وەكو دیارە هەڵبژاردن ئەو مودێلەیە لە شێوازی دەسەڵاتداری، كە كەسانێك وەكو بەربژێر لە لایەن هاووڵاتیانەوە هەڵدەبژێردرێن، بۆ پەرلەمان، یان هەر پۆستێكی دیكەی وڵات، ئەمەش مۆدێلێكی نوێیە بۆ دامەزراندنی دەوڵەتێكی مەدەنی، یان دیموكراتی، ئەویش لە پێناو خۆشگوزەرانیی هاووڵاتیان و فەراهەمكردنی پێكەوەژیانی ئایینی و نەتەوەیی، بەڵام لە وڵاتی عێراقدا كە هەمەچەشنی و فرەئایینی و مەزهەبی و نەتەوەیی هەیە، ئەم جۆرە لە دەستاودەستكردنی دەسەڵات هەستیارییەكی زیاتری هەیەو، بابەتەكە شەڕی مانەوە و پارێزگاریكردنە لە ناسنامە و زمان و خاك، ئەم شەڕە چارەنووسسازەش، كەسی شیاو و بەرپرسیاری دەوێت.

لە سەردەمی ڕژێمی بەعس و پێش ئەویش، بە بەردەوامی و بێ پچڕان، لە ژێرناوی جۆراوجۆردا ستەم لە میللەتی كورد كراوە، هەر لە ئەنفال و كیمیاباران كردن و كۆڕەو بگرە، تا ڕاگواستن و نیشتەجێكردنی زۆرەملێ و، زیندەبەچاڵ و تەعریبكردن و بەجاریە كردنی ژن و كچەكانمان، هاوكات حەڵاڵكردنی ماڵ و سامانی كورد بۆ عەرەب، لە دوای ڕووخانی ڕژێمی بەعسیشەوە تائێستا، شەڕ و ئاژاوە بەردەوامیی هەیە، بەتایبەتی بەغدا، كە بە هەموو جیاوازییە ئایینی و مەزهەبییەكانەوە، كۆكن لەسەر دژایەتیكردنی هەرێمی كوردستان بە حكومەت و هاووڵاتییانەوە، هەر لە بڕینی بودجە و مووچە، تا گەیشتە ناردنی هێزی سەربازی، دەستیان چووە خوێنی پێشمەرگە و هاووڵاتیانی كوردستان و، داگیركردن و بە تاڵانبردنی سەروەت و سامانی كورد.

ئەوەی لێرەدا مەبەستمە بیڵێم، ئەوەیە كە بەشداریكردن لەم هەڵبژاردنە، بە واجبی شەرعی و نیشتمانی و مۆدێلی سەردەمییانەی حوكمڕانی دەزانم و، وەك چۆن لە سەردەمی خەباتی شاخدا و لەكاتی شۆڕشەكاندا یەك (فیشەك) زۆرگرنگ بوو بۆ پێشمەرگەیەك، لە ئێستاشداو بەتایبەتی لەم هەڵبژاردنەدا، یەك دەنگ ئەوها گرنگە و، دەكرێت بە دەنگی دەنگدەرێك كاندیدێك سەربكەوێت و، نوێنەرێك بچێتە سەنگەری داكۆكیكردن لە سەروەرییەكان، كەواتە مەڵێ بە دەنگی من هیچ لە بابەتەكە ناگۆڕێت، نەخێر دەنگی تۆی بەڕێز زۆر گرنكە و، دەكرێت كورسییەكی پەڕلەمان یەكلا بكاتەوە.

هەڵبژاردن لە نێو هاوەڵانی پێغەمبەریشدا (د.خ) هەبووە، لەدوای وەفاتی ئیمام ئەبوبەكری سدیق (خ.ر) لە نێو چەند سەحابەیەكدا ئیمامی عومەر (خ.ر) هەڵبژێردرا بۆ وەرگرتنی خەلافەت و، هەروەها ئیمامی عوسمان و ئیمامی عەلی (خ.ر) بە شێوەی هەڵبژاردن بوون بە خەلیفە، كەواتە هەڵبژاردن نەك هەر ڕێگەپێدراوە، بەڵكو زۆر گرنگییشی پێدراوە، بە مەرجێك بە شێوەیەك ئەنجام بدرێت، كە دوور بێت لە ئاژاوە و پێشێلكردن.

بۆیە لە كۆتاییدا دەڵێم: بۆ ئەوەی دووبارە كەركووكمان بە داگیركراوی زەلیل نەبێت و كارەساتی دەستدرێژیی نامووسمان لە دووز دووبارە نەبێتەوەو، بودجە و مووچەی فەرمانبەر و هاووڵاتیی هەرێمی كوردستان نەبڕدرێت، بۆ ئەوەی چیتر پێشمەرگە قارەمانەكانمان شەهید نەبن، ویژدانت ئاسوودە بكە و، بڕۆ دەنگی خۆت بدە بەو كەسانەی كە كوردپەروەرن و، لە خەمی مافی كورد و كوردستاندان، دەنگ بدە بە لیستی سەرۆك بارزانی، كە لیستی پێشمەرگە و كوردایەتییە.

 

 

(*)

كارگێڕ و وتەبێژی لقی هەولێری یەكێتی زانایانی ئایینی ئیسلامیی كوردستان