لینا عەلی یاریزانی كاراتێ‌ یانەی هەڵەبجە

وەكو پێویست گرنگیەكی باش بەم یارییە نەدراوە
یانەی هەڵەبجە یەكێك لەم یانانەی كە گرنگی زۆر بە بواری وەرزشی دەدەن لە سەر هەردوو ئاستی كچان و كوڕان، تیپی كاراتێ‌ كچانی یانەكەكەش یەكێك لە تیپە هەرە بەهێزەكانی سەر ئاستی كوردستان و عێراقە، ساڵانە لەگەڵ كردنەوەی خولە جۆراوجۆرەكان بەردەوام لە كێبڕكێ دابوونە بۆ بەدەستهێنانی ئەنجامی شایستە و شەڕكردن لەسەر بەدەستهێنانی نازناوەكانی كوردستان و عێراق دەرەوەی عێراقیش، یەكێك لە كچە یاریزانەبەتواناكانی یانەكەش كە خاوەنی چەندین ئەنجامی باشە لەگەڵ یانەی هەڵەبجە لینا عەلی-یە ناوبراو لەدایك بووی ساڵی 2006 و ئێستاش بەردەوامە لە تیپی كاراتێ‌ یانەی هەڵەبجە قوتابی قۆناغی ئامادەییە، گۆڤاری گوڵان لە نزیكەوە چەند پرسیارێكی ئاراستەكرد، ئەویش وەڵامی پرسیارەكانی گوڵانی دایەوە.
دیمانە: كارزان كانەبی
*چۆن بوو هاتیتە نێو جیهانی وەرزشی؟
- هەر لە منداڵیەوە حەزم بە وەرزش كردن بوو.
*لە نێو ئەم هەموو وەرزشە چۆن بوو یاری كاراتێت هەڵبژارد؟
- زۆربەی یارییەكانم ئەنجامداوە وەكو تۆپی پێی و بالە و تێنس، بەڵام حەزێكی تایبەتم بۆ یاری كاراتێ هەبووە زۆر حەزم كردوە ببم بە یاریزانێكی باش لەم یارییە.
*هەست ناكەی یارییەكی قورست هەڵبژاردوە؟
-بەلێ یارییەكی قورسە، بەڵام بەر ئەوەی حەزێكی خۆومە بە لامەوە ئاسانە.
*ئاستی یارییەكانی كاراتێ چۆن دەبینی لە كوردستان؟
-لەم چەند ساڵەی ڕابردوو پەرەی زۆری پێدراوە بەم وەرزشە، بەڵام هێشتا لە ئاستێكی باش دا نییە.
*چی بكرێت باشە بۆ بەرەووپێشبردنی ئاستی ئەم یارییە؟
-هاندانی ڕۆڵی وەرزش و دروست یاریزان و ئەنجامدانی پاڵەوانێتی بەردەوام بۆ ئەوەی ئاستی یاریزانەكان بەرەووپێش بچێت.
*ڕاستە دەلێن یانەكانی كوردستان تیپی كاراتێ‌ كچانیان لە یانەكانیان پشتگوێ خستووە؟
-یاریزانی كچ لەم یارییەدا كەمە، بۆیە زیاتر پشتگوێ خراوە، خۆشبەخاتە ئێستا زۆر باشترە، ڕاستە كوڕان لەم یارییە باشترن، بەڵام لە ئێستادا خۆشبەخاتە كچانیش ڕكابەری یەكتر دەكەن.
*بەرنامەت چیە بۆ داهاتووی خۆت وەكو كچە پاڵەوانێك؟
-بەرنامەم ئەوەیە ئاستی خۆم زۆر باشتر بكەم و بەشداری پاڵەوانێتی زیاتر بكەم.
*سەركەوتن چ هەستێكت پێ دەبەخشێ‌؟
-سەركەوتن بۆ هەموو كەسێك هەستێكی خۆشە، بەڵام زیاتر بۆ ئەو كەسانەی خۆیان زۆر ماندوو كردوە و هەوڵی زیاتریان داوە تا بگەن بە ئاستێكی باش و سەركەوتن بەدەست بهێنێ.
*كێ بە ڕكابەری خۆت دەزانی؟
-هیچ كەسێك بە ڕكابەری خۆم نازانم.
*هیواو ئاواتت وەكو كچە وەرزشكارێك؟
- بەهیوای ئەوەم بتوانم زیاتر گرنگی بە تواناكانی خۆم بدەم و ئاستێكی باش پێشكەش بكەم و خۆم زیاتر بەرەوو پێشببەم.
*بۆچی كچان بە كەمی ڕوو لەم وەرزشە دەكەن؟
-چونكە وەكو پێویست گرنگیەكی باش بەم یارییە نەدراوە، بەڵام ئەگەر زیتر لە سەر ئەم وەرزشە بخوێنینەوە ئەزانین كە یارییەكی چەند بە سوودە هەم بۆ پارێزگاری كردن لە خۆتیش.
*هیچ یانەیەك گرێبەستی پێشكەش نەكردووی؟
-نەخێر لە هیچ یانەیەك گرێبەستم پێشكەش نەكراوە، ئەگەر گرێبەستیشم بۆ بێت قبوڵی ناكەم من هەر لەم یانەیە دەبم كە تێدا فێربوون هەر لەم یانەیەش بەردەوام دەبم.
*خانەوادەكەت تا چەند هاوكارتن بۆ وەرزش كردن؟
-هەر چەندە ئەم وەرزشە وەرزشێكی قورسە و زیاتر واپێشاندراوە كەوا بۆ كوڕان بێت، بەڵام كە كچێكیش بەردەوام بێت لەم یارییە بێگومان پێویستی بە پاڵپشتی خێزانە تا بگاتە ئەم ئاستە.
*ئەگەرلە كۆتایدا شتێكت ماوە ؟
- دەست خۆشی بۆ گۆڤاری گوڵان بۆ ئەو خزمەتە بەردەوامەی یاریزانان، سوپاس بۆ ڕاهێنەركەم كە بەردەوام پاڵپشت بووە.