بە گوتەی سەعید خەتیبزادە وتەبێژی وەزارەتی دەرەوەی ئێران لە كاتی ئامادەبوونی لە ڤیەننا ئاماژەی بەوە كردووە  کە گفتوگۆكانی پەیوەست بە بووژاندنەوەی ڕێککەوتنی ناوکی ساڵی 2015ی نێوان ئێران و وڵاتانی زلهێزی جیهان پێشکەوتنێکی بەرچاوی بەخۆوە بینیوە.

 

لەلای خۆشیەوە عەلی شەمخانی گەورە بەرپرسی ئاسایشی ئێران جەختی لەوە كردووەتەوە كە   گفتوگۆكان لەگەڵ دانوستانکارانی ئەوروپا بەردەوام بوونە و هێشتا  بەردەوام دەبێت لە کاتێکدا دانوستانەکان لەگەڵ ئەمەریکا لە بەرنامەی کاردا نەبوون، چونکە ئەوان ڕۆڵیان لە هیچ پێشكەوتنێكدا نییە. ئاماژەشی بەوەکرد  كە ئەو کێشانەی ماونەتەوە كێشەی زۆر قورس و سەختن.

 

هەرچی ئاژانسی هەواڵی ڕۆیتەرزە بە رلە چەند ڕۆژێك لە هەواڵێكدا ڕایگەیاندبوو کە ڕێکەوتنێکی ئەمریکا و ئێران لە ڤیەننا بەڕێوەدەچێت، دوای چەند مانگێک لە گفتوگۆی ناڕاستەوخۆ بۆ زیندووکردنەوەی ڕێککەوتنە ناوەکییەکە، کە واشنتۆن لە سەردەمی ترەمپ و لە ساڵی 2018 كشانەوەی خۆی لەم ڕێككەوتنە ڕاگەیاندبوو.

 

شایانی باسە ئەمریکا ئامادەیی خۆی بۆ وتووێژی ڕاستەوخۆ لەگەڵ ئێران بۆ چارەسەرکردنی کێشە هەڵپەسێردراوەکان ڕاگەیاندووە، لە کاتێکدا ئەمریکا و وڵاتانی ڕۆژئاوا نیگەرانییان لەمەڕ بەرنامە ناوکییەکانی ئێران هەیە و پێیان وایە ئێران هەوڵی دروستکردنی بۆمبی ناوکی دەدات.