چۆنیه‌تى په‌ره‌پێدانى فێركردن له‌ قوتابخانه‌كان

چۆنیه‌تى په‌ره‌پێدانى فێركردن له‌ قوتابخانه‌كان




ئه‌حمه‌د ئه‌لشقیری راگه‌یاندكاری سعودی ده‌لێ" به‌رێوه‌به‌رى قوتابخانه‌ له‌ ژاپۆن زووتر له‌ قوتابییه‌كانیان نان ده‌خوات به‌ نیو كاتژمێر له‌ چێشتخانه‌ى قوتابخانه‌ بۆ دڵنیابوونى له‌ خواردنه‌كه‌ كه‌ ته‌ندروسته‌ و نه‌خۆشیان ناخات".
گه‌ر بمانه‌وێ هه‌ر پێشكه‌وتن و هه‌ستانه‌وه‌ و بۆژانه‌وه‌یه‌ك به‌ جۆره‌ها رێگا ده‌سته‌به‌ر بكه‌ین و به‌ ده‌ستى بهێنین ئه‌وا ده‌بێ بیر بكه‌ینه‌وه‌ و هه‌وڵ بده‌ین چۆن فێركردن له‌ قوتابخانه‌كان په‌ره‌ى پێ بده‌ین و قوتابخانه‌ چۆن گه‌شه‌ى پێ بده‌ین، چونكه‌ هه‌ست به‌وه‌ ده‌كه‌ین كه‌وا هه‌ر هه‌ستانه‌وه‌ و گه‌شانه‌وه‌ و بوژانه‌وه‌یه‌ك به‌ ڕاست و دروستى گه‌ر بمانه‌وێ ئه‌وا ده‌بێ له‌ پرۆسه‌ى په‌روه‌رده‌ و فێركردن له‌ قوتابخانه‌كان ده‌ست پێ بكه‌ین، گومان له‌وه‌ دانییه‌ قوتابخانه‌ خاڵى هه‌ره‌ پێشه‌وه‌ى كۆى پرۆسه‌ كه‌ یه‌ و له‌ قوتابی و مامۆستا و كارگێڕى قوتابخانه‌كان پێك دێت.
بۆیه‌ ده‌بێ گرنگى و بایه‌خی زۆر به‌ قوتابخانه‌كان بده‌ین و، ژینگه‌یه‌كى له‌ بارو ڕه‌خساو و گه‌نجاو و ته‌باو هاریكار دروست بكه‌ین له‌ نێوان سه‌رجه‌م پێكهاته‌كانى قوتابخانه‌. گرنگه‌ قوتابییه‌كانمان ڕابهێنین چۆن په‌ره‌ به‌ بیركردنه‌وه‌یان بده‌ن و رێگاكانى فێركردن و فێربوون تاقی بكه‌نه‌وه‌، هه‌ر ته‌نها خه‌ریكی په‌رتووكی قوتابخانه‌ نه‌بن، به‌ڵكو فێر بكرێن چۆن به‌دوای زانست و زانیاری جۆراوجۆر ده‌گه‌رێن له‌ سه‌رچاوه‌ باوه‌ڕپێكراوه‌كان له‌ پێگه‌كانى ئه‌نته‌رنێت له‌ گۆڤار و رۆژنامه‌ و په‌رتووك و سه‌رچاوه‌كانى په‌رتووكخانه‌كان ، یانیش له‌ ئه‌نجامى چاوپێكه‌وتن له‌گه‌ڵ كه‌سانى دیار و ناسراو و خاوه‌ن ئه‌زموون و شاره‌زا، بێَگومان ئه‌و گه‌ڕان و خۆماندوو كردنه‌ وا له‌ قوتابی ده‌كات كارامه‌یی گه‌رٍانی به‌ دواى زانست لا دروست بێت و خولیای ده‌بێت و ده‌رئه‌نجامیش ده‌بێته‌ كارامه‌ییه‌كى جێگیر لاى قوتابی، جگه‌ له‌وه‌ش رێگاكانى بونیادنانى خودی لاى گه‌شه‌ ده‌كات و ده‌توانێ چاره‌سه‌ری زۆر گرفت بكات.
هه‌روه‌ها مامۆستا كه‌ هه‌رده‌م ئه‌ستونده‌ و كۆله‌گه‌ى سه‌ره‌كى پرۆسه‌كه‌ ده‌ژمێردرێ، پێویسته‌ به‌رده‌وام په‌ره‌ به‌توانا پسپۆرییه‌كانى بدات. چونكه‌ هه‌ر چه‌ند رێگاكانى فێركردن به‌ره‌وپێش بچن و ته‌كنه‌لۆژیا و كۆمپیوته‌ر و ئه‌نته‌رنێت باو بێت و رێگاكانى خۆ فێركردن په‌ره‌بستێنێ و ئاسان بێت، به‌ڵام مامۆستا هه‌میشه‌ وه‌كو په‌روه‌رده‌كار و ئاراسته‌كار و ئامۆژكار و ڕێپیشانده‌ری یه‌كه‌م دێت بۆ قوتابییه‌كانى و به‌ سه‌رچاوه‌ى زانست و زانیاری ده‌ژمێردرێت، بۆیه‌ پێویسته‌ هه‌رده‌م مامۆستا په‌ره‌ به‌تواناى خۆى بدات و به‌رده‌وام به‌شدارى بكات له‌ خوله‌كانى ڕاهێنانى جۆراوجۆری پسپۆڕى و وانه‌وتنه‌وه‌ و به‌ده‌ست هێنانى شاره‌زایی زیاتر و زیاتر، تا بتوانێ هه‌میشه‌ به‌ شێوه‌یه‌كی كاریگه‌ر و متمانه‌ وانه‌ بلێته‌وه‌ و ڕۆڵى ئه‌رێنى مامۆستا بگێرێ به‌رامبه‌ر قوتابییه‌كانى كه‌ ببێته‌ مایه‌ى دڵنیایی و متمانه‌ى به‌رده‌وام.
هه‌روه‌ها ده‌سته‌ى كارگێڕى قوتابخانه‌ به‌ تایبه‌تى به‌رێوه‌به‌ر پێویسته‌ به‌رده‌وام به‌شدارى بكات له‌ خولى راهێنانى كارگێڕى و سه‌ركرده‌ی په‌روه‌رده‌یی كه‌ قوتابخانه‌كه‌ى ببێته‌ شوێنێكى ئارام و پارێزراو بۆ مامۆستا و قوتابییه‌كان، وه‌ ببێته‌ نموونه‌یه‌كى به‌رزى ڕه‌وشت و ئادكاری په‌روه‌رده‌یی گشتیی بێت له‌ قوتابخانه‌ و، ژینگه‌یه‌كى له‌ باری په‌روه‌رده‌یی گشتگیر له‌ قوتابخانه‌كه‌ فه‌راهه‌م و ده‌سته‌به‌ر بكات، له‌ بیرمان نه‌چێت هه‌ر كاتێ ڕۆلى به‌رێوه‌به‌رى قوتابخانه‌ ڕۆلێكى سه‌ركه‌وتوو نایاب بوو، ئه‌وا ئه‌و كات قوتابخانه‌كه‌ش سه‌ركه‌وتوو و نایاب ده‌بێت.
بۆیه‌ جه‌خت له‌وه‌ ده‌كه‌مه‌وه‌ گه‌ر بمانه‌وێ هه‌ر گه‌شه‌پێدان و په‌ره‌پێدانێك له‌ پرۆسه‌ى په‌روه‌رده‌ و فێركردن له‌ قوتابخانه‌ ئه‌نجام بده‌ین، ئه‌وا ده‌بێ ئه‌وپه‌ری گرنگی و بایه‌خی زۆر به‌ قوتابی و مامۆستا و كارگێری قوتابخانه‌ بده‌ین، چونكه‌ هه‌روه‌كو ده‌لێن قوتابخانه‌ ماڵى دووه‌ممانه‌ و له‌وێ فێر ده‌كرێن چۆن پڕ چه‌ك بین به‌ زانست و زانیاری و چۆن بیر و هزرمان پێبگات، لێره‌وه‌ ده‌بێ وه‌زاره‌تى په‌روه‌رده‌ و به‌رێوه‌به‌رایه‌تى په‌روه‌رده‌كان به‌رده‌وام پلان و كاری له‌ پێشینه‌یان گرنگیدان بێت به‌ قوتابخانه‌كان و چاودێری و به‌دواداچوونى ووردیان هه‌بێت له‌ سه‌ر كۆی پرۆسه‌ى په‌روه‌رده‌ و فێركردن له‌ قوتابخانه‌كان.
به‌رێوه‌به‌رى گشتى/ وه‌زاره‌تى په‌روه‌رده‌
ماسته‌ر له‌ كارگێڕى په‌روه‌رده‌یی

Top