دوای ئه‌وه‌ی له‌ چه‌ند رۆژی رابردوودا ژماره‌یه‌ فڕۆكه‌ی توركیا بۆ ماوه‌ی چه‌ند سه‌عاتێك به‌ ئاسمانی ناحیه‌ی سه‌ركه‌پكانی سنوری قه‌زای رانیه‌دا سوڕانه‌وه‌، له‌ئێستادا ترس و دڵه‌ڕاوكێ لای خه‌ڵكی گونده‌كانی دۆڵی سه‌ركه‌پكان دروستبووه‌و مه‌ترسی ئه‌وه‌یان هه‌یه‌ كه‌ بۆردومان ناوچه‌كه‌ی ئه‌وانیش بگرێته‌وه‌.
به‌گوێره‌ی ئه‌و زانیارییانه‌ی ده‌ست PUKmedia كه‌وتوون، ڕۆژانه‌ له‌گه‌لڕ بیستنی ده‌نگی فڕۆكه‌كانی توركیا، دانیشتووانی گونده‌كانی (مه‌حباب، دۆڵه‌ڕه‌قه‌، چۆما، زێبه‌لاس) خۆیان له‌ په‌ناگه‌كان حه‌شارده‌ده‌ن، شه‌وانه‌ش په‌نجه‌ره‌ی ژووره‌كانیان واڵاده‌كه‌ن بۆئه‌وه‌ی له‌كاتی دروستبوونی هه‌ر مه‌ترسییه‌كدا زوو به‌ ئاگابێن.
جێی به‌بیرهێنانه‌وه‌یه‌ 12 ساڵ له‌مه‌وبه‌ر چه‌ند فڕۆكه‌یه‌كی جه‌نگیی توركیا به‌بیانووی بوونی بنكه‌و باره‌گای په‌كه‌كه‌، له‌جیاتی گوندی (بۆتێ) گوندی دۆڵه‌ڕه‌قه‌یان بۆردومان كرد، به‌وهۆیه‌وه‌ جگه‌له‌ زیانی ماددی زیاتر له‌ 10 هاووڵاتی ناوچه‌كه‌ گیانیان له‌ده‌ستداو ژماره‌یه‌كی تریش برینداربوون.