راستییە سیاسییەكەی كوردستان زۆر رۆشن و سادەیە، بەڵام هەوڵیاندا ئاڵۆزی بكەن. هەموو خەڵك لەو راستییە سادەیە تێدەگات، بەڵام ئیرهابی فكری سەروەختێك نەیدەهێشت كەس سەردەربێنێ و رای خۆی بڵێ. ئێستا كە ئیرهابی فكری رووی لە كزییە و هەژمونی جارانی نەماوە، پەیتا پەیتا نوخبەی سیاسی و روناكبیر و خوێنەوارانی ووڵات پشتیوانی خۆیان بۆ مافی رەوای گەلەكەیان و بۆ ریفراندۆم و سەربەخۆیی رادەگەیەنن و ناسڵەمنەوە.
راستییە سادەكە ئەوە بوو: كوردستان لە لایەن داعشەوە پەلاماردرا، حكومەتی بەغدا كە كوردستان بەشێكە لە قەڵەمڕەوەكەی، خۆی لێ نەكردە ساحێب و نەیپاراست، لە بری ئەوە بودجەشی لیبڕی و ئابڵوقەی خستەسەر. كوردستان وەك ئەوەی دەوڵەتێكی سەربەخۆ بێت، ئەركی پاراستنی كەوتە ئەستۆی رۆڵەكانی خۆی، وەك هەر دەوڵەتێكی سەربەخۆ پەنای بۆ كۆمەڵگەی نێودەوڵەتی برد و نائومێدیش نەكرا. لەو چركە ساتە مێژووییەدا كوردستان كەوتە بەردەم پرسیاری وجود و ناسنامە: ئایا ئەم هەرێمە چییە؟ ئەگەر بەشێكە لە عێراق، بۆ عێراق نەیپاراست، ئەگەر بەشێكە لە عێراق بۆ بەغدا ئابڵوقەی دەخاتەسەر. ئەگەر وانییە و بەشێك نییە لە عێراق و لە هەمان كاتیشدا دەوڵەت نییە، ئەدی چییە و چ ناسنامەیەكی هەیە؟ ئایا دەكرێت جوگرافیایەك لەم جیهانەدا هەبێت نە دەوڵەت بێ و نە دەوڵەت نەبێ. ئایا ئەو گەلەی لەم جوگرافیایەدا دەژی، دەتوانێ لەم دوڕیان و لەم جوگرافیا ئینتقالییە ناموستەقییڕەدا درێژە بەژیان بدات و لە داهاتووی دڵنیا بێ؟.
لە ساتەوەختی پەلاماری داعشدا، كورد كەوتە بەردەم ئیمتحانی چارەنووس، ئایا توانا و ئیرادەی خۆپاراستنی هەیە، دەتوانێ ئەو خاكه بپارێزێ كە ئیدیعای خاوەندارێتی دەكات تا دواتر دەنگی نێر بێ و بڵێ: دەمەوێ خۆم سەرداری ئەو خاكە بم كە پاراستم، كۆمەڵگەی نێودەوڵەتیش بێنێتە سەر ئەو باوەڕەوی كە گەلێك لەم جوگرافیا بێ ناسنامە و لەم فەراغە ترسناكەدا بێ هیچ گەرەنتییەك ژیان دەگوزەرێنێ و حەقی خۆیەتی بڕیارێك لە چارەنوسی خۆی بدات .
مەسعود بارزانی لە م چركە ساتە مێژووییەدا سەرۆكی هەرێم بوو، ئەركی مێژوویی لێیدەخواست رابەرایەتی گەلەكەی بكات لەم ئیمتیحانە سەختەدا. دەبوا بچێتە سەنگەر و فەرماندەیی رۆڵەكانی بكات لە تێكشكاندنی داعش و پاراستنی كوردستان و سەرخستنیدا. تا دواتر ئەو سەركەوتنە سەربازییە بكرێتە دەسكەوتی سیاسی و لە سەربەخۆیی كوردستاندا بەرجەستە ببێت.
ئەوان دەیانویست بارزانی لەم چركە مێژووییەدا دەستهەڵگرێ و ئەو كارە نەكات و بكشێتەوە. بێ باك لەوەی لە غیابی دەوڵەت و دامەزراوەی سەقامگرتووی پشتقایمی كوردستانپارێزدا، كشانەوەی ئەو جوامێرە بە شكستی كورد و سەركەوتنی داعش و مەحفبونەوەی كوردستان كۆتایی دەهات.
بارزانی هاوكاری نەكرا، پشتی نەگیرا، گێچەڵیشی پێكرا و سەدان لوغمی سیاسی خرایەپێش، ئەو بە پشتی پێشمەرگە و كوردپەروەران كۆڵینەدا و كارەكەی كرد و سەركەوتنی بەدەستهێنا و دونیای گەیاندە ئەو باوەڕەی كورد وڵاتی خۆی پێ دەپارێزرێ. ئێستا ئیدی لە قۆناغی تەرجەمەكردنی ئەو سەركەوتنە سەربازییەداین بۆ دەسكەوتی سیاسی، كە لە سەربەخۆیی كەمتر نییە و نابێ.
ئەوانەی لە شەڕی سەخت و خوێناوی بەزاندنی داعشدا، پشتی بارزانی و پێشمەرگە نەبوون، ئێستاش دەرفەتیان ماوە لەم شەڕە نەرمەی بەرەو سەربەخۆییدا، مودافع بن نەك لە بارزانی بەڵكو لە بەدیهاتنی مافی رەوای سەربەخۆیی میللەتی خۆیان. ئەو سەربەخۆییەی شەهیدان بەخوێن باجەكەیان دا و ئەركی ئێمە تەنیا ئەوەندەیە ئەو باجە گرانە لە پێناو تەسكبینی حزبی و خودپەسەندیدا بە فیڕۆ نەدەین.
گەر درۆ و چەواشەكاری و گەوجاندن و كۆنەقین و ئیرهابی فكری لێگەڕێ، راستییە سیاسییەكەی كوردستان زۆر لەوە سادەترە شەرح و تەفسیری بوێت. بۆیەش رۆژ بە رۆژ بەرەی سەربەخۆییخوازی فراوانتر و بەرەی دژە سەربەخۆیی نابوتتر دەبێت.