سه‌رچاوه‌یه‌ک له‌ وه‌زاره‌تى کاروبارى شه‌هیدان و ئه‌نفالکراوانى حکومه‌تى هه‌رێمى کوردستان باس له‌وه‌ ده‌کات که‌ ئه‌مساڵ له‌ ژماره‌یه‌ک وڵاتى ئه‌وروپى به‌شێوه‌ى جیاجیا یادى کاره‌ساته‌ تاڵه‌کانى کورد ده‌که‌نه‌وه و بڕیاریشه‌ له‌ سبه‌ینێوه‌ ئاماده‌کاریه‌کانى ئه‌و یادکردنه‌وانه‌ ده‌ست پێبکه‌ن.

به‌ڕێوه‌به‌رى راگه‌یاندنى وه‌زاره‌تى کاروبارى شه‌هیدان و ئه‌نفالکراوانى هه‌رێم \"فوئاد عوسمان\"" له‌ لێدوانێکدا به‌ ئاژانسى په‌یامنێرى راگه‌یاند: له درێژه‌ى هه‌وڵه‌کانى وه‌زاره‌تى کاروبارى شه‌هیدان و ئه‌نفالکراوانى هه‌رێم بۆ به جینۆساید ناساندنى که‌یسه‌کانى ئه‌نفال و گۆڕه به‌کۆمه‌ڵکراوه‌کان و کیماباران‌کراوان، کۆمه‌ڵێک چالاکیمان له‌به‌ر ده‌سته‌ که‌ ئه‌مساڵ له‌ ناوه‌وه و ده‌ره‌وه‌ى وڵات جێبه‌جێیان بکه‌ین.

فوئاد عوسمان گوتی: یه‌کێ له‌و چالاکیه‌کانه‌ ئه‌نجامدانى چالاکیى تاییبه‌ت به‌و بۆنانه‌یه‌ له‌ 7وڵاتى ئه‌وروپى که‌ بڕیاره‌ له‌ رۆژى 12/3وه‌ لیژنه‌ى ئاماده‌کارى ئه‌و چالاکیانه‌ به‌ره‌و ئه‌و وڵاتانه‌ به‌ڕێ بکه‌وێت.

به‌ڕێوه‌به‌رى راگه‌یاندنى وه‌زاره‌تى شه‌هیدان ئاماژه‌ى به‌وه‌ش دا: \""ئه‌و چالاکیانه‌ له‌ ناوه‌ڕاستى ئه‌و مانگه‌وه‌ ده‌ست پێده‌که‌ن و ماوه‌ى 45رۆژ ده‌خایه‌نن.\""

فوئاد عوسمان زیاتر روونی کرده‌وه‌: چالاکیه‌کان بریتین له‌ کردنه‌وه‌ى پێشانگه‌ى وێنه‌یى و نیشاندانى 5کورته‌ فیلم له‌سه‌ر گۆڕه‌ به‌کۆمه‌ڵه‌کان و کیمیاباران کردنى هه‌ڵبجه و پێشاندانى که‌ره‌سته و که‌لوپه‌ل و پاشماوه‌ى گۆڕه‌ به‌کۆمه‌ڵه‌کان.

ناوبراو ئاشکراشی کرد: ئه‌و چالاکییانه به‌ هاوکارى لیژنه‌یه‌کى دادگاى باڵاى تاوانه‌کانى عێراق به‌ڕێوه‌ ده‌چن که‌ ئه‌وانیش لاى خۆیانه‌وه‌ به‌ چه‌ند به‌ڵگه‌یه‌کى دۆکیۆمێنتارى له‌سه‌ر تاوانه‌کانى رژێمى به‌عس که‌ به‌رانبه‌ر کورد ئه‌نجامى دان، به‌شدارى ده‌که‌ن."