فەرماندەیی هێزی زەمینی ئۆکرانیا بانگەشەی ئەوەی کردووە کە لە سەرەتای جەنگ لەگەڵ ڕووسیا تا ئێستا زیاتر لە ٢٣٣ هەزار سەربازی ڕووسیا کوژراون.

فەرماندەیی هێزی زەمینی ئۆکرانیا بە بڵاوکردنەوەی ڕاگەیاندنێک ڕایگەیاند: کە ئەمڕۆ ٥٠٠هەمین ڕۆژی شەڕە، ئەم ٥٠٠ ڕۆژە بە سەختی تێپەڕیوە، بەڵام هێمای خەباتی هەمیشەیی ئێمەیە بۆ ئازادی و یەکڕیزیمان.

لە درێژەی ئەم ڕاگەیاندنەدا هاتووە: (لە سەرەتای جەنگەوە) زیاتر لە ٢٣٣ هەزار تاوانبار کوژراون. هەروەها زیاتر لە 4 هەزار تانکی (ڕووسی) و نزیکەی 8 هەزار زرێپۆش و 4 هەزار و 346 سیستەمی تۆپخانە و 315 فڕۆکە و 309 هێلیکۆپتەر و 410 سیستەمی بەرگری ئاسمانی دوژمن و 3 هەزار و 666 فڕۆکەی بێفڕۆکەوان خرانە خوارەوە. هەروەها هەزار و ٢٧١ مووشەکی کروز و شەش هەزار و ٩١٤ ئۆتۆمبێل و ٦١٩ ئۆتۆمبێلی تایبەت و ١٨ کەشتی لەناوبراون.

هاوکات وەزارەتی بەرگری ڕووسیا ئەو زانیاریانەی پشتڕاست نەکردۆتەوە کە ئۆکرانیا سەبارەت بە زیانی گیانی سەربازەکانی سوپای وڵاتەکەی بڵاویکردۆتەوە.

 

 

گوڵان: سەردار خەلیل