پاڕاستنی ئه‌مانه‌تى پرۆسه‌ی تاقیكردنه‌وه‌كان

پاڕاستنی ئه‌مانه‌تى پرۆسه‌ی تاقیكردنه‌وه‌كان



سه‌رۆكى شازده‌هه‌می ویلایه‌ته‌یه‌كگرتووه‌كانى ئه‌مریكا (ئیبراهام لنكولن) ده‌لێ" ناتوانی له‌ به‌رپرسیاریه‌تى سبه‌ى ڕابكه‌ى، به‌ ڕاكردنت له‌به‌ر به‌رپرسیاریه‌تى ئه‌مڕۆ".
تاقیكردنه‌وه‌كانی وه‌زاریی پۆلی دوازده‌ی ئاماده‌یی به‌ هه‌موو به‌شه‌كانیه‌وه‌، تاقیكردنه‌وه‌ی دیارى كردنى پاشه‌ڕۆژ و چاره‌نووسازه‌ بۆ قوتابی، پێویسته‌ به‌وپه‌ڕى گرنگى و بایه‌خه‌وه‌ ته‌ماشای ئه‌و تاقیكردنه‌وانه‌ بكرێ و هه‌وڵى سه‌رخستنی به‌ مسۆگه‌ری بۆ بدرێ له‌ هه‌موو ڕوویه‌كه‌وه‌، له‌لایه‌ن دام و ده‌زگاكانی به‌رپرسیار له‌و جۆره‌ پرۆسانه‌.
ئاشكرایه‌ سه‌ره‌تا له‌لایه‌ن به‌رێوه‌به‌رایه‌تى په‌روه‌رده‌ى قه‌زاكان و لیژنه‌كانی ئه‌زموونی لقی په‌روه‌رده‌کان هۆڵ و قوتابخانه‌كان ده‌ست نیشان ده‌كرێن و دیراسه‌ى ووردیان بۆ ده‌كرێت له‌ هه‌موو ڕوویه‌كه‌وه‌ تا چه‌ند ده‌شێن بۆ ئه‌نجام دانى ئه‌زموونه‌كان. دواتر پێداویسته‌كانیان بۆ دابین ده‌كرێ له‌ ڕووى كاره‌با و فێنك كه‌ره‌وه‌ و كورسی دانیشتن و .... تا دوایی.
واته‌ لیژنه‌ى ئه‌زموونی په‌روه‌رده‌ى قه‌زا هۆڵه‌كان و قوتابخانه‌كان ده‌ستنیشان ده‌كات و دیارییان ده‌كات و گرنگه‌ به‌رێوه‌به‌رى په‌روه‌رده‌ كه‌ سه‌رۆكی لیژنه‌ى ئه‌زموونی په‌روه‌رده‌ی قه‌زایه‌ زانیاری وورد و ته‌واوی هه‌بێت له‌ سه‌ر سه‌رجه‌م هۆڵه‌كان ته‌نها له‌ سه‌ر كاغه‌ز نه‌بێت،بەڵکو پێویسته‌ هۆڵه‌كان ببینرێن و كه‌م و كورییه‌كان ده‌ستنیشان بكرێن و گه‌رما و گه‌رم چاره‌سه‌ر بكرێن، چونكه‌ ئه‌وه‌ ته‌نها تاقیكرنه‌وه‌یه‌ك نییه‌ بۆ بڕینى قوناغێك له‌ قۆناغه‌كانى خوێندن، به‌ڵكو چنینه‌وه‌ی ڕه‌نج و ماندووبوونى دوازده‌ ساڵى خوێندن و شه‌ونخونی و هاوكات دیارى كردنى پاشه‌ ڕۆژ و چاره‌نووسی كه‌سه‌كانه‌.
بۆیه‌ هه‌موو هه‌وڵ و ماندوو بوونێك به‌فیڕۆ ناچێ و به‌ڵكو ویژدان ئاسوده‌ و حه‌ساوه‌ ده‌كات، جگه‌ له‌مه‌ش له‌ ئه‌ركه‌ ساده‌ و سه‌ره‌تاكانى به‌رپرسیاریه‌تى ده‌ژمێردرێت. بۆیه‌ پێویسته‌ هۆڵه‌كان شیاو گونجاو بن له‌ هه‌موو ڕوویه‌كه‌وه‌، له‌گه‌ڵ دابین سه‌رجه‌م پێداویستییه‌كانى تاقیكردنه‌وه‌كان پێش هه‌فته‌یه‌ك، ده‌بێ هه‌موو قوتابخانه‌كان و هۆڵه‌كان مایه‌ى ئارامی و ئاسوده‌یی بن بۆ قوتابییان تا بتوانن به‌ ووردی ئه‌وه‌ى خوێندوویانه‌ دوور له‌ هه‌موو كه‌م و كوریه‌ك (ئه‌گه‌ر هه‌بێت) بینوسن و وه‌ڵامى پرسیاره‌كان بده‌نه‌وه‌.
دواتریش هه‌ڵبژاردنى به‌رێوه‌به‌رى هۆڵ و یاریده‌ده‌ر و مامۆستاكان زۆر گرنگه‌ ناكرێ و نابێ ته‌نها بیر له‌ دانانى به‌رێوه‌به‌رى هۆڵ بكرێته‌وه‌ به‌ هه‌ر هۆكارێك بێت ته‌نها بۆشاییه‌كان پڕ بكرێته‌وه‌، چونكه‌ پاڕاستنی ئه‌مانه‌تى ئه‌و پرۆسه‌یه‌ له‌ ئه‌ستۆی به‌رپرسیاریه‌تى به‌رێوه‌به‌رى ویژدان زیندوو و بوێر و په‌روه‌رده‌ییه‌ تا بتوانێ دادپه‌روه‌ری له‌ ناو هۆڵه‌كه‌ ده‌سته‌به‌ربكات و یاریده‌ده‌ر و چاودێره‌كانیش ده‌ست باری ئه‌و پرۆسه‌یه‌ى له‌گه‌ڵ بگرن و شانی بده‌نه‌ به‌ر و ویژدانیان ئاسوده‌ و ئارام بێت، چونكه‌ ئه‌وه‌ په‌یوه‌سته‌ به‌ چاره‌نووسی ده‌یان هه‌زار قوتابی له‌ هه‌رێمى كوردستان ، هه‌موومان ده‌زانین هه‌ر شتێ بۆ ئه‌ورۆ نهێنى بێ، بۆ سبه‌ى ئاشكرایه‌.
له‌ بیرمان نه‌چێ گه‌ر هه‌ر كه‌م و كوریه‌ك خوا نه‌خواسته‌ ڕووبدات كاریگه‌رى ڕاسته‌وخۆى له‌ سه‌ر سه‌رجه‌م قوتابیان ده‌بێت، چونكه‌ پرۆسه‌كه‌ پرۆسه‌یه‌كی گشتگیره‌ و په‌یوه‌ندیدار نییه‌ به‌ چه‌ند كه‌سێك.
جودا له‌ لیژنه‌ى ئه‌زموونی په‌روه‌رده‌ى قه‌زا، پێویسته‌ لیژنه‌ى ئه‌زموونی په‌روه‌رده‌ى گشتیی و لیژنه‌ى ئه‌زموونی باڵاش له‌ وه‌زاره‌ت به‌ هه‌مان شێوه‌ پێویسته‌ به‌دواداچوونى به‌رده‌وامیان هه‌بێت له‌ سه‌ر هۆڵه‌كان، ده‌كرێ له‌ لیژنه‌ى باڵای ئەزموونەکان و لیژنه‌ى پارێزگاكان ژووری چاودێری و به‌دوا داچوون هه‌بێت و چه‌ند ژماره‌ى مۆبایل ته‌رخان بكرێ و تۆمار بكرێن بۆ چۆنیه‌تى چاودێری كردنى به‌رێوه‌چوونى پرۆسه‌كه‌ له‌ سه‌ر ئاستى هه‌رێم و پارێزگا و قه‌زاكان و وه‌ڵام دانه‌وه‌ى هاووڵاتیان و ڕه‌تكردنه‌وه‌ى هه‌ر پڕوپاگنده‌یه‌ك لێره‌و له‌وێ و لێپرسینه‌وه‌ له‌كه‌م و كورییه‌كان بۆ ئه‌وه‌ى پرۆسه‌كه‌ به‌وپه‌رى پاكی و ئه‌مانه‌تى و دادپه‌روه‌رییه‌وه‌ به‌رێوه‌بچێت، چونكه‌ له‌ كۆتاییدا هه‌موو ئه‌وانه‌ى تاقیكردنه‌وه‌كان ئه‌نجام ده‌ده‌ن كوڕ و كچی ئێمه‌ن و به‌حه‌ز و تاسه‌وه‌ چاویان بڕیوه‌ته‌ پاشه‌ڕۆژ و ده‌یانه‌وێ به‌ حه‌ق ماف و ماندووبوونى خۆیان به‌ ده‌ست بهێنن و ئێمه‌ چ وه‌كو تاك یان كۆمه‌ڵگه‌ به‌ پاڵپشتى خواى گه‌وره‌ هاوكار و یارمه‌تیده‌ریان ده‌بین تا به‌ ئامانجى خۆیان دەگه‌ن.
به‌رێوه‌به‌رى گشتى/ وه‌زاره‌تى په‌روه‌رده‌
ماسته‌ر له‌ كارگێڕى په‌روه‌رده‌یی

Top