بە فەرمانی بەڕێز مەسرور بارزانی سەرۆکی حکومەتی ھەرێمی كوردستان، بڕی یەک ملیار و ٥٠٠ ملیۆن دینار بۆ کڕینی پێداویستییەکان بۆ ناوەندەکانی خوێندنی سەر بە وەزارەتی پەروەردە خەرج دەكرێت، لەم ڕووەوە  وەزارەتی پەروەردەی حکومەتی ھەرێم لە ڕاگەیەنراوێکدا ئەم هەواڵەی پشتڕاست كردەوەو گوتی:  بەو پارەیە پێنج ھەزار ڕەحلە و پێنج ھەزار وایت بۆرد و ھەزار و ٥٠٠ سۆپا و ٥٠٠ لاپتۆپ بۆ قوتابخانەكان بکڕدرێن.

هاوكات هەر لە چوارچێوەی ئەو بڕە پارە تەرخانكراوە بڕیارە  یەک ملیۆن و ٧٥٠ ھەزار ماسک و شەش ھەزار و ٧٠٠ پاککەرەوە بكڕدرێت.

وەزارەتی پەروەردە لەم ڕاگەیەنراوەدا ئاماژەی بە چۆنییەتیی دابەشکردنی پێداویستییەکان بەسەر قوتابخانەكاندا كردو ڕوونی كردەوە كە پرۆسەی دابەشكردن لەسەر بنەمای پێویستی و بە پێی ژمارەی قوتابیان دەبێت و بەسەر بەڕێوەبەرایەتی گشتیی پەروەردەی پارێزگاکان و ئیدارە سەربەخۆکان دابەش دەكرێت، هاوكات خوێندنی کوردیش لە کەرکووک لەم پێداویستییانە بێ بەش ناكرێت و پشكی بۆ دەنێردرێت.