چەند روژەكێن مای دێ بەرەف سندوقێن دەنگدانێ  چین، دڤان هەلبژاردناندا دفێت دروست هەلسەنگاندنا مێژووێی بكەین، دروست هزر د ئایندەیدا بكەین، چونكە تێگەهشتنا خەلەت كارەساتەكا مەزنە بو هەمی خەلكێ كوردستانێ، لەوما پێویستە هەمی لایەك خو ب بەرپرسیار بزانین و رەحمێ ب چارەنڤیسێ خو ببەت.

بەری 60 ساڵان بارزانێی نەمر ژ شكەفتەكێ ڤە دەستپێكر، ل وی دەمی سیناهیەك ل كوردستانێ نەدهاتە دیتن و ئەوا دگوتێ ژیان ژ مرنێ خراپتر بوو، بەلێ پشتەڤانیا خودێ و هێز و ئیرادا گەلێ مە ئەم گەهاندینە رۆژا  ئەڤرو. ئەگەر شوڕەشا ئیلونێ نەبا و 75 ساڵێن خەباتا پارتی نەبا، شوڕەشا گولانێ و سەرهەلدان دیفرا نەدهاتن.ئەگەر سەركردایەتیا حەكیمانەیا سەروك بارزانی و هێزا پێشمەرگەی نەبا ئەڤرو دروست نەدبوو.

ژبەر هندێ دێ بێژین نابیت هەر ئێك لدویف ویژدانا خو حوكمی لسەر رابردوویی و تەڤ خەبات و قوربانیا بدەن.

بوڤێ چەندێ ژی هیڤیدارین دڤان هەلبژاردنادا، هەمی پێكڤە و ژ نیڤا دلێ خو روژا 10ی 10 بچنە سەر سندوقێن دەنگدانێ و دەنگێن خو بدەنە كاندیدێن پارتی دیموكراتی كوردستان. ژبەر كو هەر كێم خەمییەك دڤان هەلبژاردنادا بهێتە كرن، دێ هەمی دەستكەفتا ب كەرامەتا گەلێ خوڤە ئێخینە د مەترسێیدا.

دڤان 30 ساڵێن چوویدا، د رووبرووبوونێت سەخت و مەزندا و د شەڕێ مان و نەمانێدا، ئەم شیاین بەدەستەكێ كوردستانێ ئاڤەدان بكەین و بدەستەكێ بپارێزین.

دوژمنا و پشتەڤانێت وان هەمی هەولدان كرن كو دەستێ وان بگەهیتە پیروزترین پیروزێین مە، بەلێ مە كاروانەكێ قەهرەمانا كرە قوربان و ملەتێ خو مە پاراست و بو تێكدانا هەمی پیلانا ژی هێزا پێشمەرگەی و جەنابێ سەروك بارزانی و ئیرادا خەلكێ كوردستانێ گرەنتیا سەركەفتنان بووینە.

پارتی دیموكراتی كوردستان ب سەروكاتیا سەروك بارزانی هێزەكا زیندی و روحییەتەكا ڤەشارتی یا هەی و كەس نەشێت ژناڤ ببەت، ژبەر كو سەروك بارزانی سیاسەتا ئینكار كرنا گەلێ كورد هەلوەشاند و شیا مرۆڤێن شورەشگێڕ درووست بكەت و بكەتە چەكەك مەزن و نەخشە و پیلانێن دوژمنا پێ ژناڤ ببەت، هەروەسا شیا ژ (نێزیك بوون و هەڤگرتنێ) هێزێ درووست بكەت و ژ ترسێ (جورعەت و شجاعەتێ) درووست  بكەت و ژ رەڤێ (هێرش و داستانا) درووست بكەت، ژ بەندا زلامێن فیدا ئاڤا بكەت.حەز و ڤیان و ئیرادێ ل وەڵاتی بچینیت و مروڤا بكەتە چەكەكێ گران و كەلها زوردارێی پێ هەرفینیت.

پارتی و بارزانی د مەزنترین بەرتەنگی دا نەهێلا مورالا گەلێ مە بكەڤیت و تەركیز لسەر بەرەڤانی كر و شەركەرێن نوی درووست كرن.د (25ی ئیلونێ دا) مێژوویەكا پڕ سەروەری درووست كر كو مەزنترین دەستكەفتە د دیروكا گەلێ مەدا و هەمی كوردستانی شانازێی پێ دكەن.

بەرنامێ مە درێژە پێدانە ب خەبات و قوربانێیت(75) ساڵێن پارتی دیموكراتی كوردستان، شاراندنا خەباتێیە بو دەستكەفتێن زێدەتر، درێژەپێدانە ب كاروانێ ئاڤەدانكرن و بەرەف پێشڤەبرنێ، پاراستنا وێ ئارامێی یە یا هەمی كوردستانی شانازێی پێ دكەن.

ژبەر ڤێ چەندێ داخوازا مە ژ خەلكێ كوردستانێ ئەوە ب ریكلامێن هەلبژاردنا نەهێنە خاپاندن، دوهێ ئەوێن لە بەغدا هەولدان نانێ خەلكی بهێتە بڕین، ئەڤرۆ ێی خو ل داخوازێین خەلكی دكەنە خودان، دوهی دڤیا ناڤێ حكومەتێ و پەرلەمانی لسەر نەخشێ كوردستانێ نەهێلن، ئەڤرو ێی بەحسێ مافێن خەلكی دكەن و دڤێت ببنە نوێنەرێن كوردا ل بەغدا.لەورا دڤێت مللەت نەك دەنگێ خو نەدەتێ، بەلكو ب دەنگێن خو پیلان دانەرێن خرابێی سزا بدەن و ڤەكولینێ لسەر راستیا گوتنێن هەمیا بكەن. لڤێرە دڤێت ملەت بێژتە وان كەسا ئەوێن ب باشی دوژمنی نەخوینن جهێ هەوە ل پارێزگەها دهوكێ نینە.

ئەگەر پیروزترین پیروزی (دین و خەلك وكەرامەت) بن كەواتە لسەر مە فەرزە  دەنگێ بدەینە وێ هێزێ یا دین و خاك و كەرامەتا مە دپارێزیت، و ل رۆژێن سەخت و دژواردا خو ل مە دكەتە خودان.

پارتی ئەو هێزە یا ئەڤرو و ئایندێ خەلكێ كوردستانێ پێڤە گرێدایی، چونكی بنیاتێ پەیوەندێین پارتی دگەل خەلكێ كوردستانێ لسەر بنچینێ ئەمانەت و باوەرێی هاتینە درووستكرن.

دەنگێن وە بو كاندیدێن پارتی دێ دماهێی ب داگیركارێی ئینیت و پاشەروژەكا نو و مەزن و ژ هەژی بەردەست كەت بو تەڤایا خەلكێ كوردستانێ.

 

 

 

(*) 

بەرپرسێ لقا ئێك پارتی دیموكراتی كوردستان