كۆنسێرتێكی خێرخوازی بۆ هاوكاری زیانلێكەوتوانی ئاگركەوتنەكەی لۆس ئەنجلس بەڕێوەدەچێت
هەردوو گۆرانیبێژ و ئەستێرەی جیهانی لەیدی گاگا و بێڵی ئایڵش بۆ پاڵپشتی لە قوربانیانی ڕووداوی ئاگركەوتنەوەی لۆس ئەنجلوس كۆنسێرتێكی خێرخوازی بەناونیشانی(FireAid) ساز دەكەن,جیا لە ئەم دوو ناودارە ژمارەیەكی دیكەی هونەرمەند و موسیزیان لە كۆنسێرتەكەدا بەشدارن و بەپێی ئامادەكارییەكان بێت كۆنسێرتێكی بەرفراوان و پڕبینەر دەبێت.
ئەم كۆنسێرتە گۆرانییە لە 30/1/2025 لە ئەنجلۆود لە كالیفۆرنیا دەبێت,ئامانج لە سازدانی ئەم كۆنسێرتە كۆكردنەوەی داهاتە بۆ هاوكاری و پاڵپشتی زیانلێكەوتوانی ڕووداوی ئاگركەوتنەوەكەی لۆس ئەنجلس كە بەهۆیەوە هەزاران خانوو سووتا و خەڵكێكی زۆری ناوچەكە مەترسی كەوتە سەر ژیانیان و ناچار شوێنەكەیان جێهێشت.
كۆنسێرتی(FireAid)ژمارەیكەی دیاری هونەرمەندی تێیدا بەشدارە كە ئەوانیش پێك دێن لە,كاتی پیری و جۆنی میتشێڵ و ستیڤی نیكس و ستینگ و فینییەس و گرین دەی و كوین ستیفانی و جێلی روول و ژمارەیەكی دیكەی گۆرانیبێژ و موسیزیان,هەروەها بڕیارە كۆنسێرتەكە دابەش ببێتە دوو شوێنی جیا لە (kia forum)و(intuit dome) بەڕێوەبچێت,هاوكات كۆنسێرتەكە لە چەند ماڵپەڕ و پێگە دجیتاڵییەكان نمایش دەكرێت هەتا گەر هەوادارانی بەشاربووان نەیانتوانی ئامادەبن ئەوا بە ئۆنڵاین لە دوورترین شوێنەوە دەتوانن بینەری نمایشەكە بن,ئەمەش بۆ ئەوەی كۆنسێرتەكە بینەری زۆری هەبێت و هاوكاری زیاتر كۆبكەنەوە.
شایەنی باسە,,دوایین ئامارەكانی ڕووداوی ئاگركەوتنەكەی لۆس ئەنجلس تاوەكو ئێستا 12 هەزار ماڵ سووتاوەو بە هەزاران كەس ئاوارە بوونە,لەنێو زیانلێكەوتوانی ئەم ڕووداوەدا ژمارەیەك ئەستێرەی دیاری سینەمایی و كەسایەتی بەناوبانگ ماڵەكانیان سووتا كە ئەوانیش پێكدێن لە ئەستێرەی جیهانی (ئەنتۆنیۆ هۆپكنز) كە دوو ڤێلای لەدەستدا و 12 ملیۆن دۆلار زیانی بەركەوت,ئەستێرەی سینەمایی (مێل گیبسن) كۆشكێكی بە بەهای 11,5 ملیۆن دۆلار سووتا,وە (جۆن گودمان) كە نرخی ڤێلاكەی زیاد لە 4 ملیۆن دۆلار بوو,هەروەها كاندی سپێلینگ نرخی كۆشكەكەی 23 ملیۆن دۆلار بوو,هەروەها پاریس هێلتۆن و كۆبی سمولدەرز و مایلز تیلەر و ئاننا فاریس و بێڵی كریستاڵ و ئادەم برودی و ماندی مۆر و ریكی لایك و جۆن سی رایلی و دێنیس كروسبی و دیان وارن .
گوڵان-ئاسۆ كاكەیی
