دكتۆر كه‌مال كه‌ركووكى سه‌رۆكى په‌رله‌مانى كوردستان پێشوازى له‌شاندى ده‌زگاى شه‌هیدانى عیراق كرد كه‌ له‌رۆڵه‌ى شه‌هیدانى گشت پارێزگاكانى عیراق و هه‌رێمى كوردستان پێكهاتبوون و ژماره‌یان سه‌د كوڕه‌ شه‌هیدبوو باوكیان به‌ده‌ست ده‌زگا داپڵۆسێنه‌ره‌كانى رژێمى دیكتاتۆرى به‌عس شه‌هید كرابوون.

ده‌ستپێكى كۆبونه‌وه‌كه‌ به‌ده‌قیقه‌یه‌ك وه‌ستان بۆ رێزگرتن له‌گیانى پاكى شه‌هیدانى عیراق و كوردستان ده‌ستى پێكرد، پاشان ئه‌یوب قاسم نوێنه‌رى سه‌رۆكى ده‌زگاى شه‌هیدان و به‌رێوه‌به‌رى گشتى ده‌زگا، به‌ناوى خۆیان و ته‌واوى شانده‌كه‌یان سوپاسگوزاری ئاراسته‌ى سه‌رۆكى په‌رله‌مانى كوردستان كرد بۆ دیداریان له‌گه‌ڵ شانده‌كه‌ و پوخته‌یه‌كى له‌باره‌ى پێكهاته‌ و سه‌ردانه‌كه‌یان خسته‌ ڕوو، كه‌ ئه‌م شانده‌ له‌رۆڵه‌ى شه‌هیدان پێكهاتوون هه‌موویان قوتابى زانكۆ و خوێندنى باڵان و ماوه‌ى هه‌فته‌یه‌كه‌ به‌شداریان له‌خێوه‌تگه‌ى دیده‌وانى له‌هه‌رێمى كوردستان كردوه‌و سه‌قامگیرى ئه‌منى و پێشكه‌وتنى بوارى ئاوه‌دانكردنه‌وه‌و سروشتى جوانى هه‌رێمى كوردستانیان به‌خاڵێكى وه‌رچه‌رخان له‌ئه‌زمونى سه‌ركه‌وتووى دیموكراسی هه‌رێمى كوردستان له‌قه‌ڵه‌م دا.

له‌به‌رامبه‌ردا دكتۆر كه‌مال كه‌ركوكى سه‌رۆكى په‌رله‌مانى كوردستان له‌وته‌یه‌كیدا به‌گه‌رمى به‌خێرهاتنى به‌رپرسانى شانده‌كه‌ و نوێنه‌رى وه‌زاره‌تى شه‌هیدانى هه‌رێمى كوردستان و گشت ئه‌ندامانى شانده‌كه‌ى كرد.

هه‌روه‌ها باسیى له‌دڕندایه‌تى و كاره‌ نایاسایی و نادیموكراسیه‌كانى رژێمى به‌عسی سه‌ددامى كرد و ئه‌و نه‌هامه‌تى و رۆژگاره‌ سه‌ختانه‌ى هاتنه‌ پێش گه‌لانى كوردستان و عیراق نیشان دا، له‌ئه‌نفال و كیمیاباران و تیرۆر و زینده‌ به‌چاڵكردنى زیاتر له‌ سه‌د و هه‌شتاو دوو هه‌زار هاووڵاتى سڤیل و به‌كارهێنانى چه‌كى كیمیاوى و ووشك كردنى زۆنگاوه‌كانى باشوورى عیراق و ئه‌وه‌شى خسته‌ ڕوو كه‌سانى سته‌مدیده‌ و دڵسۆز له‌عیراق زۆرن له‌گشت پێكهاته‌كان و به‌پشتیوانى خواى گه‌وره‌ و گه‌لانى عیراق پرۆسه‌ى دیموكراسی جێگیر ئه‌بێت و زوڵم و ناعه‌داله‌تى نامێنێ و ئه‌م نیمچه‌ ئازادییه‌ى كه‌ ئێستا هه‌یه‌ به‌هێز و به‌رفراوانتر ئه‌بێت و نموونه‌ى ئیمرۆى كوردستان له‌گشت عیراق جێگیر ئه‌بێت.

پاشان ئه‌ندامانى شانده‌كه‌ كۆمه‌ڵێك پرسیاریان له‌باره‌ى په‌رله‌مانى كوردستان و پێكهاته‌و رێژه‌ى ئافره‌تان و چۆنیه‌تى كارو چالاكى و ستراتیژیه‌تى كاركردنى په‌رله‌مان و ره‌وشیى سه‌قامگیرى و پێشكه‌وتنى بوارى ئاوه‌دانكرنه‌وه‌ى هه‌رێمى كوردستان ئاراسته‌ى سه‌رۆكى په‌رله‌مان كرد و به‌ بایه‌خه‌وه‌ له‌لایه‌ن سه‌رۆكى په‌رله‌مانى كوردستانه‌وه‌ وه‌ڵام درانه‌وه‌و پاشان شانده‌كه‌ هۆڵى دانیشتن و یه‌كه‌ یه‌كه‌ى به‌شه‌كانى په‌رله‌مانى كوردستان یان به‌سه‌ركرده‌وه‌. له‌كۆتایى سه‌ردانه‌كه‌شیاندا شانده‌كه‌ وێنه‌ى به‌كۆمه‌ڵیان گرت و ئاڕمى ده‌ستگاى شه‌هیدانى عیراقیان پێشكه‌سى سه‌رۆكى په‌رله‌مانى كوردستان كرد.