کۆمارى ئیسلامیى ئێران به‌ بیانووى چاکردن و کۆنکرێت کردنى که‌ناره‌کانى ئه‌ڵوه‌ن له‌ناو خاکى خۆی، ئاوه‌که‌ى گرته‌وه‌، سه‌رپه‌رشتیارى که‌مپینى \"له‌ پێناو ئه‌ڵوه‌ن\""یش رایده‌گه‌نێت له‌ رۆژى یه‌کشه‌ممه‌ى داهاتووه‌وه‌ له‌ مه‌رزى مونزه‌ریه‌ خۆپێشاندان ده‌ست پێده‌که‌نه‌وه‌.

له‌مباره‌یه‌وه‌ \""سه‌لام عه‌بدوڵڵا\"" سه‌رپه‌رشتیارى که‌مپینى \""له‌ پێناو ئه‌ڵوه‌ن\"" به‌ ئاژانسى هه‌واڵى په‌یامنێرى راگه‌یاند: ئێمه‌ هه‌ر له‌ سه‌ره‌تاوه‌ کاتێک ئێران ئاوى ئه‌ڵوه‌نى به‌ردایه‌وه‌ ناڕه‌زاییمان له‌سه‌ر رێژه‌ى که‌میى ئاوه‌که‌ ده‌ربڕى به‌ڵام ئه‌مڕۆ سه‌رله‌نوێ ئێران ئاوه‌که‌ى له‌ ناوچه‌ى خانه‌قین گرته‌وه‌ و وشکى کرد.

سه‌لام عه‌بدوڵلا گوتی: به‌پێى ئه‌و زانیاریانه‌ى له‌ قه‌سرى شرینه‌وه‌ به‌ده‌ست ئێمه‌ گه‌یشتووه، ئێران به‌ بیانووى چاککردن و کۆنکرێت کردنى که‌ناره‌کانى ئه‌ڵوه‌ن له‌ناو خاکى خۆیدا ئاوه‌که‌ى گرتۆته‌وه.

سه‌رپه‌رشتیارى که‌مپینى \""له‌ پێناو ئه‌ڵوه‌ن\"" راشیگه‌یاند: ئه‌گه‌ر له‌م دوو رۆژه‌دا ئاوه‌که‌ به‌رنه‌درێته‌وه‌ ئه‌وا ناچارین وه‌ک فشارێک بۆ سه‌ر ئێران له‌پێناو به‌ردانه‌وه‌ى ئاوى ئه‌ڵوه‌ن رۆژى یه‌کشه‌ممه‌ى داهاتوو(31/7/2011) دووباره‌ خۆپیشاندان له‌ مه‌رزى مونزریه‌ ده‌ست پێبکه‌ینه‌وه‌و رێگه‌ له‌ سه‌دان تانکه‌ر و بارهه‌ڵگر و گه‌شتیارى ئێران ده‌گرین و مه‌رزه‌که‌ش داده‌خه‌ین هاوشێوه‌ى جارانى پێشوو.

له‌ پێناو به‌ردانه‌وه‌ى ئاوى ئه‌ڵوه‌ن تا ئێستا له‌ ماوه‌ى مانگێکدا له‌لایه‌ن ڕێکخراوه‌کان و سه‌رجه‌م پێکهاته‌ جیاوازه‌کانى شارۆچکه‌ى خانه‌قینه‌وه، سێ جار مه‌رزى مونزه‌ریه‌ داخراوه‌."