سه باره ت به هه لبژاردنى داهاتوو
سه‌لام عه‌بدوڵڵا
وا چاوەڕوان دەكرا كە لایەنە سیاسییەكانی كورد لە هەرێم بەیەك لیست بەشداری ئەو هەڵبژاردنە بكەن، بەڵام ناسازیی لایەنەكان ئەو هەلەی پەكخست كە دەتوانرا لەو ڕێگەیەوە هێز و توانای گەلەكەمان نیشانی دۆست و نەیاران بدەین یان هەر نەبێت پێكەوە بایكۆتی هەڵبژاردنەكان بكەین، چونكە دەسەڵاتدارانی بەغدا نەك دەستوور جێبەجێ ناكەن بەڵكو تەنها ئەو بڕگەو خاڵانەی دەستوور كە لەبەرژەوەندی خۆیانە جێبەجێ دەكەن و ئەوانەی سەبارەت بە هەرێمی كوردستانن پشتگوێ دەخەن كە پتر لە(50) خاڵی دەستوورییە،هەر بۆیە هەرێم بەدوای چارەسەری تردا دەگەڕا كە لەو ڕێگەیەوە مافەكانی دەستەبەر بكات.
ئێستا كە بارودۆخی سیاسی بەو جۆرەیە كە هەیەو پێویست دەكات بەشداری ئەو هەڵبژاردنە بین ئیدی ئەركی هێزە سیاسییەكانە كە كەسانی لێهاتوو و لێوەشاوە بۆ ئەو ئەنجوومەنە بنێرن كە بتوانن داكۆكی لە مافە دەستوورییەكانی گەلەكەمان بكەن، چونكە لە خولەكانی پێشووی ئەنجوومەنی نوێنەرانی عێراقدا بە ئاشكرا دیاربوو كە كەسانێك لەلایەن هەندێك هێزی سیاسییەوە نێردراوەتە بەغدا بەو حسابەی داكۆكی لە ماف و خاڵە دەستوورییەكانی بكات دەبینرا بەپێچەوانەوە ڕەفتار دەكات و هەندێك جار لە شۆڤینیستە عەرەبەكان و قەوارە دژ بە كوردەكان زیاتر دژایەتی هەرێم و بەرژەوەندییەكانی خودی هەرێمی كوردستانی دەكرد تەنانەت هەندێك لەوانە داڕێژەری نەخشەی داڕمانی ئابووری و هەڵوەشاندنەوەی خودی قەوارەی هەرێمی بۆ حكومەتی بەغدا پێشنیار دەكرد.
ئەوەیشی بە ئازادی و سەربەخۆیی لە قەڵەم دەداو ئەوكارەی دەخستە بابی هەڵوێست و تێڕوانینی شەخسی كە بەداخەوە قەوارەكانیش هیچ كاردانەوەیەكی كردەییان بەرامبەر وەرنەدەگرتن، بەڵام ئەوەی تێبینی دەكرێ ئەمجارەش هەندێك لایەن كەسانێكی داناوە كە بگاتە بەغدا كە هەر لەئێستاوە دروشمی بێ مانای وەكو دادگاییكردنی هەموو ئەوانەی بەشداری ڕیفراندۆمیان كردووە هەڵبڕیوە كە دەكاتە 93٪ دانیشتوانی هەرێم! بۆیە ئەمە مەترسییەكی گەورەیە گەر ئەم توخمانە بگەنە بەغدا، بۆیە دەنگدەر دەبێ زۆر هۆشیاربێت و دەنگ بەوانە نەدات كە دەبنە مایەی هەڵوەشاندنەوەی هەرێم و هەموو دەستكەوتەكان كە ئەوانە پێوەی ماندوو نەبوون.
\پارتی دیموكراتی كوردستان لەم(72) ساڵەی تەمەنیدا، ڕاستە، بە هەوراز و نشێوی زۆردا گوزەری كردووە، بەڵام هەرگیز لەسەر داوا ڕەواكانی گەلەكەمان سازیشی نەكردووە و لەو پێناوەشدا قوربانییەكی زۆری داوە، بۆیە دەنگدەر دەبێت ویژدانی بخاتە گەڕ كە دەنگ بەكێ دەدات و بزانێت لە بەغدا كێ دڵسۆزانە داكۆكی لە مافە ڕەواكانی گەلەكەی دەكات.
