بە گوتەی ئیمانوێل ماکرۆن سەرۆکی فەرەنسا بەم نزیکانە شەڕی نێوان ڕووسیاو ئۆکرانیا کێشە و پشێوی لە گەیاندنی غاز لە ڕووسیاوە بۆ  وڵاتانی ئەوروپا و ئەفریقادا دێنێتە ئاراوە.

 

ناوبراو لە کۆنفرانسێکی رۆژنامەنووسیدا ئەم قسەیەی كردو گوتی: چەندین بژاردەی دیکەمان لەبەردەمدایە لەبارەی شەڕی ئۆکرانیا و ڕووسیاوە، لەوانەش ئەوەیە كە  فەرەنسا بەنیازە پلانێک دابنێت لە ساڵی ٢٠٢٧دا كە چی دیكە پێویستی بە وزەی ڕووسیا نەبێت و وەک سەرچاوەی دابینکردنی وزە پشت بەو وڵاتە نەبەستێت.

 

ئیمانوێل ماکرۆن ئاماژەشی بەوە كرد كە لە ئێستادا هەوڵی جیددی دەدات كە شەڕی ئۆکرانیا و ڕووسیا ڕابگرێت و ڕووسیاش هێزەکانی بکشێنێتەوە،ناوبراو هۆشداری ئەوەشی دا  لە سەرهەڵدانی برسێتی لە کیشوەری ئەفریقادا بەهۆکاری ئەو شەڕەی نێوان روسیا و ئۆکرانیادا.

 

لە لایەكی دیكەوە گەورە بانكێكی ئەڵمانی(دوێچە) ڕایگەیاند كە لە ڕووسیا دەكشێتەو هاوشێوەی دامەزراوە داراییە نێودەوڵەتییەکان و بانکەکانی دیکەی وڵاتان.

 

شایانی باسە لە ڕۆژی ٢٣ی ٢ی ٢٠٢٢ ڤلادیمیر پوتین سەرۆکی ڕووسیا فەرمانی بە سوپای وڵاتەکەی کرد بە ئامانجی پاراستنی بەرژەوەندییەکان و ئاسایشی نەتەوەیی وڵاتەکەی ئۆپراسیۆنەکانیان بۆسەر ئۆکرانیا دەست پێ بكەن. لە ئێستاشدا شەڕو كوشتار لە نێوان سوپای هەردوو وڵات درێژەی هەیە.