ئەمڕۆ یەکشەممە 16/4/2023، مەسرور بارزانی، سەرۆکی حکوومەتی هەرێمی کوردستان پێشوازی لە میر حازم تەحسین بەگ، میری ئێزدییان کرد و گفتوگۆیان لەبارەی دۆخی ئێزدییان و ڕەوشی دەڤەری شنگال بەتایبەتی کرد.

سەرۆکی حکوومەت وێڕای دووپاتکردنەوەی پشتیوانی حکوومەتی هەرێمی کوردستان بۆ ماف و داخوازییەکانی ئێزدییان، جەختی لە گرنگیی جێبەجێکردنی ڕێککەوتننامەی شنگال و دەرچوونی میلیشیا و گرووپە چەکدارییە نایاساییەکان و ئاساییکردنەوەی دەڤەرەکە کردەوە لە پێناو ئاوەدانکردنەوەی شنگال و گەڕانەوەی ئاوارەکان بۆ شوێنەکانیان.

لای خۆیەوە میری ئێزدییان سوپاس و پێزانینی بۆ پشتیوانیی بەردەوامی حکوومەتی هەرێم لە ئێزدییان و کەمکردنەوەی ئێش و ئازارەکانیان و گرنگیدان بە ڕۆڵی ئێزدییان لە دامەزراوەکانی حکوومەت دەربڕی.