ئەمڕۆ لە بەنگلادیش دوو شەمەندەفەر پێکیاندادا و بەهۆیەوە 15 کەس گیانیان لەدەستدا و نزیکەی 100 کەسی دیکەش برینداربوون.

دەسەڵاتدارانی بەنگلادیش دەڵێن: ترسیان هەیە ژمارەی گیانلەدەستدان زیاد بکات.

دەسەڵاتدارانی بەنگلادیش ڕایانگەیاندووە، ڕووداوێکی هاتووچۆ لە شاری « بەهیراب » لە ڕۆژهەڵاتی وڵاتەکە بووەتە هۆی پێکدادانی شەمەندەفەرێکی بارهەڵگر لەگەڵ شەمەندەفەرێکی نەفەرهەڵگر کە بە ئاراستەی پێچەوانەدا دەڕۆیشت و دوو كابینەی نەفەرهەڵگر لە ڕێڕەو دەرچوون.

یەکێک لە بەرپرسە ناوخۆییەکان دەڵێت: "تا ئێستا 15 تەرممان دۆزیوەتەوە و ژمارەیەکی زۆریش برینداربوون".

ئاماژەی بەوەشکردووە، لەم ڕووداوەدا نزیکەی 100 کەس برینداربوون و ئەگەری زیادبوونی ژمارەی قوربانییەکان هەیە.

ڕووداوەکانی شەمەندەفەر لە بەنگلادیش باون و زۆرجار بەهۆی خراپی ئاماژەدان و کەمتەرخەمی و هێڵە کۆنەكانی شەمەندەفەر ڕوودەدەن.

 

 

 

 

 

گوڵان: سەردار خەلیل