كونی دەرزی، یان قەپەنگی گەورە؟
زۆرێك لە خەڵك لە بری ئەوەی لە پەنجەرە و قەپەنگیكی مەزندا سەیری دونیا و دەوروبەر و رووداوەكانی بكەن، بە شێوەیەكی سنووردار و زۆر بەرتەسكەوە لە كونی دەرزیدا لە ڕووداوەكانی وڵات و دەوروبەر دەڕوانن، بۆیە دونیابینین و لێكدانەوە و شرۆڤەكانیان ئەوەندە دیاریكراو و بەرتەسك و بچووكە، هەر ئەوەندە دەبینن كە لە كونی دەرزییەكەوە لێیان دیارە!
بیر و قەڵەمی گومڕا
ئەم جۆرە (دونیا بینین)ـە وەكو نەخۆشی و پەتایێكی خێرا گواستراوەی لێهاتووە، كە زۆر زۆر لە ڤایرۆسی كۆرۆنا مەترسیدارتر و كوشندەترە، بەتایبەتیش كاتێك دەبینین ئەم پەتایە لە ناو بژاردەی ئەكادیمی و خوێندەوار و ئەهلی قەڵەمدا زۆر بڵاوە و بە خێرایی و كاریگەری زۆرەوە تەشەنە دەكات و برەوی هەیە!
هەڵمەتی خود فەوتاندن
لە ئێستادا هەڵمەتێكی زۆر گەورە و فراوان دژ بە حكومەتی هەرێمی كوردستان لەئارادایە كە تاكە كیانی سیاسیی یاسایی هەر چوار پارچەی كوردستانە (چونكە هێشتا ڕۆژئاوای كوردستان و كانتۆنەكانی لە ڕووی سیاسی و نێودەوڵەتییەوە لەرزۆكە و ناجێگیرە). بێگومان لەم نووسینەمدا هەرگیز مەبەستم ئەوە نییە، بڵێم ئێمەی كورد لە باشووری كوردستاندا باشترین نموونەمان لە حوكمڕانی بونیاد ناوە، چونكە هەموومان باش دەزانین كە لە سیستمە سیاسییە تازە هەڵكەوتووەكاندا (كورتبینی و نەزانین و زیدەڕۆیی و گەندەڵی)یش بوونی بەهێزی هەیە، تەنانەت خودی حكومەتیش لە بەرزترین ئاستیدا بە ئاشكرا ددان بەم ڕاستییە تاڵەیدا دەنێت و بە شێوەی جۆراوجۆر و بە بەردەوامی هەوڵی چاكسازی و باشتركردنی لایەنی كارگێڕی و حوكمڕانیی ڕوون و ڕەوان دەدات.
سەرچاوەی هەڵمەتی ڕەش
بێگومان ئەم جۆرە هێرش و هەڵمەتانە هەمووی هەر وا سادە و خۆڕسك و دڵسۆزانە نین، كە زادەی نادادی و خراپیی باری ئابووری بێت، بەڵكو لە زۆربەی كاتدا سەرچاوە و سەرەداوی ئەم هەڵمەتانە لە هەر چوار پایتەختی داگیركاری كوردستانەوە هەڵدەقوڵێت (بەغدا، تاران، ئەنكەرە، شام) بەڵام زۆر بە ئاسانی بە بێئاگایی بێت، یان بە ئاگابوون و مەبەستی سیاسییەوە بێت، هەڵمەتەكان دەم لە دەم، دەست لە دەست، تۆڕ لە تۆڕی جیاجیای دونیای ئینتەرنێتەوە وەردەگیرێن و بە ساددەیی و ساناییەوە وەكو برووسكە لە ناو كۆمەڵگەكەماندا بڵاودەبنەوە و دەگوازرێنەوە و بۆگەن و ژەهراویمان دەكەن.
نەوەی چوارەمی جەنگ (4GW)
دوای ڕیفراندۆمی سەربەخۆیی كوردستان 2017، وڵاتانی داگیركەری كوردستان بڕیاریان داوە كە ئەم كیانە كوردستانییە لەناو ببەن، یان لاواز و ناكارا و بێ نمودی بكەن، جێبەجێكردنی ئەم كارەش تەنیا بە ئامرازە كۆنەكان (هێزی ئاگر و ئاسن)ـەوە زۆر دژوار و نرخدارە و دوور نییە وەكو ڕاپەڕین و كۆچ و ڕەوی 1991 بە قازانجی گەلی كوردستان و بە زیانی داگیركەرانی بشكێتەوە، بۆیە لە ڕێی ئامرازە نەرمەكانەوە ئەم جەنگەیان پەیڕەو دەكەن، كە بواری تۆڕی كۆمەڵایەتیی ئینتەرنێت باشترین و هەرزانترین مەیدانی جەنگە كە بەبێ خوێنڕشتن و ئاگر و ئاسن، لە ڕێی خودی كۆمەڵگەی گەلی كوردستانەوە هەوڵی ڕووخاندنی تاكە ئومێدی نەتەوەی كورد دەدەن، ئەویش بە هۆی ئەو جۆرە جەنگەی كە بە نەوەی چوارەمی جەنگ (4GW) ناسراوە.
نەوەی چوارەمی جەنگ چییە؟
كورتترین و سادەترین پێناسە بۆ ئەم جۆرە جەنگە ئەوەیە كە:
لە جەنگە باوە كۆنەكاندا بۆ ڕووخاندنی دەوڵەتێك، كیانێك، كۆمەڵگەیەك، هەمیشە جەنگ لە نێوان دوو بەرەی جەنگاوەری چەكدارەوە دروست دەبوو، بەڵام لە نەوەی چوارەمی جەنگدا دەوڵەتێك بۆ ڕووخاندنی دەوڵەتێكیتر و داگیركردنی، هێزی چەكدار و سەربازگەكانی ئەم وڵاتە ناكاتە ئامانج، بەڵكو میللەت و كۆمەڵگەكە و چین و تویژەكانی دەكاتە ئامانج، ئەم كارەش بە ئامرازە نەرمەكانەوە دەبێت،/ نەوەك بە ئامرازی ڕەق (هێزی ئاگر و ئاسن)، بەم شێوەیە بە هۆی (نەوەی چوارەمی جەنگ)ـەوە میللەت و كۆمەڵگەكان لەناوخۆدا دەڕووخێندرێن، كە ئەوەش باشترین ماك و هەوێنە بۆ ڕووخاندنی دەوڵەت و وڵات و كیان و هێزە چەكدارەكانیان.
دەرەنجام
هەنوكە، ئەوەی لە كوردستاندا دەگوزەرێت، كتومت ئەم جەنگە نهێنییەیە كە بە (نەوەی چوارەمی جەنگ) ناسراوە، بە ڕاستەوخۆ بێت، یان ناڕاستەخۆ، یان نهێنی و بزرۆكە بێت، ئەم جەنگە لەلایەن داگیركەرانی كوردستانەوە سەركردایەتی و ئاراستە دەكریت، ئامانجیش ڕووخاندن و تێكشكاندنی میللەت و توێژەكانی كۆمەڵگەی كوردستانە بە هەموو چین و پێكهاتەكانیەوە، سەربازەكانی ئەم شەڕە خۆكوژییەش ئێمەین، منم، تۆی، ئەویتر و ئەوانیترن كە هەر هەموومان (خەڵكی ژیر، سەلار، ساددە، رۆشنبیر، نەخوێندەوار، نەزان، زانا و بیرمەند) بەبێ جیاوازی كەوتووینەتە ناو داوی داگیركەران و بە خۆڕایی و بەبێ بەرامبەر بووینەتە فیداكار و سەربازێكی ونی لەشكری داگیركەران و ئەم جەنگە چەپەڵە نهێنییەیان بۆ بەڕێوە دەبەین.
هیوادارم پەیام و زانیارییەكەم گەیشتبێتە خوێنەران.
فەرهەنگۆكە:
قەپەنگ: لە تەلارسازی كۆنی ناوچەی رواندز و حەوزی سۆران و باڵەكایەتیدا، قەپەنگ لە شێوەی باڵكۆنێكی گەورەدا بوو، كە بۆ دانیشتن و بینین تیایدا زۆر خۆش و جوان و پان (پانۆراما) بوو.