به يت و بالؤره ى ئيسرائيلى دووه م
سه‌لام عه‌بدوڵڵا
حكوومەتە جۆراوجۆرەكانی بەغدا هەركاتێك باسی مافی گەلەكەمان هاتبێتە ئاراوە گەر لایەنی هەرەكەمی ئەو داوایەش بووبێت وەكو لامەركەزی یان ئۆتۆنۆمی، ئەوا ئەوان ترسیان خستۆتە دڵی هاووڵاتیانی خۆیانەوە كە ئەم داوایانە هەر مەبەست لێی دامەزراندنی ئیسرائیلێكی ترە، لە "سەرووی عێراق"، بۆیە ئەم بەیت و بالۆرەیەی ئێستا دەبیسترێت، لەلایەن سیاسەتمەدارانی عێراقییەوە، مەسەلەیەكی نوێ نییە و پێش ئەوانیش دەسەڵاتدارانی بەغدا، رژێمەكە هەرچۆنێك بووبێت، ئەو جۆرە دەستەواژانەیان بۆ تۆقاندنی دانیشتوانیان بەكارهێناوە كە لە راستیدا هیچ پەیوەندییەكی بەیەكەوە نییە و قابیلی بەروارد نییە.
جووەكان، گەر بە هەر هۆكارێك بێت لە خاكی دێرینی خۆیان پەرتەوازە كرابن و هەزاران ساڵ لە دەربەدەریدا ژیابن و پاشان توانیبێتیان بگەڕێنەوە سەر خاكی مێژوویی خۆیان، ئەوا كورد هەمیشە لەسەر خاكی خۆی ژیاوە ئەگەرچی چەندین جار هێرشی زۆر دڕندانەی كراوەتە سەر و هەوڵی بەردەوامی قڕكردنی دراوە، بەڵام نەتوانراوە لە زێدی خۆی هەڵكەندرێت و خاكەكەی خۆی بەجێبهێڵێ، هەرچەندە حكوومەتە جیاجیاكانی عێراق چەندان جۆر سیاسەتی دژی گەلەكەمان بەكارهێنا، وەك ئەوەی عەرەبی بەزۆر دەهێنایە سەر خاكی كوردستان و بەزۆرە ملێ بە كوردی چۆڵ دەكرد، بەڵام هەر كار نەگەیشتە ئەوەی تەواوی كورد لەسەر خاكی خۆی نەهێڵێت، چونكە لەگەڵ بەهێزیی سەربازی دەسەڵاتدارانی بەغداشدا، هەمیشە گەلەكەمان خاوەنی هێزی خۆی بووە و بە هەموو شێوەیەك داكۆكی لە خەڵك و وڵاتی خۆی كردووە و گەر تووشی نشووستییەكیش بووبێت لە ئەنجامی نابەرانبەری تەرازووی هێزو و رێككەوتننامەی شەرمەزاراوی، ئەوا هەر زوو دەستی داوەتەوە خەبات و بەرەنگاری دوژمنانی بۆتەوە.
ئێستا پێویست بەوە ناكات ئەو راستییە دووبارە بكەینەوە كە ئێمە گەلێكی جیاوازین و زمان و كلتوور و مێژووی خۆمان هەیە و بەزۆر لكێندراوین بەم وڵاتەوە كە پێی دەڵێن عێراق و وا بۆ نزیكەی سەد ساڵ دەچێت لە پەیوەندییەكی زۆر نایەكسان و ناسروشتی داین لەگەڵ نەتەوەی سەردەست، بە مەزهەب جیا جیاكانیانەوە، بۆیە ئەو بڕیارە چارەنووسسازە دراوە كە لە 9/25 لە ڕاپرسییەكدا دەنگ بۆ سەربەخۆیی وڵاتمان بدەین و ئیدی ئێوەش كەیفی خۆتانە ناوی ئیسرائیلی دووەم یان هەر ناوێكی تری لێدەنێن بنێن.
بەڵام ئێمە لای خۆمانەوە ناوی دەنێین كۆماری فیدراڵی كوردستان، هەر چەند ئەوەش لەمەودوا دەستووری وڵات ئەو ناوە دیاری دەكات كە دەلالەت لە فرەیی و دیموكراسی و فیدراڵ بكات.
