, li wir bibe lîstikvanekî profesyonel û di lîstikên cîhanê de bilîze.

Dema ku Ehmed Nebî gihîşt Holendayê yekser ji wan re got:

“Ez hatime bibim lîstikvanekî serkeftî yê futbolê.”

Niha ew di tîmeke mezin a ciwanên Holendayê de dilîze.

Lîstikvanê futbolê Ehmed Nebî bû mêvanê Bultena Rojava ya ku Dilbixwîn Dara pêşkeş dike.

Lîstikvanê futbolê Ehmed Nebî li ser çîroka xwe ya gihîştina Holendayê got:

“Min xwestibû ku ez li welatekî pêşketî bim û futbolê bilîzim ku ez niha gihîştim Holendayê futbolê dilîzim.

Tîma ku ez tê de dilîzim di asta yekemîn e li Holendayê.”

Ehmed Nebî diyar kir ku ew bi qaçaxî çûye Holendayê û anî ziman:

“8 mehan dirêj kir. Dema ez hatim vir min gelek zehmetî dîtin. Min di miqabeleya xwe de ji wan re got ku xewna min futbol e.

Wan gelekî alîkariya min kir û ez çûm nava tîmekê.

Min di aliyê zimên de gelek zehmetî dîtin ku Îngilîziya min jî nîne û Holendiya min jî ne baş e. Ez spasiya wan dikim.”

Ehmed Nebî li ser planên xwe jî got:

“Ez dixwazim di tîmên baştir de bilîzim. Ez dixwazim di lîga bilind a Holendayê de bilîzim.

Xewna min a mezin jî ew e ku ez di Lîga Şampiyonan a Ewropayê de bilîzim.

Ji bo ku ez bigihêjim xewna xwe, ez roj bi roj perwerde dibim.”

 

Rudaw