گواستنەوەى بۆچوونى دوژمن ئازادى ڕا دەربڕين نييە
سه‌لام عه‌بدوڵڵا
ئەم چاوەڕوانییەش زۆر سەختر دەبێت كاتێك بمانەوێ دراوسێكانمان كە كوردی بێ ماف و بێ ناسنامەی تێدا دەژی، هەڵوێستی ئەرێنییان هەبێت، بۆیە ئەو هەڵمەتە بێ مانایەی میدیای ئەهلی و هەندێك لە حزبەكان سەبارەت بە هەموو ئەو هەواڵانەی كە دژایەتی ڕیفراندۆم و سەربەخۆیی كوردستان دەكەن تەنها خزمەت بە نەیارانی كورد و دۆزە ڕەواكەی دەكات و ورەی خەڵكی دادەبەزێنی و متمانە بەخۆمان لاواز دەكات و هیچی تر.
گەر ڕووماڵێكی ئەو میدیا و ماڵپەڕ و چاوپێكەوتنانە بكرێ كە دژی سەربەخۆیی و ڕۆژانە هەواڵ و ڕاپۆرت و بڵاودەكەنەوە ئەوسا دەزاندرێ كە چۆن ئەوانە كەوتوونەتە ژێر كاریگەری میدیای دوژمنانی كورد و قسەو بۆچوونەكانی ئەوانە دەجوونەوە. ئەمە سەرەڕای ئەو ترس و نیگەرانییەی دەیخەنە دڵی هاووڵاتیانەوە بەوەی لەكاتی بڕیاری سەربەخۆییدا سنوورەكان بەڕووماندا دادەخرێن و هەموو لە برساندا دەمرین.
نەتەنیا ئەوەش پڕوپاگەندە بڵاودەكەنەوە كە خەڵكی گەنم كۆبكاتەوە، چونكە ئەگەری نەمانی لە ئارادایە! ئەمە لەكاتێكدا هەرێم هەر ئەمساڵ زیاد لە 200 هەزار تۆن گەنمی زیادەی هەیە كە نازانێ چی لێبكات و بەغداش لێی ناكرێ. بەداخەوە تائێستا لایەنیش هەیە ئازادی ڕادەربڕین بەوە تێدەگات كە هەرچی دژی سەربەخۆیی و ڕیفراندۆم و هەرێم بوو بڵاوبكاتەوە و ئەوەش بە ڕەخسانی مۆڵەتی ئازادی ڕادەربڕین لە قەڵەم بدات كە لەڕاستیدا پێچەوانەیە، چونكە ئەو ڕا دژانە وەك خۆیان بڵاودەكرێنەوە بێ هیچ كۆمێنت و ڕایەك، بۆیە وەك حەقیقەت دەرخواردی هاووڵاتیانی هەرێم دەدرێت، ئایا پێویستە میدیای ئێمە ڕای كابرایەك كە بە ئیمزای ئەو سێ ساڵە بووجە و مووچەی هەرێم بڕدراوە بڵاوبكرێتەوە كە بێگومان لە دژایەتی زیاتری لێ شین نابێت.
یان بیروڕای مرۆڤێكی شۆڤێنی كۆنە ئیستیخبارات كە بەشداری ئەنفال و ماڵوێرانیەكانی كوردستانیان كردووە چ سوود بە ئێمەو دۆزەكەمان دەگەێنێت تا ئەو ژەهرە وەك ڕاستی بكرێ بە قورگی هاووڵاتی هەرێمدا. هەر بۆیە ئێستا كە بەرەو ڕیفراندۆم لە ڕۆژی 9/25 دا دەچین، پێویستەو پێویستیەكی نیشتمانییە لایەنە ئەرێنییەكانی سەربەخۆیی بۆ خەڵكی باسبكرێ و نەهامەتیەكانی بێ دەوڵەتی لەسەد ساڵی پێشوودا بۆ گەلەكەمان ئاشكرا بكرێ و لایەنە گەشەكانی دەوڵەت و سەربەخۆیی ڕاڤەبكرێ و گرنگی لەدەست نەدانی ئەم هەلە مێژووییە بخرێتەڕوو. بۆیە پێویستە ئیدی واز لە گواستنەوەی بیروڕای دوژمنانی سەربەخۆیی بهێنین و لەوە زیاتر گەلەكەمانی پێ چەواشە نەكەین.
