ئەمە ئەسلی خیلافەكەیە، ئایا ئێمە نەتەوەیەكی هاوشانی نەتەوەكانی دیكەین و شایستە بە سەربەخۆیی و مافی چارەنووسین و لە میللەتانی دیكە كەمتر نین، یان سەپانی بابی فارس و تورك و عەرەبین و لە كانتۆن زیاترمان شایان نییە و دەبێ بە ناوی قێزەونی (ئوممەتی دیموقراتی)یەوە تا ئەبەد پاشكۆ و خزمەتكار و بچوكی ئەوان بین!!.
پەكەكە بە عالەمی ئاشكرا ئەوەی دەوێت، بێ سڵەمینەوە تفەنگێكی تەحتەل تەلەب و چەتەی نێودەوڵەتییە دژی سەربەخۆیی كوردستان بەدەستی داگیركەرانەوە. لە هەر كوێی كوردستان ئومێدێك و تەقەللایەك بەرەو مافی نەتەوەیی رووی لەسەركەوتن بێ، ئەو لەوێیە تا رێگری لێبكات و شەڕی پێ بفرۆشێ و لە جیاتی داگیركەران سەنگەری لێ بگرێت. لە باكور گەورەترین دەرفەتی سیاسیی لەدەست كورد دەرهێنا و هێز و بەهانەی پەلاماری بە دەوڵەتی تورك بەخشی و، كورد و بزاڤە سیاسییە دیموكراتییەكەی شكستخواردوو كرد. لە رۆژهەڵات دەروازەكانی سنوری لە تێكۆشەران گرت و بووە پاسداری دەوڵەتی ئێران، لە رۆژئاوای كوردستان دەرفەتێكی بێ وێنەی لە كورد فەوتاند و هەزاران گەنجی كوردی كرد بە شەببیحەی بەششار ئەسەد و كردنی بەگژ هێزە كوردپەروەرەكاندا و لەشەڕێكی بێ مەتڵەبی سیاسییدا بەكوشتیدان. لە باشوریش دەیەوێت كوردانی ئیزیدی لە كورد و كوردایەتی دور خاتەوە و بەعەرەب و غەیرە كورد لەقەڵەمیان بدات و بیانكات بە حەشدی شەعبی و دژی میللەتی خۆیان بەكاریان بێنێ . دەیەوێت شنگال بكاتە پێگەیەكی ئیقلیمی و دژ بە خواستەكانی سەربەخۆیی كوردستان و دژ بە ئیرادەی نێودەوڵەتی بیخاتە خزمەت هێزێكی ئیقلیمییەوە.
بەرپرسەكانی پەكەكە نایشارنەوە و بە ئاشكرا دەڵێن رێگەنادەن دەوڵەتی سەربەخۆی كوردستان دروست بێت و پارێزگاریی لە یەكپارچەیی ووڵاتانی داگیركەری كوردستان دەكەن. كوردایەتی بە فاشیزم و سەربەخۆییخوازی بە بیرێكی شۆڤێنیزمی دەزانن و بە پشتی ئوممەی دیموقراتی(كە مەبەستیان دەوڵەتانی داگیركەری كوردستانە) دژی دەوەستن. ئەوان دەڵێن كورد دەبێت لە بۆدەقەی ئوممەتی دیموقراتیدا بتوێتەوە و دابەشی كەنتۆنات بێت و دەست لە ناسنامەی نەتەوەی خۆی هەڵگرێت. وەك چۆن بەعسی و شۆژێنییەكانی عەرەبیش دەیانویست و دەیانەوێ كورد لە بۆدەقەی عەرەبایەتیدا بتوێتەوە، توركیش دەیانەوێ توركی چیایی بین، فارسیش بە ناوی هاونەژادییەوە تایبتمەندی نەتەوەییمان دەسڕنەوە و نكۆڵیمان لێ دەكەن. داعش و هاوكوفەكانیشی دەیانەوێت لە بۆدەقەی ئوممەتی ئیسلامدا بتوێینەوە و بێ ماف و بێ ووڵات و بێ ناسنامە بین. پەكەكە دەیەوێت بە هەموو دونیا بڵێ كە كورد سەربەخۆیی ناوێت و بە هەموو توانایەكی دژی سەربەخۆیی شەڕ دەكات. ئەمە ئامانج و دروشمی ئاشكرا و بێ رتوشی پەكەكەیە هەر بۆیەش كۆی داگیركەرانی كوردستان پشتگیریی و هاوكاری دەكەن.
لە خیتابی شەڕانگێزانەی قەرەیلان و بەرپرسەكانی پەكەكە لە نەورۆزدا دیار بوو قۆڵی شەڕیان لە دژی كورد و پێشمەرگە هەڵماڵیوە و بە نیازی كشانەوە و دەستهەڵگرتن و گوێگرتن لە دەنگی عەقڵ نین. بەڵكو دەیانەوێ وجودی عەسكەریی خۆیان زیاتر بەسەر باشوری كوردستاندا بسەپێنن و بەدەردی رۆژئاوای ببەن. لەوەشدا سوود لەو هێزە دۆڕاو و بێ شیرازە و بێ ئیرادانە وەردەگرن كە لە باشور پشتگیریی لەهەر ناحەز و پیلانگێڕێك دەكەن كە دژی پارتی و رەوتی سەربەخۆیی بێت.
لە كۆی ئەم موعادەلەیەدا، پەكەكە و پشتیوانە شەرمەزارەكانی راستییەكی جەوهەرییان لە بیر چووە، ئەویش ئەوەیە كە پەكەكە لە روانگای جیهاندا لەسەر لیستی تیرۆرە و بە هیچ شێوەیەك رێگەی نادەن ببێتە بەشێك لە مەشهەدیی سیاسیی باشوری كوردستان، سەرباری ئەو ناوبانگە قێزەونەش، ئێستا بۆتە تفەنگی دەستی جەمسەبەندییەكی ئیقلیمی كە لە دیدی جیهاندا رێگرە لە حەسمبوونی شەڕی دژە تیرۆر و گەرانەوەی ئۆقرەیی سیاسی لە ناوچەی رۆژهەڵاتی ناوەڕاستدا، بۆیە گرەوەكەی پەكەكە دۆڕاوە و لەویش دۆڕاوتر ئەو هێزە لۆكاڵی و لاواز و بێ ئیرادانەن كە چارەنوسی خۆیان بە پەكەكەوە گرێداوە .