Prof. Dr. Şefik Tagay li Almanyayê ev 13 sal in li Zanîngeha Duisburg-Essenê di beşa Psîkotraûmayê de mamostatî dike û herwiha xwediyê gellek lêkolînên psîkolojiyê ye. Ew di kovara Focusê de di beşa tendirustiyê de di nava bijîşk û pisporên herî serkeftî yên Almanyayê de hat nîşandan. Tagay ragihand ew pirr kêfxweş e û got, “Ev yek encama lêkolîna min a derbarê pirsgirêkên xwarina zêde qelewtiyê ye.ˮ

Li Almanyayê kovara navdar a bi navê Focus du salan carekê bijîşk û pisporên herî serkeftî yên Almanyayê li gorên beşên wan di nava lîsteyekî de diwesîne. Pispor, lêkolînvan, zanist û bijîşkên ku navên wan di nava vê lîsteyê de tê weşandin di nava raya giştî de jî navê wan belav dibe û ev jî sûd dide wan ku baş bên naskirin. Di nava lîsteya pispor û zanistên sala borî de navê Prof. Dr. Şefîk Tagay jî hebû. Tagay ji Rûdawê re destnîşan kir ku ti kes nikare xwe ji bo lîsteya Focusê pêşniyar bike û got, “Ew bi xwe di nexweşxaneyan û zanîngehan de lêkolîn dikin û li gor ked, xebat û lêkolînên cuda zanistên serkeftî hildibijêrin. Lê tenê mercek heye, divê zanist di zanîngehekê de serkêşiya beşek zanistî bike.ˮ Tagay diyar kir ku sedemê hilbijartina wî lêkolînên wî yên zanistî ne û got, “Ev 13 sal in ku ez li Zanîngeha Duisburg-Essenê mamostatî dikim û di bin gellek lêkolînên zanistî de ked û îmzeya min heye. Bi taybetî lêkolîna min a derbarê kêşeyên xwarinê û qelewtiyê bala Focusê kişandiye.ˮ Tagay herwiha di van beşan de lêkolînên zanist kirine: Psîkotraûmatolojî, Kêseyên xwarinê, Psîkoterapî, Zanistiya Qalîteya Jiyanê, Penabertî û Tendirustî, Psîkoonkolojî, Nasnameya Ezdayetî, Penabertî û Tendirustî, Ol û Nexwesî.ˮ Tagay li Zanîngeha Bochumê beşa psîkolojî xwendiye û li Zanîngeha Duisburg-Essenê jî doktoraya xwe di besa tipê de kiriye û postê profesoriyê bidestxistiye.

Rêvebirê GEA ye

Tagay diyar kir ku li Almanyayê bi deh hezaran Kurdên êzdî hene ji Bakurê Kurdistanê, ji Ermenistan û Gurcistanê û ji Başûrê Kurdistanê û got di navbera wan de cudahiyên raman û nêzîkbûnên siyasî û civakî hene. Bi mebesta ku nasnameya Ezdayetî di nava ciwanan de baş bê naskirin di sala 2010ê de çendîn akademîsyenên kurd ên êzdî li hev civiyane û pirsîne ka ew dikarin li dijî asîmilasyonê çi bikin. Tagar derbarê damezirandina Civaka Akademisyenên Êzdî, GEA (Gesellschaft Ezidischer AkademikerInnen) wiha axivî: “Di nava nifşên ciwan ên êzdî de li Almanyayê zêde ola Ezdayetî baş nayê naskirin û gellek ji wan baş bi kurdî jî nizanin. Herwiha hinek êzdiyên me ji ber siyaseta dewletên navçeyê nasnameya xwe ya netewî nadin pêş û xwe Kurd nabînin. Me jî xwest em akademîsyenên kurdên êzdî bînin cem hev û pêşî li ber helandinê bigirin.ˮ Di Mijdara 2012ê de li Bielefeldê bi navê GEA, Civaka Akademisyenên Êzdî hatiye damezirandin û Tagay jî serokatiya wê dike. Nêzîka 50 akademîsyên endamê GAE ne.

Kî ye?
Şefîk Tagay di sala 1972yê de li gundekî Bişêriya Batmanê hatiye dinyayê û di 9 saliya xwe de hatiye Almanyayê. Tagay li Zanîngeha Bochumê beşa psîkolojî xwend û di sala 1999ê de dîplomaya xwe wergirt. Ew 13 sal in di zanîngeha Duisburg-Essenê de lmamostatî dike û di çendîn beşên zanist de êkolînên wî hene. Tagay ji Mijdara 2012ê vir ve serokatiya Civata Akademisyenên Êzdî dike.

Rudaw