لە یەکەمین ساڵیادی کۆچی دوایی عەزیز سەلامدا ڕێز لە ژمارەیەک هونەرمەند دەگیرێت
![لە یەکەمین ساڵیادی کۆچی دوایی عەزیز سەلامدا ڕێز لە ژمارەیەک هونەرمەند دەگیرێت](https://gulanmedia.com/public/images/posts/20221213191519_original_38.jpg )
گرووپی (Z) بۆ کاری هونەری لە یەکەمین ساڵیادی کۆچی دوایی هونەرمەندی گۆرانیبێژ (عەزیز سەلام) کاتژمێر ٣ـی ئێوارەی ڕۆژی پێنجشەممە ١٥/١٢/٢٠٢٢، لە هوتێل چوارچرا لەژێر دروشمی (کۆچ) بە ئامادەبوونی ژمارەیەکی بەرچاو لە هونەرمەندان و ڕوشنبیران و کەناڵەکانی ڕاگەیاندن ڕێز لە ١٥ هونەرمەندی گۆرانیبێژ گرت، هاوکات کلیپێکی نوێ بۆ یەکەمجار نیشان درا کە هۆنینەوەی گۆرانی (کۆچ)ـی هونەرمەندی کۆچکردووە لە لایەن دەستەیەک لە هونەرمەند و موزیکژەنان گوتراوە.
(زانا مەرزانی) سەرپەرشتیاری گرووپی Z بۆ کاری هونەری ڕایگەیاند: لە یەکەمین ساڵیادی کۆچی ئەو دەنگە زوڵاڵەی کە ساڵی ڕابردوو لە ڕووداوێکی نەخوازراودا گیانی سپارد و کۆچی ناوادەی دڵی هەموومان هێنایە هەژان، بڕیارماندا لەو ساڵیادە غەمگینەدا، کلیپێکی نوێ کە گۆرانی (کۆچ)ـە و بەدەنگی چەند هونەرمەندێکی دەنگخۆش و هاوڕێی (عەزیز سەلام)ـی هونەرمەند گوتراوە پێشکەش بە ئامادەبووان بکرێت، هاوکات ڕێز لە ١٥ هونەرمەندی گۆرانیبێژ و موزیکژەنان نرا کە لە ئێستادا سەرگەرمی گۆرانی و داهێنانن لە بواری موزیکدا.
هەر لە چوارچێوەی ساڵیادەکەشدا چەند وتار و دێڕە شیعرێک پێشکەش بە (عەزیز) و ڕوحە شیرینەکەی هەولێر کران کە دەنگ و گۆرانی و ئاوازەکانی لە دڵی هەموواندا هەر بەزیندوویی دەمێننەوە.
جێگەی باسە، (عەزیز سەلام) لە ساڵی ١٩٧٣ لە هەولێر لە دایکبووە و لە سەرەتای ساڵی ١٩٩٢ دەستی بە کاری هونەری کردووە و لە ساڵی ٢٠٠١ کوردستانی جێهێشت و لە وڵاتی بەریتانیا نیشتەجێ بوو، لە سەرەتای ساڵی ٢٠٢٢ گەڕایەوە کوردستان و لە ١٦/١٢/٢٠٢٢ لە ڕووداوێکی نەخوازراودا گیانی سپارد و ماڵئاوایی لە ژیان و هونەر و هونەرمەندان دا کرد.