سەلار زیندین یاریزانی كاراتێ‌ یانەی هەڵەبجە

ئاستی یاری كاراتێ لە ئێستادا زۆر بەرەوپێشچووە
یانەی هەڵەبجە یەكێك لەم یانانەی كە گرنگی زۆر بە بواری وەرزشی دەدەن لە سەر ئاستی كچان ، تیپی كاراتێ‌ كچانی یانەكەكەش یەكێك لە تیپە هەرە بەهێزەكانی سەر ئاستی كوردستان و عێراقە، ساڵانە لەگەڵ كردنەوەی خولە جۆراوجۆرەكان بەردەوام لە كێبڕكێ دابوونە بۆ بەدەستهێنانی ئەنجامی شایستە و كێبڕكێ كردن لەسەر بەدەستهێنانی نازناوەكانی كوردستان و عێراق دەرەوەی عێراقیش، یەكێك لە كچە یاریزانەبەتواناكانی یانەكەش كە خاوەنی چەندین ئەنجامی باشە لەگەڵ یانەی هەڵەبجە سەلار زیندین محەمەد-ە ناوبراو لەدایك بووی ساڵی 2007 و ئێستاش بەردەوامە لە تیپی كاراتێ‌ یانەی هەڵەبجە ، گۆڤاری گوڵان لە نزیكەوە چەند پرسیارێكی ئاراستەكرد، ئەویش وەڵامی پرسیارەكانی گوڵانی دایەوە.
*چۆن بوو هاتیتە نێو جیهانی وەرزشی؟
- بە هۆی ئارەزووی زۆرم بۆ یاری كاراتێ بوو.
*لە نێو ئەم هەموو وەرزشە چۆن بوو یاری كاراتێت هەڵبژارد؟
- هەر لە تەمەنێكی بچووكەوە حەز و ئارەزوویەكی زۆرم بۆ یاری كاراتێ هەبووە.
*هەست ناكەی یارییەكی قورست هەڵبژاردوە؟
- هەموو یارییەك بە پێی پێویست قورسە كاراتێش هەر وەك یارییەكانی تر قورسییەكی خۆی هەیە.
*ئاستی یارییەكانی كاراتێ چۆن دەبینی لە كوردستان؟
- دەتوانم بڵێم ئاستی یاری كاراتێ لە ئێستادا زۆر بەرەوپێشچووە و پێم وایە لە چەند ساڵی داهاتوودا ئاستێكی زۆر باشتری دەبێت لە چاو ئێستادا.
*چی بكرێت باشە بۆ بەرەووپێشبردنی ئاستی ئەم یارییە؟
-ئەنجامدانی پاڵەوانێتی زیاتر كە لە ئێستادا بە ڕادەیەكی زۆر كەم پاڵەوانێتی ئەنجام دەدرێ و بە تایبەتی بۆ كچان زۆر بە كەمی پاڵەوانێتی بەرێوەدەچێت.
*ڕاستە دەلێن یانەكانی كوردستان تیپی كاراتێ‌ كچانیان لە یانەكانیان پشتگوێ خستووە؟
- بە پێچەوانەوە لەم چەند ساڵەی كۆتایی كاراتێ لە ئاستی كچان زۆر ڕووی لە زیاد بوون كردووە.
*بەرنامەت چیە بۆ داهاتووی خۆت وەكو كچە پاڵەوانێك؟
- پلانم بۆ داهاتوو ئەوەیە كە ببمە یاریزانی هەڵبژاردەی عێراق و بەشداری لە پاڵەوانێتی ئاسیا و جیهان بكەم، بەڵام بەداخەوە كە لە ئێستادا كچان ناتوانن بچنە هەڵبژاردوە بۆ یاری كاراتێ.
*سەركەوتن چ هەستێكت پێ دەبەخشێ‌؟
- بێگومان سەركەوتن هەستێكی تایبەتت پێ دەبەخشێ لە بەر ئەوەی سەركەوتن ئامانجمە لەم وەرزشەی هەڵمبژاردووە.
*كێ بە ڕكابەری خۆت دەزانی؟
-بێ گومان كەس بە ڕكابەری خۆم نازانم.
*هیواو ئاواتت وەكو كچە وەرزشكارێك؟
- بەشداری كردن لە پاڵەونێتیەكانی جیهان و بەدەستهێنانی ئەنجامی باش.
*بۆچی كچان بە كەمی ڕوو لەم وەرزشە دەكەن؟
- لە بەر ئەوەی وا بیر دەكەنەوە ئەم یارییە بۆ كوڕان گونجاوە، بەڵام لە ڕاستیدا بە پێچەوانەیە ئەم یارییە زیاتر لە كوڕ بۆ كچ پێویسترە.
*هیچ یانەیەك گرێبەستی پێشكەش نەكردووی؟
-نەخێر لە ئێستادا لە كوردستان زۆر بەكەمی گرێبەست پێشكەشی یاریزانی كاراتێ كچان دەكرێت.
*خانەوادەكەت تا چەند هاوكارتن بۆ وەرزش كردن؟
-خانەوادەكەم زۆر هاوكار و پاڵپشتن بە تایبەتی دایكی ئازیزم زۆر سوپاسیان دەكەم.
*ئەگەرلە كۆتایدا شتێكت ماوە ؟
- دەست خۆشی بۆ گۆڤاری گوڵان بۆ ئەو خزمەتە بەردەوامەی یاریزانان دەكات لە شارەكانی كوردستان.