ئەمڕۆ سێ شەممە هونەرمەندی گەورەی كورد و دامەزرێنەری تیپی مۆسیقای پاشای ڕواندز مامۆستا زرار محەمەد مستەفا ماڵئاوایی لە هونەرمەند و هونەردۆستان كرد.

 

مامۆستا زرار محەمەد مستەفا  یەكێك بووە لە مامۆستاو هونەرمەندە پێشەنگەكان و لە سەردەمێكدا خزمەتی هونەری كردووە كە بە دەگمەن  میوزیكژەن و ئاوازدانەر لەم دەڤەرەدا هەڵكەوتوون،  مامۆستا زرار لە دایكبووی لە ساڵی ١٩٣٧ ی شاری سەركەشی  رواندزە و خوێندنی سەرەتایی و دواناوەندی لەو شارۆژكەیە و باتاس و ھەولێر و پەیمانگای مامۆستایانیشی لە شاری باقووبە تەواوکردووە.

 

مامۆستا زرار لە ساڵی ١٩٥٨ قوتابخانەیەك لە دەڤەری دەربەندی رایات دەکاتەوە و ساڵی ١٩٦١دەگوازرێتەوە قوتابخانەی پاشای گەورە.

 

لە ساڵی ١٩٧٨ بناغەی تیپی مۆسیقای پاشای گەورەی لە ڕواندز داناوە و دوای دەست بەكاربوونی ئەندامانی تیپەكەو پێشكەش كردنی چالاكییە هونەرییەكان،  دەستی كردووە بە كردنەوەی خولی هونەری و مۆسیقا  لەسەر دەستی ئەو هونەرمەندە چەندین موزیكژەن پێگەیشتوون، كە ئێستا لە گۆڕەپانی هونەریدا كاردەكەن،  لەوانە  وەک "ئامانج غازی و چەتۆ نەورۆز و سەید ئەحمەد رواندزی و زۆری دیكەی پێگەیاندووە.

 

بەداخەوە بە هۆی نەخۆشییەوە ئەمڕۆ 7-12-2021 لە تەمەنی (84) ساڵیدا كۆچی دوایی كرد.