ته نها دايالؤگ چاره سه ره
سه‌لام عه‌بدوڵڵا
لەم بڕیارە تاكلایەنەو هەڵە زەقەدا كە دەرهەق تەواوی دانیشتووانی هەرێم كرا، نە پەرلەمان نە ئەنجوومەنی وەزیران و نە مەراجیعی ئاینیش فزەیان لێوە نەهات، بۆیە ئەم بڕیارە چەوتە تا ئێستا بەردەوامە و چارەسەری بۆ نەكرا.
ئەمە سەرەڕای ئەوەی كە بڕیار بوو بەپێی ژمارەی دانیشتووانی هەرێم كورد بەشداربێت لە هێزی سەربازی عێراقیدا و پێشمەرگە وەك بەشێك لە مەنزومەی دیفاعی عێراق حسابی بۆ بكرێ كە ئەویش نەكرا، تەنانەت ئەو چەك و یارمەتیانەی لە رێگەی بەغدا بۆ پێشمەرگە دەنێردرا ئەویش دەستی بەسەردا دەگیراو رادەستی پێشمەرگە و هەرێم نەدەكرا، ئەمە لەكاتێكدا پێشمەرگەی هەرێمی كوردستان كاریگەرترین شەڕكەر بوون لە مەیدانی بەرەنگاربوونەوەی چەتەكانی داعشدا.
زۆر هەوڵ لە ماوەی ئەم چەند ساڵەی پێشوودا درا كە چارەسەرێك بۆ ئەو گرفتانە بدۆزینەوە، بەڵام حكوومەتی عێراقی لەسەر سیاسەتی ملهوڕی خۆی درێژەی بە هەڵوێستە چەوتەكانی دا، بۆیە ئیدی گەلەكەمان بڕیاری ریفراندۆمی دا، كە رۆژی 9/25دا جێبەجێ كردو ئەنجامەكەشی راگەیاندرا.
ئێستا ئیدی قۆناغێكی ترە، ئیدی ئەوە سیاسەتمەداران و حزبە كوردیەكان نین كە داوای خۆیان پێشكەشی حكوومەتی عێراقی دەكەن، ئەوە ئیتر زۆرینەی هەرە زۆری گەلە كە داوای چارەسەرێكی بنەڕەتی دەكات كە عێراق و عێراقییەكان لە كارەسات و ماڵوێرانی قوتار بكات، بۆیە ئیدی چارەسەری نیوە چڵ بە دەردی كەس ناخوات، بۆیە تەنها رێگەیەك بۆ ئەو داوا دیموكراتیەی كورد گفتوگۆیەكی ئاشتیانەیە كە نەخشەیەكی نوێ بۆ پەیوەندی ئەم دوو گەلە دابڕێژێ كە هەردوولا سوودمەند بێت لێی.
لە ڕاستیدا ئەزموونی نزیكەی سەدەیەك لە پێكەوە ژیانی سەرنەكەوتوو داوای ئەلتەرناتیڤێكی بەجێ دەكات كە خۆی لە دوو دراوسێی باشدا دەبینێتەوە، بۆیە زمانی گەڤ و هەڕەشە چارەسەری هیچ ناكات.
بۆیە چاكتروایە دەسەڵاتدارانی بەغدا گوێ لە 92٪ی خەڵكی هەرێمی كوردستان بگرن و دیالۆگ دەستپێبكەن.
