دەربازبوون ل ئاراس ، وەرچەرخانەکا دیرۆکی بوو

دەربازبوون ل ئاراس ، وەرچەرخانەکا دیرۆکی بوو


بزاڤا رزگاریخوازیا کوردستانی قۆناغ ب قۆناغ گەھشتیە ئاستێ ئەڤرۆ، دەربازبوونا رێبەرێ کاریزما و ئەفسانەیێ گەلێ کورد بارزانی نەمر و ھەڤالێن وی ل رووبارێ ئاراس ل رۆژێن ١٧ و ١٨/٦/١٩٤٧ بۆ ئێکەتیا سۆڤیەتا بەرێ ، نە ڕەڤین بوو نەژی رێکا پەنابەریێ بوو .. نەژی دانپێدان بوو ب شکەستێن سیاسی و لەشکری . بەلکی بریارەکا وێرەکانە یا بارزانی نەمر بۆ دەربازکرنا پرسا گەلێ کورد و بزاڤا رزگاریخوازیا کوردستانی بوو بۆ قۆناغەکا گەش و پێشکەفتیتر و تۆمارکرنا وەرچەخانەکا دیرۆکی .
ب ژناڤبرنا کۆمارا کوردستان ل مەھاباد قۆناغەکا گەش و ھیڤیەکا مەزن و دێرینا خەلکێ کوردستانێ ژناڤ چوو ، چونکی دامەزراندنا کۆمارا کوردستانێ قۆناغەکا نوو و گەشەدار بوو د دیرۆکا بزاڤا رزگاریخوازیا کوردستانی و ھیڤیێن مەزن و پڕی ئۆمێد ب ھەبوونا ڤێ کۆمارا کوردستانی بۆ تەڤایا خەلکێ کوردستانێ درۆست ببوو ، مخابن بەرژەوەندێن وەڵاتا ھەر زوو ئەو ھیڤی و ئۆمێدێن کوردستانیا ژناڤبرن و خەم و کۆڤان و بێ ئۆمێدیێ جھێ وان گرت، چونکی پڕانیا خەلکی و سەرکردە و سیاسیێن کوردستانێ یێن بن سێبەرا وێ کۆمارێ د وێ باوەریێ دا بوون ئەگەر بزاڤا رزگایخوازیا کوردستانی نەمریت ژی بۆ دەمەکێ درێژ دێ د خەوەکا گراندا بیت و ئەگەر ھشیار ببیت ژی نەشێت خۆ لسەر پیا بگریت ..! لێ ژبەرکۆ بارزانی نەمر دیتنەکا جودا ھەبوو لەوما پشتی بەرگریەکا دژوار ل کۆمارا کوردستان بریارەکا جودا و دیرۆکی و تەندرۆست دا ئەو ژی بێ ھیڤی نەبوون و خۆرادەست نەکرن و چۆن بەرەڤ ئێکەتیا سۆڤیەتا بەرێ .
ئەڤ بریار و هەڵوستێ نەتەوی و نشتیماایێ بارزانی نەمر ژ ئەنجامێ وێ ئەزمۆنا درێژ و شۆڕەشگێری و پاشخانەکا سیاسی و جڤاکی بوو ئەوێن دناڤ ماڵباتا بارزان و شۆڕەشێن بارزان وەرگرتی ، هەڵویستێ بارزانی بریارا خۆ ڕادەست نەکرنێ و خۆڕاگریێ و بەرخودانێ بوو بەرامبەر پیلانێن وەڵاتێن بهێز و دارگیرکەر و گۆڕانکاریێن مەزن و رێکخستی یێن دژی گەلێ کورد و بەرژەوەندێن وان ، ئەو ژی بریارا چوونا بەرەڤ ئێکەتیا سۆڤیەتا بەرێ بوو ،
د کاودانێن زۆر دژوار دا ئەڤ بریارە هاتە دان چونکی داگیرکرن و ژناڤبرنا کۆمارا کوردستان ل مەهابات بێ ئۆمێدی و بێ هیڤیبوونەکا مەزن دناڤ خەلکێ کوردستانێ و سەرکردێن سیاسی درۆست کربوو لێ لێزانین و دۆربینا بارزانی نەمر چارە بوو هەمی و ئاستەنگ و پیلانا هەبوو ، رێکا چارەسەریێ یا بێ ئاستەنگ و گڤاش نەبوو چونکی رێپیڤانا بارزانی نەمر و شۆڕەشگێرێن دگەل دا بۆ ئێکەتیا سۆڤیەتا بەرێ درێکا رووبارێ ئاراس لبن سێبەرا فرۆکێن شەرکەرێن هەرسێ وەڵاتێن ئیران و ئیراق و تورکیا و لەشکر و تۆپێن ئیرانێ بوو ئەو لەشکرێ ژلایێ شیان و ژمارێن سەربازی دگەل وان شۆڕەشگێران نەدهاتە بەڕاووردکرن کۆ تنێ پێنج سەد و شێست کەسن بوون ، ب پلانێن رێکخستی و گۆهداریکرن ل بارزانی نەمر ئەڤ شۆرەشگێرێن کورد شیان پشتی (٥٣ ) ێ رۆژێن دژوەر بگەهنە ئارمانجێ و لرۆژێن ١٧ و ١٨/٦/١٩٤٧ ب کێمترین زیان ل رووبارێ ئاراس دەرباز بوونە ناڤ ئاخا ئێکەتیا سۆڤیەت .
گەهشتنا بارزانی نەمر و هەڤالێن وی بۆ ئێکەتیا سۆڤیەت ،

دەربازبوونا وان نە گەهشتنا هندەک پەنابەرا بوو بۆ کەنارێن ئارام ، نەژی ڕەڤین بوو ل زۆرداریێ ، بەلکی روودان و وەرچەرخانەکا هەرە مەزنا دیرۆکی بوو و پرسا مللەتێ کوردێ ئازادیخواز گەهانە جیهانێ و جیهان ژی ب دەربازبوونا وان ب سلامەتی حیبەتی بوو .
گەهشتنا بارزانی نەمر بۆ ئێکەتیا سۆڤیەت وەکی رێبەرێ شۆڕەشگێرێ مللەت و نەتەوێ کوردێ ئازادیخواز و خۆڕاگر و پرسا وان یا سیاسی گەهاندە جیهانێ و وەرچەرخانەکا نوو تۆمارکر ، چونکی بڤێ سەرکەفتنا مەزن و مانەڤا بارزانی نەمر ژبلی ناساندنا گەلێ کورد ، بنگەهەکێ پەیوەندیان دگەل جیهانێ و دبلۆماسیەتێ هاتە ئاڤاکرن و فێری زانستی و هۆنەرێن سەردەمێن جەنگی بوون پشتی چەند ساڵێن نەخۆشی و ژێک دۆرکرنێ .

Top