دۆناڵد ترەمپ، لە وتارێکیدا بۆ ژمارەیەک هاووڵاتيی ئەمریکى، ددانی بە شکستەکانی وڵاتەکەيدا نا، لەو جەنگانەی کە لە وڵاتانی وەک عێراق، لیبیا و سووریا کردوویەتی. نەک شکستەکە ئه‌وه‌ بێت كه‌ دەستکەوتی نەبووە، یان لە جەنگەکە نەیبردووەتەوە، بەڵکو باسی لەوە کرد، کە خۆى گوته‌نى ئەوان دەیڕوێنن و چین دەیچنێتەوە، ئه‌و وڵاتانه‌ش کە رزگاری دەکەن، دواتر وەک دوژمن سەیری ئەمریکا دەکەن و دەبنە دۆست و هاوپەیمانی چین. هەروەک ئاماژەی راستەوخۆی بە لیبیا و عێراق دا، کە چۆن سەرەتا ئەمریکا پێی وتوون، ئێمە یارمەتیتان دەدەین و رزگارتان دەکەین لە دیکتاتۆرەکانتان، لە بەرامبەريدا نەوتمان دەوێت، به‌وه‌ش سەرەتا رازی بوون، نەک بەو بڕەش ئێمە دەمانوت، بگره‌ زیاتریشمان بوتایە، هەر رازی بوون، کەچی ئێستا رقیانە لە ئەمریکا و بە دوژمنمان دەزانن و، چین بەروبوومی جەنگەکانى ئێمە و قوربانييه‌كانمان دەچنێتەوە. تره‌مپ ئه‌وه‌شى دووپات كرده‌وه‌: ئەپڵ و ئایفۆن و...هتد، ئێمە دروستی دەکەین، بەڵام چین بەروبوومەکەی دەخوات. ئەمە مانای وایە، وڵات ناوبەناو پێویستی بە به‌خۆداچوونەوە و هەڵسەنگاندنێک هەیە، بۆ ئه‌وه‌ى بزانێت بەرەنجامی هەوڵ و تێکۆشانەکانی کێ دەیچنێتەوە.
کورد بۆ نیشتمان و بۆ نەتەوە و بۆ دەوڵەت شۆڕشی کرد، بەڵام ئەوەی پێی نەگەیشتووین ئەم پرسانەیە و قازانجەکە کەوتە گیرفانی کەسى و حزبيیەوە! هیچ کات پێشمەرگەیەک، چ لە مێژووى دوور و چ لە ئێستادا ئامادە نەبووە و نييه‌، گیانی خۆی بەخت بکات، ئه‌گه‌ر بە دروشمی کوردستان و نەتەوە و رزگارى نەبووبێت. هیچ تاکێکی ئەم وڵاتە لە مێژووماندا ئامادەی قوربانیدان و برسیەتی و رووبەڕووبووەنەوەی ستەم نەبووە، ئه‌گەر بۆ کوردستان و ئامانجی دەوڵەتی کوردستان نەبووبێت، بەڵام مخابن، دوای شۆڕش و ئازاديی کوردستانی باشوور، ئەوەی بوو بە بناغەی وڵات، مۆدیلی حزبی و دەسەڵاتی حزبی و حوکمڕانيی حزبی و لەوێشەوە سوپا و هێزی حزبی و میدیای حزبی بووه‌، تا گەيشتە زانکۆ و قوتابخانە و نەخۆشخانە و گردی حزبی و...هتد!
باسی ریفراندۆم و دەوڵەت دەکەیت، كه‌سانێك جنێوت پێ دەده‌ن و گاڵتەت پێ دەکه‌ن، بەڵام لە سەر سامانی نیشتمانی، ئه‌وه‌ى گەورەترین سەرمایەی پێکەوە ناوە، كه‌ باسی چاکسازی ده‌كرێ، باسی مەرگە لای ئەو و رووبەڕووی دەبێتەوە و، گرەو لەسەر نیشتمان دەکات بۆ گیرفانی خۆی! ئیتر ماوەی حوکمڕانيی ئەم ٣٠ ساڵە لەسەر موجامەلەو دڵڕاگیرکردن و دڵنەوایی حزبی و ئاشتکردنەوەی حزبی بە پێدانی ئیمتیاز و دامەزراندنی بندیوار و پاسەوان و کادیر بووە بۆیان. واتە حوکمڕانی لەسەر گونجان و دڵرِاگرتنی حزبی بەڕێ کراوه‌، دواجاریش بەرەو کەسی و شۆڕبوونەوەی دەسەڵاتە حزبیيەکان بۆ بەرپرس و کەسەکان و بوون بە خاوەنی سامان و داهاتی ئەم وڵاتە، تا وای لێهات، تەقەی بنی مەنجەڵەکە و قاسەی نیشتمان هات و، هەڵئاواسانی داهات و پارە لای بەرپرس و حزبەکان و موڵکایەتيی حزبی و کەسی لە سەرداهاتی نیشتمانی دروست بوو!! واتە ئەوەی تاکی کورد و سەرکردەکانی کورد لە مێژوودا قوربانیيان بۆ دا، حزب و بەرپرس چنيیانەوە، ئێستاش وڵات گەیشتووه‌تە ئاستێکی وا سەخت، کە ترەمپ وتەنی بارودۆخی ئەمریکای لەم رۆژانەدا وا باس کرد: ‘Our Country in serious serious truble‘ واتە، وڵات لە سەختی و ناڕەحەتيیەكی یەکجار زۆر و قورسدایە.
بۆیە باشترین بژاردە بۆ چارەسەر ئه‌وه‌يه‌، جگە لە چاکسازيیەکی توند و بێڕەحمانە، سەرلەنوێ چوونەوە بە دەسەڵاتی حزبی و کەسی و داهات و سامانیاندا بكرێت، بۆ خستنەوەی سەرسندوقی نیشتمان و ئاوڕدانەوە لە پرسە نەتەوەیی و نیشتمانیيەکان و بە نیشتمانیکردنی جومگە و سێکتەرە هەستیارەکانی وەک سامان و داهات و هەیکەلی ئیداريی حوکمڕانی و هێز و سوپا و، لەوێشەوە دەزگاکانی ديكه‌ى وەک میدیا و پەروەردە و سێکتەره‌ خزمەتگوزاریيە گشتیيەکان، له‌وه‌به‌ولاوه‌ هیچ رێگەیەکی دى نیيە. پێويسته‌ ئەمانە لە دەستی حزب و بەرپرسەکان وەربگیردرێتەوە و بناغە بۆ پێکهێنانى حوکمڕانیيەکی نیشتمانی دابنرێت، لەسەر بنەمای ئەزموون و پێبوون و دوورخستنەوەی دەسەڵاتی حزبی لە هەیکەلی ئیدارەی حوکمڕانی. رەنگە ئەمانەش بەربەستەکانی زۆر بێت، بەڵام رێگەی چارەسەر تا زوو بگیرێتە بەر، درەنگترە، ئه‌گەر هەنگاو بە هەنگاویش بڕوات، باشترە لەوەی هەردەست پێ نەکات، چونکە مەترسیيەکە لە دەست پێ نەکردنی ئەم پرۆسەى بە نیشتمانیکردنە نيیە، بەڵکو مەترسیيەکە لە رۆژبە رۆژ فراوانبوونی دەسەڵاتی حزبی و کەسيیە، کە سەرچاوەی زۆری نەهامەتيیەکان و گەندەڵيی ئەم وڵاتەن، لە مێژووشماندا زۆر وەک دروشم و وەک پرۆسە باسى چاکسازی کراوە، بەڵام وەک کردار، هەرگیز نەکراوە. بۆیە ئه‌گەر ئەمجارە ئەم چاکسازيیە نەبێتە کردار و بەرهەمی نەبێت، له‌ تەک بزمارێک سەد بزماری ديكه‌ لە تابووتی نەتەوە و نیشتمان دەدرێت.