سەرۆکی هەرێمی کوردستان لەگەڵ سەرپەرشتیاری ئیدارەی سەربەخۆی سۆران و بەرپرسانی یەکە کارگێڕییەکانی ناوچەکە کۆبووەوە. داوای لە هەموو لایەک کرد کە بانگەشەیەکی "شارستانی و ئارام" بەڕێوە ببەن و کار بۆ سەرخستنی هەڵبژاردن بکەن. 
 
رۆژی دووشه‌ممه‌ 23-09-2024 نێچیرڤان بارزانی، سەرۆکی هەرێمی کوردستان لەگەڵ هەڵگورد شێخ نه‌جيب، سه‌رپه‌رشتيارى ئيداره‌ى سه‌ربه‌خۆى سۆران و بەرپرسانی یەکە کارگێڕییەکان کۆبووەوە و بەپێی راگەیێندراوی سەرۆکایەتیی هەرێمی کوردستان، تاوتوێی‌ زه‌مينه‌ و ده‌رفه‌ته‌كانى گه‌شه‌پێدان و پێشخستنى زياترى ناوچه‌كه و بابەتی هەڵبژاردن کران. 
 
بە گوێرەی راگەیێندراوەکە: "لە كۆبوونه‌وه‌كه‌دا، تيشك خرايه‌ سه‌ر پلان و به‌رنامه‌ى داهاتووى كار و پرۆژه‌كان له‌ ناوچه‌كه‌، هه‌روه‌ها ده‌رباره‌ى چۆنيه‌تيى چاره‌سه‌ركردنى گرفت و كه‌موكووڕييه‌كان و فه‌راهه‌مكردنى پێداويستييه‌كان، بيروڕا ئاڵوگۆڕ كران."
 
سه‌رۆكى هه‌رێمى كوردستان "هه‌موو پشتگيرييه‌كى" بۆ ئيداره‌ى سۆران بە مەبەستی "باشتر خزمه‌تكردنى ناوچه‌كه‌ دووپات كرده‌وه‌."
 

ساتی پێشوازی لە نێچیرڤان بارزانی، سەرۆکی هەرێمی کوردستان
 
نێچیرڤان بارزانی ستایشی سەرپەرشتیاری ئیدارەی سەربەخۆی سۆران و بەرپرسانی یەکە کارگێڕییەکان دەکات لە بەرامبەر "ئه‌و كار و خزمه‌ته‌ى کە پێشکێشيان كردووه‌، هه‌روه‌ها به‌ره‌وپێشچوون و گه‌شه‌سه‌ندنى ناوچه‌كه‌ى، به‌رز نرخاند."
 
"بانگه‌شه‌ى چاوه‌ڕوانكراوى هه‌ڵبژاردنى په‌رله‌مانى كوردستان و ئاماده‌كارييه‌كان بۆ پرۆسه‌ى ده‌نگدان، ته‌وه‌رێكى ديكه‌ى كۆبوونه‌وه‌كه‌ بوو. تێیدا سەرۆک نێچيرڤان بارزانى وێڕاى جه‌ختكردنه‌وه‌ له‌ گرنگيى هه‌ڵبژاردن و كاركردن بۆ سه‌رخستنى، داواى له‌ هه‌موو لايه‌ك كرد كه‌ بانگه‌شه‌يه‌كى شارستانى و ئارام به‌ڕێوه‌ ببرێت." سەرۆکایەتیی هەرێمی کوردستان وا گوت.