سەرۆک وەزیرانی ئۆکرانیا ڕایگەیاند، کە قەتەر لە چوارچێوەی یارمەتییە مرۆییەکان ١٠٠ ملیۆن دۆلار بۆ ئەم وڵاتە تەرخان دەکات.

دێنیس شمیهال سەرۆک وەزیرانی ئۆکرانیا پەیامێکی لە سۆشیال میدیا بڵاوکردەوە و دیداری خۆی لەگەڵ محەمەد بن عەبدولڕەحمان ئال سانی وەزیری دەرەوەی قەتەر ڕاگەیاند.

لەم پەیامەدا نووسیویەتی: ئەلسانی ڕایگەیاندووە کە ١٠٠ ملیۆن دۆلار وەک هاوکاری مرۆیی بۆ ئۆکرانیا تەرخان دەکات. ئەم بڕە پارەیە بۆ تەندروستی، پەروەردە، لابردنی مین و ئاوەدانکردنەوەی پڕۆژە گرنگەکانی دیکەی کۆمەڵایەتی و مرۆیی خەرج دەکرێت.

شمیهال هەروەها ئاماژەی بەوەشکرد، لەم کۆبوونەوەیەدا جەخت لەسەر پێویستی دەستپێکردنەوەی دەستپێشخەریی ڕێککەوتننامەی ڕێڕەوی دانەوێڵەی دەریای ڕەش و گواستنەوەی دانەوێڵە لە ئۆکرانیا کراوەتەوە.

ناوبراو ڕایگەیاند: کە یەکێکی دیکە لە تەوەرەکانی کۆبوونەوەکە پێداچوونەوەی ورد بوو بۆ هاوکێشە ئاشتییەكەی سەرۆکی ئۆکرانیا ڤۆلۆدیمیر زێلێنسکی و گوتی: سوپاسی قەتەر دەکەین بۆ ئامادەیی نێوەندگیری بۆ گەڕاندنەوەی ئەو منداڵە ئۆکرانیایانەی کە بە شێوەیەکی نایاسایی لەلایەن ڕووسیاوە بردراون و تا ئێستاش ماونەتەوە لە خاکەکەیدا هێڵراوەتەوە.

 

 

 

گوڵان: سەردار خەلیل