لە شاری هەولێر دەیەمین پێشانگەی نێودەوڵەتی تەكوین كرایەوە

كۆمەڵەی (universal feather and color) بە هەماهەنگی لەگەڵ بەڕێوەبەرایەتی هونەری شێوەكاری هەولێر دەیەمین پێشانگەی نێودەوڵەتی (تەكوین) كردەوە كە ژمارەیەك هونەرمەندی شێوەكار و كەسانی ئەكادیمی تێیدا بەشداربوون.

پێشانگەكە لەلایەن ئومێد خۆشناو پارێزگاری هەولێر كرایەوەو هەریەك لە (نەبەز عبدالحمید) قایمقامی هەولێر و (سلیم قادر) جێگری بەڕێوەبەری گشتی رۆشنیری و هونەری هەولێر و (ئازاد لەشکری) بەڕێوەبەری هونەری شێوەکاری و ژمارەیەكی بەرچاو لە هونەرمەندان و شێوەكاران ئامادەی پێشانگەكە بوون.

بەشداربووانی دەیەمین پێشانگەی شێوەكاری تەكوین لە 50 هونەرمەندی شێوەكاری عێراقی و وڵاتانی دیكەی عەرەبی وەك سوریا و سعودیە پێكهاتبوون,وەك یادكردنەوەو ڕێزلێنان ئەم پێشانگەیە پێشكەش كرا بە روحی خانمە شێوەكاری كۆچكردوو مەها كەریم محەمەد ناسراو بە (مەها شومەری) لە دایكبووی ساڵی 1964 شاری بەغدا و دەرچووی كۆلیژی هونەرە جوانەكانی زانكۆی “بابل”,ئەم خانمە ئەندامی چالاكی كۆمەڵەی هونەرمەندانی شێوەكارانی عێراق بووە,وە سەرپەشتیار بووە لە بەڕێوەبەرایەتی گشتی پەروەردەی بەغدا,هەروەها بالیۆزی هونەری شێوەكاریی عێراق بووەو یەكێك بووە لە هاوڕێ و هاوكار و پاڵپشتی ئەم گرووپە هونەرییەو چەندین گروپی دیكەی شێوەكاری.

گوڵان-ئاسۆ كاكەیی