سه‌رۆك نێچيرڤان بارزانى: چاره‌سه‌ركردنى كێشه‌كان له‌گه‌ڵ هه‌رێمى كوردستان، كليلى سه‌قامگيريى عێراقه‌

سه‌رۆك نێچيرڤان بارزانى: چاره‌سه‌ركردنى كێشه‌كان له‌گه‌ڵ هه‌رێمى كوردستان، كليلى سه‌قامگيريى عێراقه‌

ئێواره‌ى ئه‌مڕۆ  دووشه‌ممه‌ 2022/10/17 به‌ڕێز نێچيرڤان بارزانى، سه‌رۆكى هه‌رێمى كوردستان، له‌ ڕێوڕه‌سمى ده‌رچوونى خولى بيست و حه‌وتى زانكۆى دهۆكدا به‌شدار بوو و وتاريكى ده‌رباره‌ى خوێندن و په‌روه‌رده‌ ئاراسته‌ى ده‌رچووان و ئاماده‌بووان كرد.

سه‌رۆك نێچيرڤان بارزانى وێڕاى پيرۆزبايى و هيواى سه‌ركه‌وتن بۆ ده‌رچووان، پێزانينى بۆ ڕه‌نجى دايكوباوك و خێزانى ده‌رچووان و مامۆستايانى زانكۆ ده‌ربڕى كه‌ بۆ سه‌ركه‌وتن هاوكار و پشتيوانى ده‌رچووان بوون، هه‌روه‌ها داواى له‌ ده‌رچووان كرد به‌ دڵێكى گه‌رم و پڕ له‌ ئومێد و به‌ گه‌شبينييه‌وه‌ هه‌نگاو بۆ قۆناغى تازه‌ى ژيان و به‌رپرسياریيه‌تى بنێن و ئه‌و شاره‌زايى و پسپۆڕييه‌ى به‌ده‌ستيان هێناوه،‌ بخه‌نه‌ خزمه‌تى وڵات‌.

سه‌رۆك نێچيرڤان بارزانى دووپاتى كرده‌وه‌ كه‌ هه‌رچه‌نده‌ ژماره‌ى ده‌رچووان و پێويستيى بازاڕى كار هاوسه‌نگ نين و ڕه‌نگه‌ هه‌مووان نه‌توانن زوو كار بدۆزنه‌وه‌، به‌ڵام نابێ ده‌رچووان بێهيوا ببن، به‌ڵكو ده‌بێ به‌رده‌وام تواناكانيان پێشبخه‌ن، بۆ ئه‌مه‌ش له‌وانه‌يه‌ هه‌ندێكيان بتوانن خۆبه‌خشانه‌ له‌ ڕێكخراوه‌كانى كۆمه‌ڵگه‌ى مه‌ده‌نى كار بكه‌ن تا باشتر خۆيان پێبگه‌يه‌نن و شانسى دۆزينه‌وه‌ى كاريان زياتر بێت.

به‌ڕێزيان هه‌روه‌ها داواى كرد ده‌رچووان ئه‌زموونى پێكه‌وه‌بوون و پێكه‌وه‌كاركردن و هاوبه‌شى و به‌شداريى پێكه‌وه‌يان له‌ ساڵانى خوێندنى زانكۆ، بگوازنه‌وه‌ ناو كۆمه‌ڵگه‌ و شوێنى كار و ئه‌و ئه‌زموونه‌ له‌ ژيانى ڕۆژانه‌ياندا ڕه‌نگ بداته‌وه‌ تا بتوانن كولتوورى لێبورده‌يى و پێكه‌وه‌ژيان و يه‌كترقبووڵكردن قووڵتر و فراوانتر بكه‌نه‌وه‌.

هه‌روه‌ها به‌ بيرى ده‌رچووانى هێنايه‌وه‌ هه‌رگيز وا بير نه‌كه‌نه‌وه‌ كه‌ به‌ ته‌واوكردنى زانكۆ ئيتر پێويستى و هه‌وڵدانيان بۆ فێربوون كۆتايى دێت، چونكه‌ فێربوون و فراوانكردنى ئاستى زانين و تێگه‌يشتن دنيانبينيى مرۆڤ، هه‌رگيز كۆتايى نايه‌ت و تاكو مرۆڤ زياتر بزانێت، باشتر له‌وه‌ تێده‌گات كه‌ هێشتا زۆرى ماوه‌ بزانێت. بۆيه‌ پێويسته‌ ده‌ر‌چووان به‌رده‌وام ئاستى فێربوون و زانين و شاره‌زايييان به‌رزتر بكه‌نه‌وه‌ و ببنه‌ چرايه‌ك بۆ ڕووناككردنه‌وه‌ى ده‌وروبه‌ريان.

سه‌رۆك نێچيرڤان بارزانى ئاماژه‌ى به‌وه‌ كرد كه‌ پێشكه‌وتنى خێراى زانست وته‌كنه‌لۆژيا واى كردووه‌ ژيانيش زۆر خێرا پێشبكه‌وێت، ئه‌وه‌ش پێويست ده‌كات مرۆڤ له‌گه‌ڵ ئه‌و پێشكه‌وتنانه‌ى سه‌رده‌م پێشكه‌وێت و خۆى نوێ بكاته‌وه‌. هه‌روه‌ها گوتى: ئه‌وه‌ وه‌ك تاكه‌كه‌س ئه‌ركى ئێوه‌يه‌ و وه‌ك سيستمى په‌روه‌رده‌ و خوێندن و فێركردنيش ئه‌ركى لايه‌نه‌ په‌يوه‌نداره‌كانه‌.

هه‌ر له‌مباره‌يه‌وه‌ جه‌ختى له‌وه‌ كرده‌وه‌ كه‌: ئه‌مه‌ بۆ ئێمه‌ پێويستييه‌كى ژيانييه‌ و وه‌ك پێشتيرش گوتوومانه‌ كليلى سه‌ركه‌وتن، سيستمێكى باشى په‌روه‌رده‌يه‌. چونكه‌ به‌ ته‌نيا سيستمێكى باشى په‌روه‌رده‌ ده‌توانێت ئێستا و داهاتوومان مسۆگه‌ر و گه‌شتر و باشتر بكات و كۆمه‌ڵگه‌يه‌كى پێشكه‌وتوو بنيات بنێت و گوتى: زانين و زانست و فێربوون، هێزێكى له‌بننه‌هاتووه‌، ئه‌و هێزه‌ى كه‌ ئێستا و داهاتوومان ده‌پارێزێت.

سه‌رۆك نێچيرڤان بارزانى هه‌روه‌ها دووپاتى كرده‌وه‌ كه‌ وێڕاى هه‌موو پێشكه‌وتنه‌كان هێشتا زۆر كار ماوه‌ له‌ كوردستان بكرێت و ده‌بێ له‌ زۆر بارى جيادا بنيات بنێين، هه‌ر له‌ بنياتنانى مرۆڤ و مرۆڤسازييه‌وه‌ تا ده‌گاته‌ سوودوه‌رگرتن له‌ هه‌موو ده‌وڵه‌مه‌ندييه‌كانى وڵات. بايه‌خدانى زياتريشى به‌ خوێندنى پيشه‌يى و كردنه‌وه‌ى ئاماده‌يى و په‌يمانگه‌ و كۆلێژى پيشه‌يى به‌ پێويست زانى.

بۆ دروستكردنى هاوسه‌نگيى نێوان بازاڕى كار و بواره‌كانى خوێندنيش، دووپاتى كرده‌وه‌ كه‌ ده‌بێ سێگۆشه‌ى (حكوومه‌ت ـ بازاڕ ـ زانكۆ) پێكه‌وه‌ هاريكار و هه‌ماهه‌نگ بن. هه‌روه‌ها جه‌ختى له‌ پێويستيى سوودوه‌رگرتن له‌ ده‌وڵه‌مه‌نديى سروشتى و مرۆيى و پته‌وكردنى ژێرخانى كشتوكاڵى، گه‌شتيارى و پيشه‌سازى و بايه‌خدان به‌ كار و بزنسى ئۆنلاين كرده‌وه‌.

به‌ڕێزيان بۆ هه‌ر پێشكه‌وتنێك به‌رله‌ هه‌موو شتێك پته‌وكردنى ژێرخانى په‌روه‌رده‌ى به‌ پێويست زانى كه‌ ئه‌مه‌ش له‌ ڕێگه‌ى لێكۆڵينه‌وه‌ و هه‌ڵسه‌نگاندنى زانستى و گۆڕانكارى و چاكسازى له‌ سيستمى په‌روه‌رده‌ييدا ده‌كرێت، سيسته‌مێك كه‌ مرۆڤى بيركه‌ره‌وه‌، بنياتنه‌ر و داهێنه‌ر به‌رهه‌م بهێنێت و ده‌رچوون له‌ زانكۆ ته‌نيا بڕوانامه‌يه‌ك نه‌بێت.

له‌ كۆتاييدا سه‌رۆك نێچيرڤان بارزانى وێڕاى تیشك خستنه‌ سه‌ر مێژووی دامه‌زراندنی زانكۆ و ده‌ستخۆشى و پێزانين بۆ ئه‌و خزمه‌ته‌ى زانكۆى دهۆك له‌ ماوه‌ى سى ساڵی د‌امه‌زرانيدا كردوويه‌تى، ده‌رباره‌ى دۆخى سياسيى وڵاتيش، وێڕاى دووباره‌ پيرۆزبايى له‌ سه‌ركۆمار و سه‌رۆك وه‌زيرانى ڕاسپێردراو، هيواى خواست به‌ زووترين كات حكوومه‌تێكى وه‌ڵامده‌ره‌وه‌ى داواى ڕه‌واى هاووڵاتيان بێته‌ ئاراوه‌ و هه‌موو لايه‌ن و پێكهاته‌ عێراقييه‌كان پێكه‌وه‌ بۆ ئارامى و سه‌قامگيريى وڵات كار بكه‌ن.

به‌ڕێزيان جه‌ختى له‌وه‌ كرده‌وه‌ كه‌ هێز و لايه‌نه‌ عێراقييه‌كان ده‌بێ وانه‌ و په‌ند له‌ هه‌ڵه‌كانى ڕابردوو وه‌ربگرن، حكوومه‌تى نوێى عێراقيش ده‌بێ دۆخى وڵات واقعيانه‌ و وه‌ك خۆى ببينێت و كێشه‌كان چاره‌سه‌ر بكات، به‌تايبه‌تى كێشه‌كان له‌گه‌ڵ هه‌رێمى كوردستان كه‌ ئه‌مه‌ى به‌ كليلى ئارامى و سه‌قامگيريى عێراق له‌ قه‌ڵه‌م دا.

ئه‌مه‌ش ده‌قى وتارى سه‌رۆك نێچيرڤان بارزانى يه‌:

ئاماده‌بوويێت خۆشتڤى،

ده‌رچوويێت هێژا،

ئێڤارى باش،

هوين هه‌مى گه‌له‌ك بخێر هاتن بۆ ڤێ ڕێوڕه‌سمێ..

گه‌له‌ك خۆشحالم كو ڤێ ئێڤاريێ، ئه‌م پێكڤه‌ دگه‌ل ده‌رچوويێت هێژا يێت خولا بيست و حه‌فتێ يا زانكۆيا دهۆكێ و مالبات و كه‌سوكارێت وان، به‌شدارييا خۆشى و شادييا هه‌وه‌ دكه‌ين. ژ دل و ب گه‌رمى پيرۆزباهيێ ل ئێك ب ئێكى ده‌رچوويا و دايكوباب و كه‌سوكارێت وا دكه‌م. هيڤيا سه‌ركه‌فتنا به‌رده‌وام بۆ ده‌رچوويا د هه‌می وارێن ژیانێدا دخازم.

ده‌ستخۆشى و پێزانين بۆ سه‌رۆك و مامۆستا و فه‌رمانبه‌رێت زانكۆيا دهۆكێ كو دگه‌ل قوتابيا ماندى بووين. سپاس و ده‌ستخۆشى بۆ دايكوبابێت ده‌رچوويا. ئه‌و هاريكار بوون و زه‌حمه‌ت كێشا، دا ئه‌ڤرۆ ببينن كو كچ و كوڕێت وان، سه‌ركه‌فتى زانكۆ خه‌لاس كر و قۆناغه‌كا دى يا ژيانێ و به‌رپرسياريێ ده‌ستپێدكه‌ن.

ده‌رچوويێت هێژا..

هوين ئه‌ڤرۆ ده‌ربازى قۆناغه‌كا دى يا ژيانێ دبن. ژ ئه‌ڤرۆ پێڤه‌ دێ به‌رپرسياريا كار و خزمه‌تا وه‌لاتى، گرنه‌ سه‌ر ملێ خۆ. چ ئه‌وێت كو دێ ل كه‌رتێ گشتى، يان تايبه‌ت، يان دگه‌ل ڕێكخراوێت جڤاكا مه‌ده‌نى شۆل كه‌ن. ژبه‌ر هندێ ئێدى به‌رپرسياريا هه‌وه،‌ ژ ئه‌ڤرۆ وێڤه‌ دێ مه‌زنتر بيت.

پشتى چه‌ندين سالێت خويندنێ و خۆمانديكرنێ، هوين دڤێت ئه‌ڤرۆ ب دله‌كێ گه‌رم و پڕ ئومێد، ب گه‌شبينى، گاڤا بۆ داهاتيێ ژيان و كارێ خۆ پاڤێژن. دڤێت ئه‌و زانست و شه‌هره‌زايى و پسپۆڕييا كو هه‌وه‌ د سالێت خويندنێدا ل زانكۆيێ بده‌ستڤه‌ ئيناى، ب شێوه‌يه‌كێ كارا و ب ڕێكوپێكى د خزمه‌تا ملله‌ت و ئاڤاكرن و به‌ره‌ڤپێشبرنا وه‌لاتێ خۆ بكار بینن.

ئه‌ڤه ڕاستييه‌كه‌ كو هه‌ژمارا ده‌رچوويا و پێويستييا بازاڕێ كارى يا هه‌ڤسه‌نگ نييه‌ و بۆ هه‌مى ده‌رچوويا يا بساناهى نابيت كاره‌كى ببينن. به‌لێ یا ژ هه‌ر تشته‌كێ گرینگتر ئه‌وه‌ كو هوين بێ هيڤى نه‌بن. دڤێت هه‌ر هه‌وڵ بده‌ن بۆ خۆپێشئێخستنێ. به‌لكى هنده‌ك بشێن هه‌يامه‌كێ خۆبه‌خشانه‌ كارى دگه‌ل ڕێكخراو و ده‌زگه‌هێن جڤاكا مه‌ده‌نى و كارێ مرۆڤایه‌تی بكه‌ن، ئه‌ڤه‌ دێ خۆپێگه‌هاندن و ئه‌زموونا هه‌وه‌ ده‌وله‌مه‌نتر و دێ شانسێ هه‌وه‌ ژى زێده‌تر كه‌ت بۆ په‌یداكرنا كاری.

‌هوين كو ژ جهـ و ده‌ڤه‌رێت جدا يێت كوردستانێ ئه‌ڤرۆ هاتن و ل زانكۆيێ پێكڤه‌ بوون، دڤێت گيانێ هه‌ڤالينى و ئه‌زموونا خۆ يا پێكڤه‌كاركرنێ و پێكڤه‌بوونێ، يا هه‌ڤبه‌شيێ و به‌شدارييا خۆ يا سالێت زانكۆيێ، دگه‌ل خۆ ببه‌نه‌ ناڤ جڤاكێ. دگه‌ل خۆ ببه‌نه‌ جهێ كارى و د ژيانا هه‌وه يا ڕۆژانه‌دا پێويسته‌ ڕه‌نگڤه‌ده‌ت. دڤێت ئه‌ڤ ئه‌زموونا هه‌وه‌، كولتوورێ لێبورده‌يى و پێكڤه‌ژيانێ و هه‌ڤقه‌بوولكرنێ ل كوردستانێ كويرتر و فره‌هتر بكه‌ت بتایبه‌تی له‌ پارێزگه‌ها خۆشته‌ڤییا دهۆكێ.

ده‌رچوويێت هێژا..

چ جارا نه‌بێژن و وه‌سا هزر نه‌كه‌ن كو هه‌وه‌ قۆناغا زانكۆيێ بدويماهى ئينا و ئێدى پێويستى و هه‌ولدانا هه‌وه‌ ژبۆ فێربوونێ بديماهى تێت! نه‌خێر، چ جارا فێربوون و به‌رفره‌هكرنا ئاستێ زانين و تێگه‌هشتن و دنيابينيا مرۆڤى بديماهى ناهێت! مرۆڤ هندى زۆرتر بزانيت، دێ باشتر تێگه‌هيت كو هێشتا گه‌له‌كێ ماى بزانيت. چ جارا ديماهيا فێربوون و زانينێ نينه‌! دڤێت هه‌ر ڕۆژ ئاستێ فێربوون و زانين و شاهره‌زاييا خۆ بلندتر بكه‌ن. دڤێت هوين ببنه‌ ڕۆناهييه‌ك بۆ ده‌وروبه‌رێ خۆ، دا ڕۆناهیتر بكه‌ن.

پێشكه‌فتنا بله‌ز يا زانستى و ته‌كنه‌لۆژى، وه‌سا كريه‌ كو ژيان ژى گه‌له‌ك بله‌ز پێشكه‌ڤيت. پێويسته‌ ڕۆژانه‌ دگه‌ل پێشكه‌فتنێت نوى يێت سه‌رده‌مى، مرۆڤ ژى دگه‌ل پێشكه‌فتنا، خۆ نويڤه‌كه‌ت. ئه‌گه‌ر نه‌، دێ ل پاش مينين و ناگه‌هينه‌ كاروانێ ملله‌تێت پێشكه‌فتى یێت جیهانێ! گۆڕانكارى و خۆنويكرن و ڤێڕاگه‌هشتن ب كاروانێ پێشكه‌فتنێ، هه‌م وه‌كى تاكه‌كه‌سه‌ك ئه‌ركێ هه‌وه‌يه‌، هه‌م ژى وه‌ك سيستمێ په‌روه‌رده‌ و خويندن و فێركردنێ، ئه‌ركێ لايه‌نێت په‌يوه‌نداره‌. بۆ گه‌ل و وه‌لاتێ مه‌ هيچ تشته‌كێ دى، هندى زانين و فێربوون و سيسته‌مه‌كێ باش و پێشكه‌فتى يێ په‌روه‌رده‌يى، پێويست نيه‌!

ئه‌ڤه‌ بۆ مه‌ هه‌وجه‌دارييه‌كا ژيانييه‌. بۆ ملله‌تێ مه‌ پێدڤییه‌كا گه‌له‌كا گرنگه‌ بۆ ئه‌ڤرۆ و پاشه‌ڕۆژا وان. وه‌ك مه‌ به‌رێ ژى گۆتييه‌: كليلا سه‌ركه‌فتنێ، سيسته‌مه‌كێ باش يێ په‌روه‌ردێيه‌. لسه‌ر ڤى بنه‌ماى ژى، به‌رى نهۆ ل هه‌رێما كوردستانێ چه‌ندين هه‌ول هاتينه‌دان كو جهێ ده‌ستخۆشيێنه‌، ئه‌و هه‌ولێن هاتینه‌ دان ل وه‌زاره‌تا په‌روه‌رده‌یا حكوومه‌تا هه‌رێمێ، وه‌زاره‌تا خویندنا بلند و جه‌نابێ سه‌رۆك وه‌زیران و هه‌می حكوومه‌تا هه‌رێمێ، لێ بێگومان ئه‌ڤه‌ پرۆسه‌يه‌كه‌ دڤێت هه‌را به‌رده‌وام بيت و دگه‌ل نويترين پێشكه‌فتنێت جيهانێ بچيت.

ب تنێ سيسته‌مه‌كێ په‌روه‌رده‌يى يێ باش و پێشكه‌فتى، دێ شێت هاريكاريا مه بكه‌ت بۆ هه‌بوونا نها و پاشه‌ڕۆژه‌كا مسۆگه‌ر و گه‌شتر بۆ ملله‌تێ مه‌. ب تنێ سيسته‌مه‌كێ په‌روه‌رده‌يى يێ باش و پێشكه‌فتى، دێ شێت جڤاكه‌كا پێشكه‌فتى يا ڤه‌كرى ئاڤاكه‌ت. زانين و زانست و فێربوون، هێزه‌كا مه‌زنا ژبنه‌هاتيه‌‌. ئه‌و هێزا كو دێ نها و پاشه‌ڕۆژا مه‌ پارێزيت.

ئاماده‌بوويێن ڕێزدار..

دگه‌ل هه‌مى پێشكه‌فتنا، ل هه‌رێما كوردستانێ هێشتا گه‌له‌ك كار مايه‌ دڤێت بێنه‌ كرن. دڤێت ئه‌م د گه‌له‌ك وارێت جدادا، به‌رده‌وام بین لسه‌ر كارێ خۆ. هه‌ر ژ ئاڤاكرنا مرۆڤان و مرۆڤسازيێ، هه‌تا دگه‌هيته‌ مفاديتنا ژ هه‌مى ده‌رفه‌ت و ده‌وله‌مه‌نديێت وه‌لاتێ مه‌.

گه‌له‌ك پێويسته‌ ئاماده‌يى و په‌يمانگه‌هـ و كۆلێژێت زۆرتر و باشتر يێت پيشه‌يى و كارسازى و كارێ ده‌ستى و هۆستاكاريێ د وه‌ڵاتێ مه‌دا بێنه‌ ڤه‌كرن. ژبه‌ر هندێ دڤێت ئه‌م د سيسته‌مێ په‌روه‌ردێدا، بها و گرنگييه‌كا تايبه‌ت بده‌ينه‌ بازاڕێ كارى و باڵانس و هه‌ڤسه‌نگييه‌كێ دناڤبه‌را وارێ خويندنێ و بازاڕێ كارى و پێويستى و هه‌وجه‌داريێت ويدا چێكه‌ين. بۆ ڤێ چه‌ندێ دڤێت به‌رده‌وام سێكوچكا (حكوومه‌ت ـ بازاڕ ـ زانكۆ) ڤێكرا هاريكار و هه‌ماهه‌نگ و ته‌مامكارێت ئێكودو بن.

وه‌لاتێ مه‌ خودانێ گه‌له‌ك ده‌وله‌مه‌نديێت سروشتى و مرۆڤييه‌، دڤێت ئه‌م نڤشێ نهۆ و يێ داهاتى لدويڤ پێويستى و ده‌رفه‌تێت هه‌يى ئاماده‌ بكه‌ين. ده‌رفه‌ت و شيان هه‌نه‌ كو ژێرخانێ كشتوكالى و گه‌شتيارى و پيشه‌سازى ل هه‌رێما كوردستانێ بێته‌ موكومكرن. دڤێت هوين گرنگيێ بده‌نه‌ كار و بزنسێت ئۆنلاين. بۆ ڤێ چه‌ندێ و بۆ هه‌می پێشكه‌فتنه‌كا دى ژى، دڤێت ئه‌م به‌رى هه‌ر تشتى و ده‌سپێكێ، ژێرخانێ په‌روه‌رده‌يى موكوم بكه‌ين.‌

ده‌رچوونا زانكۆيێ، چێنابيت بتنێ باوه‌ڕنامه‌ك ‌بيت! دڤێت زانكۆيێت مه‌، سيستمێ مه‌ يێ په‌روه‌رده‌يى، مرۆڤێ هزركه‌ر، ئاڤاكار و داهێنه‌ر به‌رهه‌م بينن. ده‌رچوويێت زانكۆيێ، دڤێت ب زانين و فێربوون و پسپۆڕيا خۆ، ده‌رفه‌تا كارى بۆ خۆ و بۆ ده‌وروبه‌رێ خۆ ژى په‌يدا بكه‌ن.

قوتابی یێت خۆشتڤی و ئاماده‌بوویێت ڕێزدار..

جهێ دلخۆشييه‌كا مه‌زنه‌ كو ئه‌م ئه‌ڤرۆ ل زانكۆيا دهۆكێ ئه‌نجامێ بڕياره‌كا دروست يا به‌رى سيهـ سالا دبينين. سالا 1992ێ، ڕێزدار د. عيسمه‌ت محه‌مه‌د خالد و هژماره‌كا مامۆستايێت هێژايێت دهۆكێ، سه‌ره‌دانا جه‌نابێ سه‌رۆك بارزانى كرن و داخازا ڤه‌كرنا زانكۆيه‌كێ ل دهۆكێ كرن. جه‌نابێ وان ژى هه‌مى پشته‌ڤانى كر و زانكۆ هاته‌ ئاڤاكرن.

سه‌رۆكێ زانكۆیێ و ئه‌و مامۆستایێن كو به‌رێ بنیاتێ ڤێ زانكۆیێ دانای، ئه‌ڤرۆ و دڤێ ڕۆژێدا جاره‌كا دی ده‌ستخۆشیێ و سپاسیا وان دكه‌م، د وان ڕۆژێن زه‌حمه‌تدا ب باوه‌رییه‌كا موكوم به‌رێ بنیاتێ ڤێ زانكۆیێ دانا كو ئه‌ڤرۆ ئه‌م هه‌می لڤێره‌ به‌رهه‌مێ ڤێ زانكۆیێ دبینین كو به‌ری سیھ سالان هاتیه‌ ئاڤاكرن ل دهۆكێ. ده‌ستێت هه‌وه‌ هه‌میا خۆش بن و سه‌ركه‌فتی بن.

ئه‌م گه‌له‌ك دلخۆشين كو ئه‌ڤرۆ پشتى سيهـ سالا، زانكۆيا دهۆكێ د خولا خۆيا بيست و حه‌فتێدا (4,468) ده‌رچوويا ل (19) كۆلێژ و (66) به‌شێت جدا، ده‌رتێخيت. ده‌ستخۆشيێ ل هه‌مى وان دلسۆزا دكه‌م يێت كو هه‌ر ژ ڕۆژا ئێكێ و هه‌تا ئه‌ڤرۆ، ب هه‌ول و مانديبوون و زه‌حمه‌تا خۆ، ئه‌ڤ زانكۆيه‌ گه‌هانديه‌ ڤێ قۆناغێ. پيرۆزباهيێ ل هه‌وه‌ و ل هه‌مى خه‌لكێ به‌هدينا بگشتى دكه‌م.

سيهـ ساله‌ كو زانكۆيا دهۆكێ خزمه‌تا ڤێ ده‌ڤه‌رێ بتايبه‌تى و هه‌رێما كوردستانێ بگشتى دكه‌ت. ژ ده‌ڤه‌رێت دى يێت عێراقێ و ژ وه‌لاتێت جيران ژى، گه‌له‌ك كه‌سا ده‌رفه‌تا هه‌ى و هه‌بووى كو لڤێره‌ خويندنا خۆ بديماهى ببينن. زانكۆيا دهۆكێ ب هزارا كادر و شاره‌زا دگه‌له‌ك واردا، يێت پێشكه‌شى جڤاكێ كرى كو ئه‌ڤرۆ يێ خزمه‌تێ دكه‌ن. لڤێرێ ژى ڕۆلێ بلند یێ مامۆستايێت زانكۆيێ جهێ ڕێز و پێزانينێ يه‌ و ئه‌رك و به‌رپرسياريا وان گه‌له‌ك مه‌زنه‌، جاره‌كا دی ده‌ستێ وان دگڤێشم و پیرۆزباییه‌كان گه‌رم ل وان هه‌میا دكه‌م و سپاسیا وان هه‌میا دكه‌م يێت كو ئه‌ڤرۆ لێره‌.

ئاماده‌بوويێت ڕێزدار..

به‌رى چه‌ند ڕۆژه‌كا ب هه‌لبژارتنا سه‌رۆكێ نوى يێ كۆمارا عێراقا فيدرال ڕێزدار د. عه‌بدولله‌تيف ڕه‌شيد و ب ڕاسپارتنا ڕێزدار محه‌مه‌د شياع ئه‌لسوودانى بۆ پێكئينانا حكوومه‌تا نوى يا فيدرالى، پرۆسا سياسى ل عێراقێ كه‌فته‌ قۆناغه‌كا نوى. ئه‌م جاره‌كا پيرۆزباهيێ ل سه‌رۆك كۆمار و ل سه‌رۆك وه‌زيرێ ڕاسپارتى دكه‌ين، هيڤيا سه‌ركه‌فتنێ بۆ وا دخازين.

دڤێ ده‌ليڤێدا من دڤێت جاره‌كا ته‌ئكيدێ بكه‌م كو هێز و لايه‌نێت سياسى يێت عێراقێ، دڤێت ده‌رس و په‌ندا ژ خه‌له‌تى يێت به‌ری نها وه‌رگرن! بۆ ئارامى و سه‌قامگيرييا سياسى و ئه‌منى و ئابووريا عێراقێ، دڤێت هه‌مى هێز و پێكهاتێت عێراق هاريكار و هه‌ماهه‌نگيێ پێكڤه‌ بكه‌ن و پێكڤه‌ كار بكه‌ن. هيڤيدارين بزووترين ده‌م حكوومه‌تا نوى يا فيدراڵى يا عێراقێ پێك بێت و به‌رسڤا داخازێت ڕه‌وايێت خه‌لكێ عێراقێ بده‌ت.

تڤيا حكوومه‌تا نوى يا عێراقێ، واقعێ عێراقێ وه‌كى خۆ ببينيت و كێشه‌ و ئاريشێت وه‌لاتى چاره‌سه‌ر بكه‌ت. بتايبه‌تى ژى دڤێت كێشه‌ و ئاريشا دگه‌ل حكوومه‌تا هه‌رێما كوردستانێ بێنه‌ چاره‌سه‌ركرن، چونكى ب باوه‌رییا مه‌ كليلا ئارامى و سه‌قامگيريا عێراقێ، چاره‌سه‌ركرنا كێشه‌ و ئاريشايه‌ دگه‌ل هه‌رێما كوردستانێ لسه‌ر بنگه‌ها ده‌ستوورێ فیدرالێ عێراقێ.

ئه‌م هيڤيدارين قۆناغا بێت، قۆناغا چاره‌سه‌ركرنا كێشه‌يێت عێراقێ بيت و ئارامى و سه‌قامگيرييا سياسى بۆ وه‌ڵاتی ڤه‌گه‌ڕيت. بۆ ڤێ چه‌ندێ ژى هه‌رێما كوردستانێ وه‌كى هه‌رجاره‌كا دی، دێ هاريكار و پشته‌ڤان بيت و بۆ هه‌مى چاره‌سه‌ره‌كێ له‌سه‌ر بنه‌مايێ ده‌ستوورێ عێراقێ.

ل دويماهيێ، ئه‌م ئومێده‌وار و پشتڕاستين كو ب هه‌بوونا ڤا گه‌نجێت دلسۆز و وه‌فادار بۆ وه‌لاتێ خۆ، ب وێ زانست و زانينا بده‌ستڤه‌ ئيناى، ب وێ خزمه‌تا كو دێ ژ ئه‌ڤرۆ پێڤه‌ ده‌ستپێكه‌ن، كوردستانه‌كا پێشكه‌فتيتر، ئارام و ته‌ناتر و پاشه‌ڕۆژه‌كا گه‌شتر يا ل هيڤيا كوردستانييا. ئه‌و كوردستانا كو پاشه‌ڕۆژێ ئه‌ڤ گه‌نجه‌ دێ بڕێڤه‌ به‌ن، دێ باشتر و ئاڤه‌دانتر و بهێزتر كه‌ن ب ئانه‌هيا خودێ و ته‌مه‌ندرێژ و سه‌ركه‌فتی بن د ڤێ ڕێكێدا.

ئه‌ڤه‌ ژى پاداشت و خه‌لاتا باب و باپيرێت هه‌وهیه‌، باب و باپێر‌يێت هه‌وه‌ یێت تێكۆشه‌ر‌ كو دوهى هه‌مى ژيانا خۆ د خه‌بات و پێشمه‌رگاتيێدا ده‌رباز كر، ب ماندیبوون و به‌رخودانا خۆ ئه‌ڤ ڕۆژه‌ بۆ مه‌ چێكر دا هوين ئازاد بن و ئه‌ڤرۆ بشێن بخوينن و خۆ پێ بگه‌هينن. ژ وه‌لاتێ خۆ حه‌ز بكه‌ن، ئاڤا بكه‌ن و وڵاتێ خۆ بپارێزن.

ده‌رچوونا هه‌وه‌ و هاتنا قوتابى يێت نوى كو دێ ل ڤێ زانكۆیێ ده‌ستپێكه‌ن، پيرۆز دكه‌م.

هه‌ر هه‌بن، هه‌ر شاد بن و هه‌ر سه‌ركه‌فتى بن.

ده‌مه‌كێ خۆش بۆ هه‌وه‌ هه‌ميا و جاره‌كا دی ئه‌ڤ سه‌ركه‌فتنه‌ ل وه‌ هه‌میا پیرۆز بیت و كوردستان ژی ئاڤه‌دان بیت.

بخێر بێن سه‌ر چاڤا.

Top