رۆژهات ئامەدی سیاسەتمەدار و شۆڕشگێڕی باكووری كوردستان بۆ گوڵان: سیاسەتەكانی پەكەكە هەڵەن و هیچ خزمەتێكیش بە دۆزی كورد ناكەن
هەروەك ئاشكرایە پەكەكە نەیتوانیوە هیچ دەستكەوت و سەركەوتنێك لە باكووری كوردستان تۆمار بكات، بەڵام سەرباری ئەوەش هاتۆتە باشووری كوردستان و كێشە و سەرئێشەی گەورەی بۆ هەرێمی كوردستان دروست كردووە، هۆكارەكانی ئەم هەڵسوكەوت و رەفتارانەی پەكەكە و دەرئەنجام و ئاكامەكانی، بوونە تەوەری دیدارێكی گوڵان لەگەڵ رۆژهات ئامەد سیاسەتمەدار و شۆڕشگێڕی باكووری كوردستان.
* ئەوەی ئێستا دەیبینین ئەوەیە كە پەكەكە هەرێمی كوردستانی كردووە بە گۆڕەپانی شەڕ و، رۆژانە توركیا بە بیانووی بوونی پەكەكە گوندەكانی كوردستان بۆمباران دەكات، پرسیاری گرنگ لێرەدا ئەوەیە، ئەگەر پەكەكە دەیەوێت شەڕی توركیا بكات، بۆچی لە ناو باكووری كوردستان نایكات، خۆ چیاكانی باكووری كوردستان لە چیاكانی هەرێمی كوردستان سەختترن؟
- راستە مەیدانی سیاسەتی پەكەكە باكووری كوردستانە، ئەوە ماوەی نزیكەی 35 ساڵە شەڕ لە نێوان پەكەكە و دەوڵەتی توركیا هەیە، ئەو شەڕەش هەر بەردەوامە، بەڵام پەكەكە لە باكووری كوردستان تووشی شكستێكی گەورە هاتووە و، ئێستا وەك جاران ئەو شەڕە لە باكووری كوردستان نەماوەو، 90%ی شەڕی پەكەكە كەوتووەتە باشووری كوردستانەوە، بۆیە دەبێت ئێمە لێرەدا بپرسین، بۆچی پەكەكە لە باشووری كوردستان بارەگای خۆی داناوە و ئەوێی كردووەتە مەیدانی شەڕی خۆی، دەبێت بپرسین: چۆن پەكەكە گەیشتووەتە ئەو قۆناغەی كە لە باشوور ئەو كارانە بكات؟ ئێمە دەزانین لە 1991 كە باشووری كوردستان توانی ئیدارەی خۆی پێك بهێنێت، ئەو كاتەش پەكەكە لە باشووری كوردستان بوو، لە قەندیل نیشتەجێ بوو، لەو كاتەوە پەكەكە ئۆپەراسێۆنی خۆی لە دژی توركیا ئەنجام دەدا، بەڵام پەكەكە دوای شكستی گەورەیان لە باكوور، هەموو كار و چالاكیی خۆیان هێنایە باشوور. ئێستا توركیا كار بۆ ئەوە دەكات پەكەكە لە باشووریش نەمێنێت و شكست بخوات، وەك ئەوەی لە باكوور شكستی هێناوە. كەواتە بوونی پەكەكە هۆكارێكە بۆ هێرشكردنە سەر باشووری كوردستان، هەروەها لە ناو پەكەكەش كادیر و كەسایەتیی وا هەن، وەك تورك حەز دەكەن دەسەڵاتی كورد لە باشوور نەمێنێت و شكست بخوات، لە ناو پەكەكە دارودەستە و دەسەڵاتداری وا هەیە كە وەك توركیا حەز دەكەن رۆژئاوی كوردستان تووشی شكست بێت، ئەوەتا توركیا لە هەندێ ناوچەی باشووری كوردستان 30 كیلۆمەتر هاتووەتە ناو سنوور و خاكی هەرێمی كوردستان، توركیا بچێتە هەر شوێنێك، بنكە دادەنێت و بۆی هەیە لەو شوێنە نەڕوات و بمێنێتەوە، ئەو كات شەڕی ئێمە، شەڕی نێوان باشووری كوردستان و توركیا دەست پێ دەكات، یان بڵێین شەڕی نێوان عێراق و توركیا دەست پێ دەكات، لەم روانگەیەوە پەكەكە بەو كارانەی دەیكات هەڵەی گەورە دەكات و، بەو سیاسەتەش بەهیچ جۆرێك خزمەت بە دۆزی كورد ناكات، بۆیە دەبێت ئێمە لە باشوور سیاسەتێكی ستراتیژیی دروست پیادە بكەین، كە تورك بواری نەبێت ئەو كارە لە دژی هەرێمی كوردستان ئەنجام بدات و، پەكەكەش بواری نەبێت بەو جۆرەی كە بیانوو و دەرفەت بۆ توركیا دروست بكات، شەڕی توركیا بكات و توركیا هێرش بكاتە سەر باشووری كوردستان.
* ماوەی زیاتر لە یەك مانگە توركیا هاتووەتە ناو خاكی هەرێمی كوردستان و بە حیساب شەڕی پەكەكە دەكات، بەڵام بێجگە لە كاولكردنی گوندەكان و زیاتر هاتنە ناوەوەی بۆ ناو خاكی كوردستان، دەبینین هیچ لایەك نە پەكەكە و نە هێزەكانی توركیا زیانێكی ئەوتۆیان نییە، ئایا ئەمە لە سیناریۆیەكی ئیقلیمی ناچێت، كە دژی هەرێمی كوردستان بە دەستی پەكەكە جێ بەجێی دەكەن؟
- جووڵانەوەی پەكەكە رێكخراوەییە و ئەوەی دەیكات، هەر هەموو لە بەرژەوەندیی خۆیەتی، نەك بۆ بەرژەوەندیی میللەتی كورد، توركیاش هەمان جۆرە، كە شەڕی پەكەكە دەكات، دەڵێت دژی كورد نیم، بەڵام ئەمە تەنیا بانگەشەیە، چونكە دەبینین توركیا لە رۆژئاوی كوردستان عفرینی داگیركردووە و لە توركیاش زمانی كوردی قەدەغەكردوە، لەلایەكی دیكەوە لە شەڕی نێوان پەكەكە و توركیادا باشووری كوردستان زەرەرمەندترە لە پەكەكە، ئەوەتا بە سەدان گوندی باشووری كوردستان ناتوانرێت ئاوەدان بكرێنەوە و ئێستاش خەڵكی ئەو گوندانە ئاوارەن لە دهۆك، یان شێلادزێ و سۆران و شوێنی دیكە، واتە كوردی باشوور لەو شەڕەدا لە پەكەكە زیاتر زیانی پێ گەیشتووەو، بە هیچ جۆرێك زەرەر بە توركیا نەگەیشتووە. هەر بۆیە من ئەوە دووپات دەكەمەوە كە دەبێت ئێمە چارەسەرێكی ستراتیژی بدۆزینەوە تاوەكو ئەو شەڕە نەمێنێت، ئێمە ناتوانین بە پەكەكە رابگەیەنین شەڕ مەكە، چونكە پەكەكە گوێ بە ئێمە و ئەو قسانە نادات، بەڵكو پەكەكە و توركیا هەر شەڕی خۆیان دەكەن، ئەگەرچی دەسەڵاتی سیاسیی باشووری كوردستان لە كوردستان و دەرەوەی كوردستانیش دەتوانێت لە گۆڕەپانی دیپلۆماسییەتی جیهان، سیاسەتێك بەڕێوە ببات كە شەڕی پەكەكە دووربخاتەوە و، كاریگەریی لە سەر سیاسەتی باشووری كوردستان نەمێنێت.
* هەموو دەوڵەتانی داگیركاری كوردستان لەسەر ئەوە كۆكن كە رێگربن بۆ دروستبوونی قەوارەیەكی سیاسی بۆ كوردستان، بەڵام لە هەمانكاتدا پەكەكە پەیوەندیی لەگەڵ هەرسێ دەوڵەتی (ئێران و عێراق و سووریا)دا لەو پەڕی باشیدایە و، هاوكاریی چەك و دارایی دەكرێت، ئایا ئەمە چی لێ دەخوێندرێتەوە؟
- ئەگەر وەك رێكخراوێك شەڕی چەكداری بەرامبەر هێزێكی ناتۆ بكەیت، ئەوە ناچار دەبیت پەیوەندیت هەبێت لەگەڵ وڵاتانی وەك ئێران و عێراق و سووریا، ئەوە ئێستا پەكەكە پەیوەندیی بەهێزی لەگەڵ ئەو وڵاتانەی وەك ئێران و عێراق و سووریا هەیە، كە ئەمەش سیاسەتێكی كلاسیكییە و سەركەوتوو نییە و بەرەو نەمان دەچێت، هەر چەندە پەكەكە بڵێت من لەگەڵ ئەو سیاسەتەدا نیم و پەیوەندیم بەو وڵاتانەوە نییە، ئەوا ئەمە تەنیا بانگەشەیە، تا پەكەكە لەسەر ئەو سیاسەت و پەیوەندییانە بەردەوام بێت، ئەو وڵاتانە پەكەكە بۆ بەرژەوەندیی خۆیان بەكاردەهێنن، بۆ ئەوەی نەهێڵن باشووری كوردستان و رۆژئاوای كوردستان زیاتر بەرەوپێشەوە بچێت. من پێم وایە پەكەكە بەو پەیوەندییانەی لەگەڵ ئێران و بەغداو حەشدی شەعبی هەیەتی، سەركەوتوو نابێت.
* پەكەكە خۆی رایگەیاندووە كە ئەو بڕوای بە سەربەخۆیی كوردستان نییە و، ئامانجیشی دەوڵەتی كوردستان نییە، پرسیار لێرەدا ئەوەیە كە پەكەكە كاتێك ئامانجی سەربەخۆیی نییە، بۆچی ئەم هەموو كوڕ و كچەی كوردستان بە كوشتن دەدات؟
- لەو كاتەی پەكەكە دەستی بە سیاسەت كرد، لە سەرەتای دامەزراندنیەوە دروشمی سەربەخۆیی كوردستان بوو، بەڵام بە تێڕوانینی من دوو پەكەكە هەیە، یەكێكیان پەكەكەی كوردە و یەكێك پەكەكەی تاریكە، پەكەكەی كورد بە هەزاران گەنج و كادیرو كەسی كوردپەروەرن، وەك هەموو كەسێكی دڵسۆزی میللەتی كوردن، بەڵام پەكەكەیەك هەیە پەكەكەی تاریكە ئەوانە پەیوەندیی راستەقینەیان لەگەڵ ئەو لایەنانە هەیە، كە پێیان خۆش نییە كورد سەربكەوێت، هەروەها پەكەكە ئەو كاتەی رایگەیاند دەوڵەتی كورد دروست دەكەین، خەڵكی كوردی بۆ خۆی رادەكێشا، بەڵام كاتێك بینی دەوڵەتی كوردی بە واقیعی بە سەرپەرشتی باشووری كوردستان و، بەتایبەتی بە سەرپەرشتی پارتی دیموكراتی كوردستان بەرەوپێشەوە دەچێت، لەو كاتەوە پەكەكە رایگەیاند ناكرێت ئەمە رووبدا و دەبێت ئێمە پێشی لێ بگرین، لەو كاتەوە پەكەكە گوتی دەوڵەتی كوردیمان ناوێت.
* پەكەكە بەهۆی ئەوەی لەسەر رەوتی سیاسەتی جیهانی ناڕوات، بزووتنەوەی رزگاریخوازیی كوردستانی بە كردەوەكانی ناشیرین كردووە، ئایا بۆچی پەكەكە هەموو ئامانجی ئەوەیە بزووتنەوەی رزگاریخوازیی كوردستان ناشیرین بكات؟
- چەند جار لەسەر ئەو بابەتە قسەمان كردووە، كە دامەزراندنی پەكەكە هەر لە بنەڕتدا بۆ لەناوبردن و دژایەتیكردنی پارت و رێكخراوەكانی دیكەی كوردو كوردستان دامەزراوە و، ئیعتراف بەهیچ پارت و لایەنێكی دیكە ناكات، پەكەكە لەو كاتەی كە دروست بووە، دەڵێت جگە لە من نابێت هیچ پارت و حزب و لایەنێكی دیكە لە كوردستان هەبێت، دەڵێت هەر كەس و لایەنێك لە دەرەوەی ئێمە بێت، خائینە و هیچ نازانێت، ئەمەش سیاسەتێكی دیكتاتۆرانەیە كە پەكەكە پیادەی دەكات، پەكەكە هێزێكی دیكتاتۆرە و هێزێكی دیموكرات و نیشتمانپەروەری كوردیش نییە و، بنكەی پەكەكە كوردی زۆر زۆر دڵسۆز و نیشتمانپەروەری تێدایە، بەڵام سەركردەكانی پەكەكە خزمەت بە هێڵ و ئاراستەی نیشتمانپەروەری ناكەن، زۆربەی سەركردەكانی پەكەكە بوونەتە داردەستی دوژمنانی كورد.
* بەرای ئێوە ئەم ئاراستەی پەكەكە بۆ رێگرتن لەوەی كوردانی باشوور و رۆژهەڵات بگەنە ئامانجی خۆیان، بۆچی دەگەڕێتەوە و بۆچی پەكەكە دژی بەرژەوەندییەكانی باشوور و رۆژئاوا رەفتار دەكات؟
- پەكەكە دەبینێت لە باشووری كوردستان دەسەڵاتێكی زۆر گەورە هەیە، ئیرەیی دەبات، بەڵام پەكەكە لەو دەسەڵاتە و پێشكەوتنانەدا بەشدار نییە، ئەگەرچی پەكەكە لە سەرەتای دامەزراندنیەوە زۆر بەڵێنی دا، كە هەر چوار پارچەی كوردستان رزگار دەكات، بەڵام كاتێك باشوور رزگاری بوو، پەكەكە هیچ كارێكی نەكردووە و لەو دەسەڵاتەدا بەشدار نییە، رۆژئاوی كوردستانیش رزگاری بوو رۆڵی پەكەكەی تێدا نییە و، بەشدار نییە، هەر بۆیە پەكەكە ئامانج و كاری ئەوەیە ئەگەر لەو دەسەڵاتەی لە باشوور و رۆژئاوی كوردستان هەیە، هاوبەش و بەشدار نەبێت، ئەوە دەبێتە دوژمنی. لەم روانگەیەوە پەكەكە دەڵێت لەبەر ئەوەی لەم پرۆسە و قۆناغە گرنگە بەشدار نیم، ئەوە دەبێت ئەو دەسەڵاتە نەمێنێت، بەڵام ئەگەر پەكەكە هێزێكی دیموكراتی راستەقینە و نیشتمانپەروەر بووایە، جیاوازیی نەدەكرد كە ئەمەی لە باشووری كوردستان هەیە، دەسەڵاتی كوردە و رۆژ لەودای رۆژ پێش دەكەوێت، هەبوون و نەبوونی من كێشە نییە، بەڵام ئەوە بەپێچەوانەیە لەلای پەكەكەوە. ئەگەر ئاوڕ لە مێژوو بدەینەوە، ئەوا كاتێك لە مەهاباد دەرفەتێك بۆ كورد دروست بوو، ئەو كاتە مەلا مستەفا لەگەڵ هێزەكانی خۆی رۆیشتە مەهاباد و فەرمووی من هاتووم لێرە خزمەتی كۆمار بكەم، نەیگوت من هاتووم رێگاتان نیشان دەدەم، نەیگوت من شەریكی ئێوە دەبم، بەڵكو گوتی من خزمەتی ئەو كیانە دەكەم، بەڵام پەكەكە لێرەدا دەڵێت ئێوە سیاسەت نازانن من رێگاتان نیشان دەدەم، ئێوە هیچ نازانن و ئێمە دەزانین، ئێوە هەموو خائینن و ئێمە دڵسۆزین، سیاسەت بەو جۆرە نابێت كە پەكەكە دەیكات.
