میستەرەكان!
April 30, 2017
وتار و بیروڕا
نامەی شەرمئاوەر و بێ مستەوا و پڕ غەڵەت و پەڵەت و هاوكاتیش دژ بە ئاوات و ئامانجەكانی كورد، كە ئەو چوار پۆپۆلیستە بە ناوی كوردەوە و بە هاوكاری پەكەكە، داویانە بە هەندێ پەرلەمانتاری ئەوروپی، لە تۆڕە كۆمەڵایەتییەكاندا بە داخ و مخابنەوە ئەمدەست ئەو دەست دەكات و هەموان لێی شەرمەزارن.
جاری جاران رژێمەكانی بەغدا، بۆ رێگرتن لە زیادبونی پشتیوانی دەرەكی بۆ كورد و شۆڕشەكەی، پەنایان بۆ زۆر رێكار دەبرد، یەك لەوانە ناردنی هەندێ زۆڵە كورد بوو بە جلی كوردییەوە و لەرێی سەفارەتخانەكانی عێراقەوە بۆ دەرەوە تا لەوێ دژی كورد و شۆڕشەكەی و داوا رەواكانی، بە ناوی كوردەوە قسە بكەن.
ناوەڕۆكی نامە شەرمئاوەر و عەیبدارەكەی ئەو چوار كەسەش كە هیچ نییە جگە لەوەی دەڵێن : كورد نەیتوانیوە خۆی بەڕێوەببات و بۆیە شایانی بەدەوڵەت بوون و سەربەخۆیی نییە، هەمان دیمەنی ئەو كوردە شەرواڵ خوارانەی سەردەمی بەعسمان بیردێنێتەوە.
ئاخر نەك هەر نوێنەرانی كورد، لەم ئان و ساتەدا تەنانەت دۆستانی كورد و ئەوەی بە خوێی چێشتیش پێمان دەگات، دەمیان بە هەر نێوەندێك بگات دیفاع لە مەزڵومی و گەمارۆدروای ئابوری و سیاسی و دیفاع لە مافی موستەحەقی سەربەخۆیی و ئازادی خەڵكی كوردستان دەكەن. حاڵی حازر تەنانەت دوژمنە سەرسەختەكانیشمان شەرم ئەكەن دژی مافی چارەنوسی گەلی كورد بە راشكاوی قسە بكەن و بۆیە پەنا بۆ پەڵپ و بیانوو دەبەن . چ جای كورد هەبن بە ئینگلیزییەكی شەق و شڕ و ئابڕوبەرەوە لێرەوە هەڵتەك هەڵتەك بچنە ئەوروپا و بێ شەرم و سڵەمینەوە هەم بە نەخوێنەواری و بێ ئەتەكێتی و هەم بە هەڵبەستنی درۆ و دەلەسە، هەوڵی ناشرینكردن و ناشایستەكردنی میللەتی خۆیان بدەن.
هەڵوێستی نانیشتمانی و دژە سەربەخۆیی ئەمانە، تەفسیری ناوێ و ناسنامە و پاشخانیان دیارە، بەڵام نەخوێندەواری و نەزانینە ئابڕوبەرەكەیان دوو سێ هۆكاری هەیە :
- ئەمانە لەسەر ئەوە پەروەردە نەبوون وەك نوێنەری گەل لە نێوەندەكاندا دیفاع لە میلەتەكەیان بكەن هەر بۆیە قەت كاریان بە فێر بوونی زمان و ئەتەكێت و پرۆتۆكۆل و رێ و رەسمی ئامادەبوون و قسەكردنی ئەو نێوەندانە نەبووە.
- ئەمانە پۆپۆلیست و كارەكتەری بچوكی لۆكاڵین، ئەهلی چەلەحانێ و زمانی بازاڕی و فڕیودەری عەوام وشەڕە بوتڵی نێو پەرلەمان و رەمللێدان و سێركبازی سەر شاشەی كەناڵە نێوخۆییەكانن. بۆ مەحافلی دەولی و دەرەوە و نێو مەجلیسان ناشێن.
- ئەمانە قاڵبووی كۆڕی خەبات دژی داگیركەر و دوژمنانی كورد نین تا بتوانن نوێنەری دۆزی رەوای گەلەكەیان بن، ئەمانە لە پەنجەرەی تەسكی حزبایەتی لۆكاڵی و لە نێو شەرەبەردی نێوخۆیی مەهزەلەی بەردەركی سەرا و لە دژی موئەسەساتی بە خوێن بەرهەمهاتووی گەلی خۆیان هەڵتۆقین و لەسەری لوتی خۆیان بەرزتر ناتوانن ببینن.
ئەوان خەتابار نین و هەر ئەوەن كە هەن. خەتابار ئێمەی دەنگدەرین، كە زۆر خەمسارد و بێ دیققەت بەشێكی زۆری دەنگەكانی خۆمان دۆڕاند و نەك هەر ئەم چوار میستەرە، پەرلەمانمان پڕ كرد لەم جۆرە میستەرانە تا پەكی كەوت و نەیتوانی ئەركی نیشتمانی و چارەنوسسازی خۆی راپەرێنێ.
با ئەمە دەرس بێت بۆ هەڵبژاردنی داهاتوو.