لاپەرەكانی مێژووی گەلی كورد پڕن لە كارەسات جەرگبر و ماڵوێرانی ، بەڵام هیچ كام لەو گوشار و نەهامەتی و پیلانگیرییەكان نەیتوانی چۆك بە خەونی میللەت دابدا. بۆیە، بەردەوام لە رێگەی شۆڕش و راپەڕینە جیاوازەكان لە سەدو بیست ساڵەی رابردوو تا گەشتووینەتە قۆناغی ئەمڕۆ، هەوڵ دراوە خاوەن مافی خۆمان بین.سەرەڕای تۆقاندن، ئابڵۆقە، زەبروزەنگی جۆراوجۆریسەربازی، سیاسی و ئابووری هیچ كات كورد ملی که‌چ نه‌کرد.
روون و ئاشكرایە، هەر كاتێك تەبا ویەكهەڵوێست بوو بین ئەوا سەركەوتنی گەورەمان بەدەست هێناوە بۆیە، نەیارانمان بەردەوام كار لە سەر تێكدانی یەكریزمان دەكەن لە هەر رێگەیەكەوە بێت بەكردەوەش كاری لە سەر كراوە ، هەروەها ئەوەش راستییەكی حاشا هەڵنەگرە كە هیچ هەنگاوێك بەكردەیی و بەبێ یەكڕیزی و یەكگوتاری، جێبەجێ‌ ناكرێت .. چونكە هەرێم بەرهەمی خەبات و خۆراگریی و قوربانیدانی گەلی لەقۆناغە جیاجیاكانی خەباتدا.
ئەم گەلە بەخۆراگریی خۆی توانی ئەم واقعە دروست بكات، ئەم هەرێمە ئێستا لەناوچەكە و لەجیهاندا خاوەن پێگەی خۆیەتی، بۆیە هەركەسێك یان هەر رۆشنبیرێك یاهەر سیاسەتمەدارێك و شرۆڤەكارێك ئەگەر پەرۆشی دۆخی سیاسیی هەرێم بێت، دەبێ بە وردی لەم قۆناغە بڕوانێت،بێگومان ئەو را و بۆچوونانەی كە دەخرێنە ڕوو رەنگدانەوەی واقعەكەبن. لەم پێودانگەوە، ئەگەر هاوكاری و ئازادیی سیاسی و پرۆژەی حکوومەت نەبوایە، لەدروستكردنی ئەو فەزاسیاسی و ئیقلیمی و نێونەتەوەییە، ئەوا نەدەتواندرا قورسترین و سەختترین بەرگریی نەتەوەیی بكەین.
جێگەی داخە كە ، زۆر جار لە ئاستی ناوخۆ ناتەبایی، خیانەت، چوونە ژێرباڵی لایەنی تر، نابەرپرسیاری، نەبوونی هەستی نیشتمانی، بەرژەوەندیخوازی و چاوبرسێتی) بەشێكی دیاری كورد، بوونە هۆكاری پاشەكشەكردنی گەلی كورد. بەڵام، ئێستا هەنگاوەكان وا وێنا دەكەن، پێگەی سەرۆك بارزانی، وەك مەرجەعێكی باڵا لە نێو كورد رۆژ بە رۆژ گەشتر و دیارتر دەركەوتووە وخه‌ڵکه‌ دڵسۆزه‌که‌ی دیکه‌ش درێژه‌پێده‌ری هه‌وڵه‌کانی ئه‌و ڕێچکه‌یه‌ی ئه‌ون.
لای هەمووان ڕوونە، قەیرانی سیاسی و مەزهەبی عێراق، كۆتایی نایەن ،چونكە هیچ وەلایەك بۆ عێراقی دروستكراو و بە زۆر پێكەوە لكێنراو نییە و تا دێت زیاتر ئاڵۆزتردەكرێت. ئەم قەیرانە ریشەیەكی قووڵ و فرەلایەنی هەیە لەكۆی سیستەمی سیاسی و مەزهەبییە،لەم رووەوە هەستیاریی دۆخەكە وادەخوازێ، هەرێم خاوەنی ناوەندێكی بەهێزی بڕیاردەربێ، پێویستە لەبەر رۆشنایی ئەم واقعە نوێیەی هەرێمی كوردستاندا ئەركە هەنووكەییەكان دیاری بكرین، ئامادەكاری زیاتر بۆ قۆزتنەوەی ئەو دەرفەتەی كە بۆخەڵكی كوردستان هاتۆتەپێش تێپەراندنی ئەم قۆناغە، هەرئەمەش بووە هۆكاری پێكهێنانی حکوومەتێكی زۆرینە لەسەر ئەساسی سازان و چاكسازی و لێكتێگەیشتن، واتە دەبێ خەڵكی كوردستان حیزب و لایەنە سیاسییەكان خەریكی چۆنیەتی بەرەو ڕووبوونەوەی ئەم دۆخە و جێبەجێكردنی ئەركەكانی ئەم دۆخەبن، نەك خاسیەتەكانی ئەم قۆناغە پشتگوێ بخرین و خەڵكی كوردستان سەرقاڵی ململانێكانیان بكرێن، بەڵكو پێویستمان بەبەرچاەڕوونییەكی باش و ئیرادەیەكی نیشتمانی یەكگرتوو هەیە.
بەدڵنیاییەوە وەك چۆن ئێستا ئەو ئارامی و سەقامگیرییەی هەرێم، لە عێراق و وڵاتانی هەرێمی بەهێزترە لەئاستی نێودەوڵەتی، لەئایندە زەمینەیەكی لەبارتردێتە ئاراوە كە گشت ئەو مەسەلانەی بوونەتە جێگەی گفتوگۆ، هەرێمی كوردستان رێچكەی فراوانتری خۆی دەگرێت و ئەم قۆناغەش بە سەركەوتوویی دەرباز دەكەین و بەدڵنییاییەوە دەرفەتی باشتر بۆ گۆڕانكارییەكان بەرژەوەندییەكانی خەڵكی كوردستان دێتەدی.بۆیە، سیاسەتی ئێستای ناوچەكە دەخوازێت كە دوور بین لە تێوەگلان و نەبینە مۆڵگەی شەڕی سیاسی وڵاتان، سوود وەرگرتن لە ئەو هەلانەی بۆ بەرژەوەنی كورد دێتە پێشەوە، بۆیە هەنگاوەكان زۆر لە لوتكە نزیكن و بەرەو ئاسۆی گەشتر هەنگاو دەنێین.