دیسانەوە دەڵێین دەوڵەت پێویستە
سه‌لام عه‌بدوڵڵا
جا بۆیە تا ئەو سنوورانە لەلایەن خۆمانەوە نەپارێزرێت، ئەو مۆڵەتە هەر بۆ تیرۆریستان دەرەخسێت، ئەگەرچی لەكۆتاییدا كەلاكیان بەكوژراوی لەنێو هەرێم بەجێ دەمێنێت، بەڵام دەتوانن زیانی گیانی و ماددی بەهەرێم بگەیەنن.
ئەمە جارێكی تر ئەو راستییە حاشا هەڵنەگرە ئاشكرا دەكات كە تا ئێمە نەبینە دەوڵەت ئەو مەترسییە هەردەمێنێت، بۆیە زۆر جێی سەرسوڕمانە كە هەندێك تا ئێستاو ئەم راستیانەش بەچاوی خۆیان دەبینین، ئەوا بێ پەروا دژایەتی هەوڵی درووستبوونی دەوڵەت دەكەن و خەڵكی لەو داوا رەوایە سارد دەكەنەوە كە تەنها سوودمەند لێی، ناحەزانی كوردستانە.
لەڕاستیدا هەموو ئەو كارەسات و ماڵوێرانی و ئەنفال و كیمیاباران و گۆڕینی دیمۆگرافیا و نیشتەجێكردنی غەیرە كورد و راگواستنی كورد لەزێدی باووباپیرانیان، هەر بۆ ئەوە دەگەڕێتەوە كە كورد خاوەنی دەوڵەت نەبووە و سنوورێكی دیاریكراوی دانپێدانراوی نێودەوڵەتی نەبووە، بۆیە حكومەتە یەك لەدوای یەكەكان، بەئارەزووی خۆیان، بێ ترس لە لێپرسینەوە، هەرچی توانیویانە دژی كورد كردوویانە و جیهانیش بەو حوكمەی ئەوەی روودەدات لەچوارچێوەی ناوخۆدا روودەدات، لەزۆربەی كاتدا، بێ دەنگی هەڵبژاردووە، بەڵام گەر كورد خاوەنی دەوڵەتی سەربەخۆی خۆی و سنووری دیاریكراوی خۆی ببوایە، دیارە كە بارودۆخەكەی بە جۆرێكی تر دەبوو، چونكە ئەوكاتە دەیتوانی ئەو زوڵم و دەستدرێژیانەی كە دەكرایە سەری هەر نەبێت بیگەیاندایە نەتەوەیەكگرتووەكان و دام و دەستگاكانی جیهان، كە بێگومان بێدەنگ نەدەبوون.
ئێستا كەخاوەنی دەوڵەت نین، هەست بەو بێ دەوڵەتییە لە مەحفەلە دەولیەكاندا دەكەین، سەیر، وەزیری دەرەوەی عێراق دەچێتە نەتەوە یەكگرتووەكان و بەیەك وشەش نە باسی كورد و نەباسی پێشمەرگە دەكات، ئەمە لەكاتێكدا پێشمەرگە گیانبەخشەكانی كورد شەڕێكی قارەمانانە دژی رێكخراوی تیرۆریستی داعش دەكەن و لەو پێناوەشدا 1500 شەهید و نزیكەی دە هەزار بریندار دەدەن، بەڵام گەر كورد خاوەنی دەوڵەتی خۆی بوایە ئەوا دەیتوانی ئەو راستیانە بۆ جیهان و لەنێو دام و دەستگا دەوڵەتیەكاندا وەك خۆی باس بكات و جیهان لەو شەڕە بێ وێنەیەی كورد كە لەباتی جیهان دەیكات، ئاگادار بكات.
لەكۆتاییدا دەڵێم، گەر لەم هەلەدا نەبینە دەوڵەت، ئەوا ئەوانەی بەخوێن و قوربانیش بەدەستهاتوون دەكەوێتە مەترسییەوە، ئەوەنییە دەڵێن توركیا بەعێراقی وتووە گەر پەیوەندیەكانمان لەگەڵ ئێوە چاك بێت پشت دەكەینە هەرێم و ئەوەش ئێرانە كە هەڵوێستی خۆی بەرامبەر هەرێم ناشارێتەوە.
