مەسعود حەیدەر ڕاوێژكاری سەرۆك بارزانی بۆ گوڵان: كاراكتەری ئیقلیمی و نێودەوڵەتی كاریگەریی توندی لەسەر پرۆسەی سیاسیی عێراق و پێكهێنانی حكومەت هەیە
سەرهەڵدانی خۆپیشاندانەكان لە بەغدا و چەند شارێكی دیكەی عێراق و ئایندەی پرۆسەی سیاسیی عێراق لە ژێر گوشار و كاریگەریی دەستتێوەردانی ئیقلیمی و ئەگەرەكانی چارەسەركردنی ئەم چەقبەستووییە و بێبەشكردنی خەڵكی هەرێمی كوردستان لەو 40 تریلیۆن دینارەی كە بۆ پاڵپشتیی ئاسایشی خۆراكی لە شارەكانی ناوەڕاست و خوارووی عێراق تەرخان كرابوو؛ تەوەرەی سەرەكیی گفتوگۆكانی گۆڤاری گوڵان بوون لەگەڵ مەسعود حەیدەر ڕاوێژكاری سەرۆك بارزانی. لێرەدا پوختەی قسەكانی بڵاو دەكەینەوە.
* سەرهەڵدانەوەی خۆپیشاندانەكان لە بەغدا و چەند شارێكی دیكەی عێراق وەك گوشار بۆ پێكهێنانی حكومەتی داهاتووی عێراق كاریگەرییەكی ئەوتۆی لە هەڵوێستی « ئیتار و تەیار» نەكردووە و، هەردوولا پابەندن بە حكومەتی «زۆرینە و تەوافقی». خوێندنەوەتان بۆ ئەم خۆپیشاندانە تازانەی بەغدا و شارەكانی دیكەی عێراق چییە؟
- لە خۆپیشاندانەكانی تشرینی 2020ـەوە بارودۆخی سیاسیی عێراق ناسەقامگیرە و قوربانییەكی زۆری لێ كەوتووەتەوە. هەموو ئەو هۆكارانەی بووە هۆی سەرهەڵدانی ئەم ناڕەزایەتی و خۆپیشاندانانە كە تا ئێستاش بێ چارەسەر ماوەتەوە و بگرە دۆخەكە زۆر خراپتریش بووە و بەرەو خراپتریش دەڕوات. ئەوەتا تادێت ناڕەزایەتییەكان فراوانتر دەبن و خزمەتگوزارییەكان و بارودۆخی بژێوی ژیانی خەڵكی عێراق خراپتر دەبێت، هەموو ئەم هۆكارانە بوو كە وای كرد ڕێژەی بەشداربووانی خەڵكی لە هەڵبژاردنی مانگی 2ی 2021 زۆر كەم بێت و خەڵكێكی زۆر نەچوونە سەر سندوقەكانی دەنگدان، هاوكات ئەو حزبانەی كە نەیانتوانیوە دەنگی پێویست بەدەست بهێنن، ئەنجامی هەڵبژاردنەكانیان پێ قبووڵ نییە و ئەوەتا ڕازی نین بەوەی حكومەتی زۆرینە دروست بكرێت و ئۆپۆزسیۆن بن. هەركەسەو دەیەوێت پێگەی سیاسی و سەربازی و ئەمنی و ئابووریی خۆی بپارێزێت و پێگەی خۆیان لەناو دەوڵەتدا بە پارێزگاری بمێنێتەوە، فشار و پاڵەپەستۆ و دەستتێوەدرانە سیاسییە ئیقلیمییەكانیش ئەوەندەی دی ڕێگرە لەوەی حكومەت لە دەرەوەی ویست و ئیرادەی ئەوان دروست بێت، ئەمەش دۆخەكە بەرەو ئاڵۆزتر و خراپتر دەبات و، ڕەنگە داڕمانی سیاسی لە عێراق دروست بكات، چونكە بارودۆخی هاووڵاتیانی عێراق لە باشوور و ناوەڕاستی عێراق لە واقیعێكی تاڵ و ناخۆشدان و تادێت دەنگی ناڕەزایەتییان زیاتر دەبێت.
* لە دوای 6ی نیسان تەوقیتاتی دەستووری بۆ هەڵبژاردنی سەرۆك كۆمار و ڕاسپاردنی سەرۆك وەزیران بۆ پكهێنانی حكومەتی داهاتووی عێراق كۆتایی هات و، فایەق زیدان سەرۆكی ئەنجومەنی باڵای دادوەریی عێراق وتارێكی سەبارەت بە چەمكی « حكومەتی تەواری» بڵاو كردەوە، ئایا ئەمانە ئاماژە نین بۆ ئەوەی عێراق كەوتووەتە ناو بۆشایی دەستووری و دەبێت بیر لە چارەسەرێكی دیكە بكرێتەوە، لە ناویاندا «حكومەتی تەواری»؟
- هەرچەندە من لەگەڵ ڕاوبۆچوونی فایەق زیدان سەرۆكی ئەنجومەنی باڵای دادوەریی عێراقدا نیم و ڕاوبۆچوونم جیاوازە، بەوەی موشەریعی دەستووری و هەموو ئەوانەی دەستووری عێراقیان نووسیوەتەوە بەتایبەتی كورد و شیعە بە هەموو شێوەیەك ڕێگرییان كردووە لە دروستكردنی «حكومەتی تەواری» كە حكومەتێكی عەسكەرتاریەت دەبێت و، هەموو دەسەڵاتێكی ڕەهای دەبێت و پەرلەمان ڕۆڵی نامێنێت، بۆیە كورد و شیعە لە دوای 2003 نایانەوێت جارێكی دیكە ئەزموونی حزبی بەعس و حكومەتی ڕەها و تاكەكەسی دروست بكرێتەوە، لە دەستووریشدا بە هیچ شێوەیەك ڕێگا بەمە نەدراوە، ئەوەی هەیە حكومەتی بەڕێوەبردنی كاروباری ڕۆژانەیە، تەنانەت حكومەتی كاربەڕێكەریش لە دەستووری عێراقدا بوونی نییە.
* وەك سەرنج دەدرێت لایەنەكانی تەیاری هەماهەنگیی شیعە سەركەوتوو نەبوون بۆ دروستكردنی هاوپەیمانییەكی بەدیل بۆ هاوپەیمانیی سێ قۆڵی (سەدر و پارتی و سیادە)و تا ئێستا وەك ئەوەی بڕیار بوو، نەیانتوانیوە لە دەرەوەی «سێ یەكی پەكخراو» هاوپەیمانەكەیان فراوان بكەن و بەرەو كوتلەی گەورە هەنگاو هەڵبگرن. ئایا ئەمە مانای ئەوە نییە كە پرۆسەی سیاسیی عێراق لە دۆخی ڕاهێنی خۆی دەمێنێتەوە؟
- تەیاری هەماهەنگیی شیعە توانییان ڕێگر بن بەوەی دوو لەسەر سێی پەرلەمانتاران ئامادە نەبن، ئەوەی پێی دەوترێت «سێ یەكی پەكخراو»، ئیتر لەژێر فشار و بە هەر ئامرازێك بێت، ئەوان سێ یەكی پەكخراویان زامن كردووە و پرۆسەی سیاسییان لە عێراقدا پەك خستووە. ئەوەی دەمێنێتەوە سەر حزبەكان بۆ نموونە بەرەی ئینقازی وەتەن كە پارتی و سەدر و سوننەكانن، (تەنیا باسی ئەو بەرەیە ناكەم، باسی بەرەی دیكە و لایەنە سیاسییەكانی دیكەش دەكەم)، بەوەی ئایا بەردەوامبوونی بارودۆخی عێراق بەم شێوازە لە بەرژەوەندیی كێیە و كێ زۆر زیانمەند دەبێت؟ لە هەموو حاڵەتێكدا پێویستە چارەسەرێكی بۆ بدۆزرێتەوە. ئاشكرایە هەموو هاوكێشەكان تەنیا پەیوەست نییە بە نێوخۆی عێراقەوە، بەڵكو بەشێكی زۆری بە هاوكێشەی ئیقلیمی و نێودەوڵەتییەوە بەستراوەتەوە، بەتایبەتی بەستراوەتەوە بەو ململانێ سیاسییانەی كە وڵاتان بۆ باڵادەستیی نفووز و پێگەی خۆیان لە عێراقدا دەیكەن و، هەر كاتێك لێكتێگەیشتنی ئیقلیمی و نێودەوڵەتی هەبوو، ئەو كات لێكتێگەیشتنیش لە نێوان حزبەكاندا لە نێوخۆی عێراقدا ئاسانتر دەبێت.
* چەند لایەنێكی سیاسی دەستپێشخەریان پێشكەش كردووە بۆ ئەوەی بتوانن دەرچەیەك بۆ ئەم چەقبەستووییەی پرۆسەی سیاسیی عێراق بكەنەوە، هەموو لایەكیش چاوەڕێی دەستپێشخەرییەكی تازەی سەرۆك بارزانی دەكەن. ئایا لەم قۆناخە چەقبەستووەدا مەزندە دەكرێت سەرۆك بارزانی دەستپێشخەریەكی هەبێت و هەموو لایەنە عێراقییەكان پێكەوە كۆبكاتەوە؟
- دەستپێشخەریی كاتێك دەكرێت كە دەرئەنجامەكەی دیار بێت و، پێش ئەوەی هەر دەستپێشخەرییەك بكرێت لەلایەن سەرۆك بارزانی، یان هەر كەسایەتی و سەركردەی بەناوبانگی نێو پرۆسەی سیاسیی عێراقەوە، دەبێت زەمینەیەك لەبار بێت و ئەنجامی دەستپێشخەرییەكە دیار بێت و، هەر هیچ نەبێت وڵاتانی ئیقلیمی ڕاوبۆچوونیان هەبێت، نەك وەكو ئێستا وڵاتانی ئیقلیمی دەستتێوەردانی ڕاستەوخۆیان لە ناو كاروباری عێراق و لە بارودۆخی سیاسی و پێكهێنانی حكومەتی عێراقدا هەیە. هەمووان بە ئاراستەی بەرژەوەندی و بەهێزكردنی نفووزی خۆیان بۆچوون و هەڵسوكەوت دەكەن، بۆیە هەر دەستپێشخەرییەكیش هەبێت و ئەو وڵاتە ئیقلیمی و نێودەوڵەتییانە پێشوازی لێ نەكەن، ئەوا بە تەئكید سەركەوتن بە دەست ناهێنێت. لە هەموو حاڵەتێكدا بەردەوامبوونی بارودوخەكە بەم شێوازەی ئێستا هەموو پێكهاتەكانی عێراق تێیدا زیانمەند دەبن. ئێمەش وەكو كورد پێویستیمان بەوە هەیە جەخت لەسەر ئەوە بكەینەوە كە بە زووترین كات ڕێز لە ئەنجامی هەڵبژاردنەكان بگیردرێت و حكومەتی عێراق وەكو ئەوەی لە دەستووردا ئاماژەی پێ كراوە، سەرۆك كۆمار و سەرۆكی ئەنجومەنی وەزیران دەستنیشان بكرێت و بە زووترین كات حكومەت پێك بهێندرێت، لە بەر ئەوەی بارودۆخی عێراق بە هۆی هەڵكشانی بەهای نەوتەوە زۆر باشە و بووەتە خاوەنی داهاتێكی بەرز و دەكرێت لە خزمەتی هەموو گەلانی عێراق بەكار بهێنرێت، بەتایبەتی لە ئێستادا كە ئاراستەی حكومەتی هەرێمی كوردستان بەرەو چارەسەری هەموو كێشەكانی نێوان هەرێم و عێراق لەسەر بنەمای دەستوور دەچێت، ئێمەش لە ڕوانگەی بەرژەوەندییەكانی خەڵكی كوردستان و كۆتاییهاتن بە هەموو كێشە و ئاستەنگەكانی نێوانمان كار دەكەین و، ئەمەش تەنیا بە پێكهێنانی حكومەتی نوێی عێراق جێبەجێ دەكرێت، بۆیە جەخت لەسەر زوو پێكهێنانی حكومەتی نوێی عێراق دەكەینەوە.
* شاندێكی حكومەتی هەرێمی كوردستان بۆ كۆبوونەوە لەسەر پرسی نەوت و گاز سەردانی وەزارەتی نەوتی عێراقی كرد، بە نیازن پێكەوە بە دیالۆگ ئەو ئیشكالیەتە چارەسەر بكەن كە بڕیاری دادگای فیدڕاڵی سەبارەت بە نەوت و گازی كوردستان دروستی كردووە و، هەست دەكرێت ئاكامی ئەو كۆبوونەوەیە ئەرێنییە لە بەر ئەوەی بڕیارە كۆبوونەوەی دیكەش ئەنجام بدەن، ئایا بە دیالۆگ حكومەتی هەرێم و حكومەتی ناوەندی دەگەنە ڕێككەوتن؟
- هەموو كێشە و گرفتەكانی نێوان حكومەتی هەرێمی كوردستان و عێراق دەكرێت لەسەر بنەمای دەستوور و دیالۆگ چارەسەر بێت، بەردەوام جەختمان لەسەر ئەوە كردووە كە دەبێت دەستوور بكرێتە بنەما بۆ چارەسەركردنی هەر كێشەیەك. ئەوەی لە دادگای باڵای عێراق ڕووی دا لەسەر نەوت و گازی كوردستان، پێچەوانەی ئەمە بوو، بڕیارێكی نادەستووری لەسەر دۆسێیەكی گرنگ و هەستیار درا و هەموو شارەزایانی دەستوور و سیاسییەكانی عێراق بەدەر لە پێكهاتەی كوردیش جەختیان لەسەر نادەستووریبوونی ئەو بڕیارەی دادگای باڵای عێراق كردەوە و ئەو بڕیارە پێویستی بە هەمواركردنەوە و چاككردن هەیە. نەوتی كوردستان دۆسێیەكی سیاسی و دەستوورییە و دەبێت زۆر بە هەستیارییەوە مامەڵەی لەگەڵ بكرێت و ناكرێت بە مەركەزییەت مامەڵەی لەگەڵدا بكرێت، هەروەكو چۆن دیدگای كورد بە گشتی و حكومەتی هەرێمی كوردستانیش لە نووسینەوەی دەستوورەوە ڕوون و ئاشكرایە، بەوەی سەركردەكانی كورد تەنانەت ئەوانەی ئێستا لە ژیانیشدا نەماون، تەئكیدیان لەسەر ئەو مافەی كورد كردووەتەوە، بەوەی دەستوور زۆر بە ڕوونی و ئاشكرا ئاماژەی بە دەستوورییەتی مامەڵەكردنی حكومەتی هەرێمی كوردستان كردووە لە سامانی سەر زەوی و ژێر زەوی و تەنانەت نەوت و گازیش، ناكرێت بە بڕیارێكی سیاسی و لە ژێر فشار و ئەجندەی دوور لە دەستووری بڕیارێكی لەم شێوەیە دەربچێت و جێبەجێ بكرێت، چونكە بڕیارەكەی دادگای فیدڕاڵی لەسەر دۆسێی نەوت وەرەقەیەكی فشار بوو لەسەر هەرێمی كوردستان و بەتایبەتی لەسەر پارتی دیموكراتی كوردستان بۆ ئەوەی هەڵوێستی خۆی لە ناو چوارچێوەی هاوكێشە سیاسییەكانی عێراقدا بگۆڕێت.
* ئەوەی لە بۆچوونەكانی حكومەتی هەرێمی كوردستان سەبارەت بە چارەسەری ئەو كێشەیە دەخوێندرێتەوە، ئەوەیە كە حكومەتی هەرێم جەخت لەسەر ئەوە دەكاتەوە، دەرچوواندنی یاسای نەوت و گازی حكومەتی فیدڕاڵی، دەبێتە دەروازەیەك بۆ چارەسەركردنی ئیشكالیەتی پرۆسەی نەوت و گاز لە نێوان هەرێم و بەغدا، وەك پەرلەمانتارێكی پێشووی عێراق و خاوەن ئەزموونێك پێت وایە لە ئێستادا پەرلەمانی عێراق بتوانێت زەمینە بۆ دەركردنی یاسای نەوت و گازی فیدڕاڵی فەراهەم بكات؟
- ئەگەر بگەڕێینەوە سەر ئەو ڕەشنووسەی لە2007دا سەرۆك بارزانی و خوا لێی خۆش بێت مام جەلال لەگەڵ نووری مالیكی ڕێككەوتنیان لەسەر كردبوو، حكومەتی هەرێمی كوردستانیش ڕەزامەند بوو لەسەر ڕێككەوتنەكە، ئەوا دەكرێت لە ماوەیەكی زۆر كورتدا ئەو بابەتە چارەسەر بكرێت و كێشەكە كۆتایی پێ بهێنرێت، بەداخەوە بەشێكی ئەم كێشەیە بۆ ئەوە دەگەڕێتەوە متمانە زۆر لاوازە و بەشێكی دیكەشی پەیوەندی بەوەوە هەیە، عێراق بەپێی بەرژەوەندییەكانی خۆی لە بەغدا لەگەڵ دەستوور مامەڵە دەكات، لەكاتێكدا بە هیچ شێوەیەك لە دەستووردا ئیشكالیات نییە لەسەر نەوت و گازی كوردستان و ماددەی 111 و 112 زۆر ڕوون و ئاشكرایە. هەموو ئەم كێشانەی لە نێوان هەرێم و بەغدا دروست دەبێت و ناوبەناو ئاڵۆز دەكرێت، پەیوەندی بەوەوە هەیە، بەشێك لە پێكهاتەی شیعە لە بونیاتنانی دەوڵەتی فیدڕاڵی پاشگەز بوونەتەوە و مەرام و پلان و كارەكانیان بەو ئاراستەیە دەڕوات، دەوڵەتێكی مەركەزیی تاكڕەو دروست بكەن و، ئەزموونی 100 ساڵی ڕابردووی ئیدارەدانی دەوڵەتی عێراق دووبارە بكەنەوە، ئەمجارە بە دیوی حوكمڕانیی شیعەدا، نەوەكو حوكمڕانی سوننە، ئەمەش بە هیچ شێوەیەك لەلایەن كوردەوە قبووڵكراو نییە و، بەردەوام تەئكید دەكەینەوە، پێویستە دەستوور بنەمای مامەڵەكردن بێت و ڕێزی لێ بگیردرێت و هەموو ماددەكانی ناو دەستوور پێكەوە جێبەجێ بكرێن، نە وەكو ئێستا ماددەیەك بە سەقەتی و بەتێچوون و تێگەیشتنی ئەوان جێبەجێ بكرێت و، بیست ماددەی دیكە هەر جێبەجێ نەكرێت. تاوەكو بڕیارێكی سیاسی عێراقیی ڕوون و ئاشكرا نەدرێت بۆ چارەسەركردنی هەموو ئەم كێشانە، ئەوا چارەسەری ئەم كێشانە زۆر زەحمەت و قورس دەبن، ئەمەش بەستراوەتەوە بە وڵاتانی ئیقلیمییەوە كە تاوەكو ئەو وڵاتانە كۆنتڕۆڵی بڕیاری سیاسی بەغدایان قۆرخ كردبێت، چارەسەركردنی ئەم كێشانە لەناو چوارچێوەی عێراقدا ئاسان نابێت.
* پەرلەمانی عێراق بڕی 40 ترلیۆن دیناری بۆ پشتگیریی هاووڵاتیان تەرخان كردووە بۆ ئەوەی گرانیی بازاڕ كار لە ژیانی ڕۆژانەیان نەكات، بەڵام لەو پارە زۆرە پشكی هەرێمی كوردستان دیاری نەكراوە. وا بڕیارە شاندێكی حكومەتی هەرێمی كوردستان سەردانی بەغدا بكات و لەگەڵ سەرۆكی حكومەتی عێراق و لایەنە پەیوەندیدارەكان كۆببێتەوە. پرسیاری ئێمە ئەوەیە لە كاتێكدا حكومەتی عێراق بودجەی بۆ ئەمساڵ « 2022» نییە، ئایا ئەم یاسایە جێگەی یاسای بودجەی 2022 ناگرێتەوە؟ بۆچی لەم یاسا گرنگەدا پشكی هەرێمی كوردستان دیاری نەكراوە؟
- پرسیارەكەتان چەند تەوەرەیەك لەخۆ دەگرێت. سەرەتا ئەم یاسایەی كە پێی دەوترێت «یاسای ئاسایشی خۆراكی»، بە هیچ شێوەیەك یاسای ئاسایشی خۆراكی نییە، بەڵكو بودجەیەكی نایاساییە و لە دەسەڵاتی حكومەتی ئێستای عێراقدا نییە یاسای لەم جۆرە بنێرێت بۆ پەرلەمان، بە هیچ شێوەیەك هیچ پاساوێك نییە بۆ حكومەتی كاربەڕێوەبردنی ڕۆژانە یاسایەكی لەم بابەتە بنێرێت كە 40 تریلیۆن دینار لەخۆ دەگرێت، لەم بڕە پارەیەش 10 تریلیۆن دیناری تەرخان كراوە بۆ پرۆژەكان كە هیچ پەیوەندیی بە ئاسایشی خۆراكەوە نییە و لە سەرووی پێنج تریلیۆن دینار بۆ وەزارەتی نەوت تەرخان كراوە. بەم شێوەیە جگە لەوەی یاسای ئاسایشی خۆراكی نایاساییە و سەرپێچی زۆریشی تێدا كراوە، بەتایبەتی لەسەر مافی هەرێمی كوردستان، لە كاتێكدا كە لە ئەنجومەنی وەزیرانەوە نێردراوە جارێ لە 65%ی ئەو 40 تریلیۆن دینارە تەرخان كراوە بۆ ئەو پارێزگایانەی لە دەرەوەی هەرێمی كوردستانە و پشكی هەرێمی كوردستان بڕە پارەیەكی زۆر زۆر كەمە، پێویستە فراكسیۆنە كوردستانییەكان لەسەر ئەم بابەتە هەڵوێستی ڕوونیان هەبێت و، دەبێت وەكو هاوپەیمانی سێ قۆڵییش وەرەقەیەكی هاوبەش هەبێت لەسەر زامنكردنی ماف و پشكی هەرێمی كوردستان، چونكە خەڵكی هەرێمی كوردستانیش بەشێكن لەگەلانی عێراق و لە چوارچێوەی دەستووریشدا هەرێمێكین لەناو ئەم دەوڵەتەدا و ناكرێت بۆ پڕۆژەكانی پارێزگاكانی دیكەی عێراقدا پارە تەرخان بكرێت و كەچی دینارێك بۆ هەرێمی كوردستان تەرخان نەكرێت.
* ئایا ئەم یاسا تازەیەی پەرلەمانی عێراق كە پشكی كوردستانی تێدا دیاری نەكراوە، كاریگەریی لەسەر ئەو ڕێككەوتنە دەبێت كە مانگانە 200 ملیار دینارەكە بۆ هەرێمی كوردستان بنێرن؟
- بەپێی ڕەشنووسەكەی حكومەت دەبێت كاریگەریی یاسای ئاسایشی خۆراكی لەسەر ناردنی ئەو 200 ملیار دینارەی عێراق نەبێت، كە مانگانە دەبێت بینێرێت بۆ هەرێمی كوردستان، دەبێت 1 لەسەر 12 ی بودجەی ساڵی 2021ی عێراق هەر خەرج بكرێت وەكو لە یاسای ئیدارەی دارایی هاتووە. من خوێندنەوەم وایە ئامانج لەم یاسای ئاسایشی خۆراكە و تەرخانكردنی 40 تریلیۆن دینار، خۆئامادەكردنی ئەگەری دانەمەزراندنی حكومەتی نوێی عێراقە، بە هۆی ئەو ململانێ توندانەوە تاوەكو ئەم حكومەتەی ئێستا بەردەوام بێت و دەستكراوە بێت بۆ ئەوەی بتوانێت پارە خەرج بكات بۆ پڕۆژەكان لە ناوچەكانی پارێزگاكانی عێراق لە دەرەوەی هەرێمی كوردستان و ئەمەش ناهەقییەكە بەرامبەر خەڵكی هەرێمی كوردستان.
* ئەگەر هەردوو لایەنی «سەدر و ئیتاری تەنسیقی شیعە» نەگەنە هیچ ڕێككەوتنێك، ئایا پرۆسەی سیاسیی عێراق بەرەو چ ئاراستەیەك دەچێت؟
- پرۆسەی سیاسیی عێراق پەك خراوە، هەر چەندە ئەگەری چەند سیناریۆ هەیە، لەوانە ئەم حكومەتە هەر بەم شێوەیەی ئێستا بەردەوام بێت، ئەگەری دیكە هەیە، فێڵێكی دەستووری و واقیع حاڵێك دروست بكەن، جارێكی دیكە تەكلیف لە سەرۆك وەزیران بكرێت و كۆمەڵێك وەزیر دیاری بكرێت و كابینەیەكی دیكە بە هەر شێوەیەك بێت، دابمەزرێت. بە شێوەیەكی گشتی لەم عێراقەدا هەموو ئەگەر و سیناریۆیەك هەیە، بەتایبەتی لەبەر ئەوەی ئێران ڕۆڵێكی فراوان و گەورەی هەیە لە ناو پرۆسەی سیاسیی عێراق و وا بە ئاسانی ڕێگا نادات پرۆسە سیاسییەكەی عێراق بەدڵی ئەو نەبێت.
