سه‌رۆكى هه‌رێمى كوردستان له‌گه‌ڵ سه‌ركۆمار دۆخى وڵات تاوتوێ ده‌كات
ئيواره‌ى ئه‌مڕۆ شه‌ممه 2023/4/8 به‌ڕێز نێچيرڤان بارزانى، سه‌رۆكى هه‌رێمى كوردستان له به‌غدا، له‌گه‌ڵ به‌ڕێز د. عه‌بدوله‌تيف ڕه‌شيد سه‌ركۆمارى عێراقى فيدراڵى كۆبووه‌وه.
له كۆبوونه‌وه‌كه‌دا هه‌ردوولا ڕێككه‌وتنى حكوومه‌تى هه‌رێمى كوردستان و حكوومه‌تى فيدراڵيى عێراقيان بۆ ده‌سپێكردنه‌وه‌ى هه‌نارده‌كردنى نه‌وتى هه‌رێمى كوردستان به هه‌نگاوێكى ئه‌رێنى له قه‌ڵه‌م دا كه له به‌رژه‌وه‌نديى ته‌واوى عێراقدايه و هيوايان خواست ڕێگه خۆش بكات بۆ چاره‌سه‌ركردنى كێشه‌كانى ديكه‌ى هه‌ولێر ـ به‌غدا.
هه‌ردوولا دۆخى سياسى و ئه‌منيى وڵاتيان تاوتوێ كرد و جه‌ختيان له پێويستيى پاراستنى سه‌قامگيرى و سه‌روه‌ريى عێراق كرده‌وه، هه‌روه‌ها لێكگه‌يشتن و گفتوگۆيان بۆ چاره‌سه‌ركردنى كێشه‌كان به ڕێگه‌ى ڕاست له قه‌ڵه‌م دا.
پرۆژه‌ياساى بودجه‌ى گشتيى عێراق و په‌يوه‌ندييه‌كانى عێراق له‌گه‌ڵ وڵاتانى دراوسێ و ناوچه‌كه و چه‌ند پرسێكى ديكه‌ى جێى بايه‌خى هاوبه‌ش، لايه‌نێكى ديكه‌ى كۆبوونه‌وه‌كه بوو.
