سەرۆكی حكوومەتی هەرێمی كوردستان لە ساڵیادی ڕاپەڕینی 1991دا، پەیامێكی بڵاو كردەوە و ڕایدەگەیەنێت: "ڕاپەرینی شکۆداری 1991، بەرهەمی یەکڕیزی و یەکگرتوویی هێزە کوردستاییەکان و پێکهاتە جیاوازەکان و چین و توێژەکانی خەڵکی کوردستان بوو."

ئەمڕۆ یەكشەممە 5/3/2023، مەسرور بارزانی، سەرۆكی حكوومەتی هەرێمی كوردستان، لە ساڵیادی ڕاپەڕینی 1991دا، پەیامێكی بڵاو كردەوە و دەڵێت: "بە بۆنەی 32ەمین ساڵیادی ڕاپەڕینی مەزن و شکۆداری گەلی کوردستان لە ئاداری 1991، گەرمترین پیرۆزبایی ئاڕاستەی گشت کوردستانییان و پێشمەرگە قارەمانەکان و بنەماڵەی سەربەزری شەهیدان دەکەم."

سەرۆكی حكوومەتی هەرێمی كوردستان ئاماژەی بەوەش داوە: "ڕاپەرینی شکۆداری 1991، بەرهەمی یەکڕیزی و یەکگرتوویی هێزە کوردستاییەکان و پێکهاتە جیاوازەکان و چین و توێژەکانی خەڵکی کوردستان بوو، کە وەرچەخانێکی مێژوویی لە خەبات و تێکۆشانی گەلی کوردستان لە پێناو ڕزگاربوونی لە ستەم و چەوساندنەوە و داگیرکاری و بەدەستهێنانی ئازادی دروست کرد."

مەسرور بارزانی دەشڵێت: "ڕاپەڕین پەیامێکی ڕوون و زوڵاڵی خەڵکی کوردستان بوو بۆ هەموو جیهان، کە ژێردەستەیی و داگیرکاری ڕەت دەکاتەوە و دەیەوێ بە سەربەرزی و شکۆمەندانە بژی، لەم یادە پیرۆزەدا، جەخت لە هاوهەڵوێستی و تەبایی خەڵکی نیشتیمانپەروەری کوردستان دەکەینەوە بۆ داکۆکیکردن لە دەستکەوتەکانمان و مافە دەستوورییەکانی گەلی کوردستان، کە بە هەموو شێوەیەک، بەرگرییان لێ دەکەین و دەستبەرداریان نابین، بەردەوام دەبین لە کاروانی ئاوەدانکردنەوە و گەشەپێدانی کوردستان."

لە كۆتایی پەیامەكەیدا سەرۆكی حكوومەت ڕایگەیاندووە: "لە ساڵیادی ڕاپەڕیندا، سەری ڕێز و نەوازش بۆ شەهیدانی نەمری ڕاپەرین و گشت شەهیدانی کوردستان دادەنوێنین."