شەوكەوتی مەلا سمایل كە یەكەم ئەفسەری پۆلیسی كورد بووە و، لە ساڵی 1961 پەیوەندی بە شۆڕشی ئەیلوول و ئەو هێزە تایبەتەوە كردووە، كە لەگەڵ مستەفا بارزانی بوون، یەكەم بەرپرسی بێتەلی شۆڕشی ئەیلوولیش بووە، لە دیدارێكدا پێی گوتم: «پۆلیسی كوردستان رۆڵێكی گەورەیان لە شۆڕشی ئەیلوولدا بینیوە، بۆیە زۆر جار دەڵێن، پۆلیس كۆڵەگەی شۆڕشی ئەیلوول بووە.»
ئەمڕۆ یادی پێشمەرگەیەكی قارەمان و دێرینی دیكەی كوردستان دەكەینەوە، كە ئەویش ئەفسەرێكی پۆلیس بووە و چۆتە ناو شۆڕشی ئەیلوول و، پلە پلە، پلەكانی پێشمەرگایەتی بڕیوە، هەتا لە دواییدا بووەتە سەرلق لە شۆڕشی ئەیلوولدا، ئەو پێشمەرگە دێرینەش (حاجی شێخ مەحموود باراوی)یە كە مخابن ماوەیەك پێش ئێستا بۆ هەتا هەتایە ماڵئاوایی لێ كردین.
دیارە ناسینی ئێمە لەگەڵ شێخ مەحموود و بنەماڵەكەی دەگەڕێتەوە بۆ دوای ساڵی 1975 و نسكۆی شۆڕشی ئەیلوول، بەڵام پێكەوە كاركردنمان وەك دوو هەڤاڵ و كادری پارتی، دەگەڕێتەوە بۆ ساڵانی دوای راپەڕین لە سنووری ناوچەی سلێمانی لە لقی چواردا.
شێخ مەحموود باراوی یەكێك بوو لە ئەندامانی رێكخراوی ئەیلوول، ئەو رێكخراوەش ببووە بەشێك لە رێكخراوێكی دیكە كە نووسەری ئەم دێڕانە لەو كاتەدا بەرپرسیاریەتی رێكخراوەكەی لە سەرشان بوو. بە دریژایی ئەو ساڵانە، هەتا شەڕی شوومی ناوخۆ لە دوای ئایاری 1994 كە سلێمانی پێ بەجێهێشتین، هەموو كات شیخ مەحموود وەك كادرێكی بەئەزموون و بەتەمەن، یەكێك بوو لە خۆشەویستەكانی ناو خەڵك و جەماوەر، ئەو هەرگیز لەسەر پرەنسیپی حزبایەتی كاری نەدەكرد و، هەمووكات كەسایەتییەكی دڵسۆز و نیشتمانپەروەر بوو، بەردەوامیش كاری بۆ هاندانی یەكڕیزی و دوورخستنەوەی دووبەرەكی لە نێوماڵی كوردستان دەكرد، بۆیە زۆر جار كە لە شوێنە گشتییەكانی ناوشاردا لەگەڵ خەڵك دەكەوتە قسەكردن و راگۆڕینەوە، پێداگری لەسەر ئەوە دەكرد، كە ئەوە ئازایەتی نییە سەنگەر لە برای خۆت بگری، ئێمە دوژمنێكی هاوبەشمان هەیە، كە جیاوازی لە نێوان هیچماندا ناكات. پێی دەگوتن: «كە هەڵەبجە كیماباران كرا، پرسیاری ئەوە نەكرا، كام پێشمەرگە هی پارتی، یان هی یەكێتی، یان هی كام لایەنە، لەبەر ئەوەی كوردبووین، هەموومان بە یەك چاو سەیر كراین و بە یەك فڕۆكە و یەك بۆمب كۆمەڵكوژ كراین.»
شێخ مەحموود لەكاتی تەنگانەدا (ئەوجا تەنگانەكە ئابووری بوایە، یان سیاسی)، كەسێكی بەویژدان و خۆڕاگر بوو. ئەو بە حوكمی ئەوەی تا راددەیەك ژیانێكی مامناوەندی هەبوو، زۆر جاران كە روومان لێ دەنا، هاوكاریی كەسوكاری شەهیدان، یان كەسانێكی كەمدەرامەت بكات، بە پێكەنین و وردە جنێودانێكی پڕخۆشەویسیتییەوە پێی دەگوتین: «ئێوە وەكیلی منن، چیتان بە باش زانی، بیكەن و پرس بە من مەكەن.»
شێخ مەحموود باراوی چەند ساڵێك بوو تووشی نەخۆشییەكی سەخت ببوو، بەڵام هەر جارێك لەگەڵ شێخ بەختیاری كوڕی سەردانیمان بكردایە، وەك پێشمەرگەكەی 1961 هانی دەداین و پێی دەگوتین: «ئێوە بە پاكی خەریكی كاری خۆتان بن، خەمی منتان نەبێت.» ئەگەر بیرەوەریم هەڵەی لەگەڵ نەكردبم، یەك دوو مانگێك پێش كۆچی دواییەكەی سەردانم كرد، لەو سەردانەدا پێی گوتم: «فەرهاد دەبێت پێش ئەوەی بمرم، دەوڵەتی كوردستان ببینم.» منیش پێم وت: «یاشێخ، سەرۆك مسعود بارزانی هەموو ژیان و تەمەنی خۆی بۆ ئەم پرسە تەرخان كردووە و، دڵنیابە ئەم كاروانە هەر دەگەیەنێتە جێی خۆی...» شێخ دوای ئەم قسانەم گوتی: «شەو و رۆژ دوعای بەخێر بۆ سەرۆك دەكەم و دەپاڕێمەوە تەمەنی منیش بخرێتە سەر تەمەنی.»
ئەمڕۆ چل رۆژ بە سەر كۆچی دوایی شێخ مەحموود باراوی، پێشمەرگەی دێرین و خاوەن ئیرادەدا تێدەپەڕێت. ئەوەی لێی فێربووم، ئەوەیە: ئێمە بە كوردایەتی سەر دەكەوین نەك حزبایەتی.