د.سالار عوسمان بێجگە لەوەی ئەندامی كۆمیتەی ناوەندی و بەرپرسی بەشی ڕۆشنبیری و ڕاگەیاندنی پارتی دیموكراتی كوردستانە، لە هەمان كاتدا ئەكادیمیست و نووسەر و ڕۆژنامەنووسێكی دیاری كوردستانیشە، پێشتریش بریكاری وەزارتی ڕۆشنبیریی حكومەتی هەرێمی كوردستان بووە و، ئەزموونێكی گەورەی لە بواری كاری نووسین و ڕۆژنامەگەری هەیە، لە هەر ئۆرگانێكیش كاری كردبێت، بایەخدانی بە كێشەكانی خەڵك و مامەڵەی دامەزراوەكان لەگەڵ هاووڵاتیان یەكێك لە ئەولەوییەتی پڕۆگرامەكانی بووە،  بۆ ئەوەی سەروەریی یاسا لە هەرێمدا بەرقەرار بێت، لە گفتوگۆی ئەم جارەدا، دوای بەخێرهێنانی گەرمی بەشداربووانی ئەم گفتوگۆیە بەم جۆرە بۆچوونەكانی خۆی خستە ڕوو:

وەك بەشی ڕۆشنبیری و ڕاگەیاندنی پارتی دیموكراتی كوردستان جێگەی شانازییە كە ئەم هەموو ئەكادیمیست و دادوەر و زانا گەورانەی وڵاتی خۆمان لێرە كۆبووینەوە و گفتوگۆ لەسەر پرسێكی گرنگی وەك «ئالنگارییەكانی بەردەم سەروەریی یاسا لە هەرێمی كوردستان» دەكەین، بۆیە زۆر بە گەرمی بەخێرهاتنتان دەكەم، ئەم گفتوگۆیەش دوای ئەوەی پوخت دەكرێتەوە لەسەر لاپەڕەكانی گۆڤاری گوڵان بڵاودەكرێتەوە، بۆ ئەوەی بكەوێتە بەردەستی هاووڵاتیان و حكومەتی خۆمان.

لەم گفتوگۆیەدا، بیروبۆچوونی زۆر بەرز خرانە ڕوو، زۆر بە وردی ئاستەنگەكان دەستنیشان كران و زۆر بە لۆژیكانەش چارەسەریان بۆ دیاری كرا، هەروەها داتا و ئاماری زۆر خرانە ڕوو، كە لەوانەیە هەندێك سەرنجم لەسەر داتا و ئاماری ڕاپرسییەكە هەبێت، بەڵام شتێكی زیادەم نییە بیخەمە سەر ئەو زانیارییە زۆر باشانەی كە بەڕێزان خستیانە ڕوو، بۆیە دەمەوێت سەبارەت بە بازنەی گفتوگۆ چەند وتەیەك بۆ ئامادەبووان بخەمە ڕوو، بۆ ئەمەش لەو پرسیارەوە دەست پێ دەكەم: بۆچی ئێمە وەك بەشی ڕۆشنبیری و ڕاگەیاندنی پارتی دیموكراتی كوردستان بیرمان لەوە كردەوە، پێویستمان بە «بازنەیەكی گفتوگۆ» هەیە كە مانگانە پێكەوە كۆمان بكاتەوە و لەسەر پرسێكی گرنگ گفتوگۆ لەگەڵ دەستەبژێر و ئەكادیمیست و زانا گەورەكانی وڵاتی خۆمان بكەین؟ زۆر بە سادەیی، ئێمە هەستمان كرد ڕەوشی « گفتوگۆ و لێكگەیشتن» لە هەرێمی كوردستاندا لە بارێكی خراپدایە، پێویستمان بەوەیە ژینگەیەك بۆ گفتوگۆ بێنینە ئاراوە كە بتوانین بیروبۆچوونە جیاوازەكان پێكەوە كۆبكەینەوە و گفتوگۆیەكی پۆزەتیف بكەین و لەناو جیاوازییەكانمادا خاڵی هاوبەش بدۆزینەوە بۆ دەسنیشانكردنی كێشە و گرفتەكانمان و پێكەوە خەمی ئەم نیشتمانە بخەینە سەر شانمان و چارەسەر بۆ كێشەكان بدۆزینەوە.

ئەم لێكتێگەیشتن و گفتوگۆیە جارێكی دیكە دەمانهێنێتەوە بۆ ئەوەی دووبارە گوێچكەكانمان بەوە ڕابێتەوە كە گوێ لە بیروبۆچوونی جیاوازی یەكتری بگرین، دەمانهێنێتەوە بۆ ئەوەی گوێ لە ڕەخنە و ناڕەزایی خەڵك بگرین، هەتا ئەگەر سەرنجێكیشمان لەسەر ئەو ڕەخنە و ناڕەزاییانە هەبێت، بەڵام دەبێت بە سینگ فراوانییەوە گفتوگۆ لەگەڵ ڕەخنە و ناڕەزایی خەڵكیش بكەین و، ئەوانیش بەشداری پێ بكەین بۆ دەستنیشانكردنی گرفتەگان و دۆزینەوەی چارەسەرەكان و ببینە پردێك بۆ بەشداریكردنی هاووڵاتیان لە پرۆسەی سیاسیدا و دەرخستنی ڕاستییەكان بۆ حكومەتی خۆمان.

لە ناو ئەم پرۆسەیەی كە لە كوردستان بەڕێوە دەچێت، ئەگەر سەیری كۆمەڵگە و هاووڵاتیانی خۆمان بكەین، بە شانازییەوە دەتوانم بڵێم ئێمە هەم گەلێكی قارەمانمان هەیە، هەمیش كۆمەڵگەیەكی زۆر باشمان هەیە، بەڵام لە لایەن و حزبە سیاسییەكان و بە هۆی ململانێی ناتەندروستی حزبی، غەدرێكی گەورە لەم گەلە و لە كۆمەڵگەی كوردستانیش كراوە، بە ڕاشكاوی دەڵێم حزبە سیاسییەكانی كوردستان وەك حزبی سیاسیی ناو كۆمەڵگەیەكی دیموكراتی كە پێویستە نوێنەرایەتیی ڕاستەقینەی خەڵك بكەن، كامڵ نەبوون، هەر بۆ نموونە، حزبی سیاسی لە وڵاتی ئێمە پێیوایە ئەگەر ئۆپۆزسیۆن بوو، دەبێت بە شێوەیەك سیاسەت بكات، ئەم وڵاتە كاول ببێت، بە چاك و خراپ بڵێت خراپ و ددان بە هیچ شتێكی ئەم نیشتمانەدا نەنێت، هەروەها لەم هەرێمە حزبی سیاسیمان هەیە هاوپەیمانە لە ناو حكومەت، بەڵام وەك ئۆپۆزسیۆنێكی نابەرپرس مامەڵە لەگەڵ حكومەتەكەی خۆی دەكات، بۆیە ژینگەیەكی ئاڵۆزی ئەوتۆیان دروست كردووە كە هاووڵاتیان لە كوردستاندا نەتوانن بیر بكەنەوە و بەشداری لە پرۆسەی سیاسیی وڵاتی خۆیان بكەن، ئەم ئاراستەی قسەكردنەش بەبێ بیركردنەوە و بەبێ پەنجە خستنە سەر ڕاستییەكان، لەوانەیە بەشێكی ڕاست بێت، بەڵام هەموو ڕاستیەكان نین، جارێكی دیكە دووبارەی دەكەمەوە كە هەم داتا و ئاماری ڕاپرسیەكە و هەمیش قسەی ناو ڕاپۆرتە تەلەفزیۆنییەكە ئێمە لە ناوەندێكی ڕاست پێكەوە كۆناكاتەوە.

لەم هەرێمەی ئێمەدا سەقامگیریەكی زۆر باشی ئەمن و ئاسایش هەیە، هاووڵاتیان تا نیوەی شەو لە كافتریاكانن و لەوە ناترسن كەی دەگەڕێنەوە بۆ ماڵەوە، بە دەیان بەرپرسانی ئەم وڵاتە لێپرسینەوەیان لەگەڵ كراوە و ئێستا لە زیندانەكانی حكومەتدان، تیرۆریستێك كە كارێكی تیرۆریستی دەكات، زۆر بە زوویی دەستگیر دەكرێت و دەبرێتە بەردەمی دادگاكان، كە ئەمانە هەمووی كاری زۆر باشن.

ئەگەر لە دوماهیدا تەنیا لە گۆشە نیگای میدیاوە چەند پەیڤێك بڵێم، بەو پرسیارە دەست پێ دەكەم لە خۆشم و لە ئێوەش دەپرسم: ئایا میدیاكانی كوردستان ڤیژن و بۆچوونێكیان بۆ ڕێزگرتن لە یاسا و سەروەریی یاسا هەیە؟ ئایا بەرنامەیەكیان بۆ هۆشیاریی یاسایی و هۆشیاركردنەوەی خەڵك بە گرنگیی ڕێزگرتنی یاسا و گرنگیی جێبەجێكردنی یاسا لە كۆمەڵگە هەیە؟

وەڵامدانەوەی ئەم پرسیارانە ئەركی سەرشانی هەموو لایەكمانە و دەبێت بوێرانە ددان بەوەدا بنێین كە میدیای ئێمە لەم بوارە كەموكورتی زۆرە و دەبێت بە جددی بیری لێ بكەینەوە، لەبەر ئەوەی میدیا ناوەندێكی زۆر گرنگە بۆ ئەوەی لایەنە پەیوەندیدارەكانی كۆمەڵگە و كۆی دامەزراوەكانی ئەم هەرێمە كۆبكاتەوە و ببێتە ناوەندێك بۆ ئەوەی تەكامولێكی فیكریی تەواو دروست بكات و، زەمینەیەك دروست بكات كە هاووڵاتیانی كوردستان لە یاساكانی وڵاتی خۆیان تێ بگەن و ڕێز لە یاسای وڵاتی خۆیان بگرن.