دوای جەنگی یەكەمی جیهان ئیمپراتۆریەتی عوسمانی هەرەسی هێناو و جارێكی دیكەش نەخشەی ناوچەی رۆژهەڵاتی ناوەڕاست بەپێی بەرژەوەندییەكانی كۆڵۆنیالیستە براوەكانی جەنگ كێشرایەوە، لەو كاتەوە رژێمە داگیركارەكانی كوردستان رەواج بۆ بیرۆكەیەك دەكەن كە گوایە ئەستەمە قەوارەیەكی كوردی دابمەزرێت، یان هەر هەوڵێك بۆ دامەزراندنی دەوڵەتی كوردستان ئەوا لە رۆژانی یەكەمدا هەرەس دەهێنێت، ئەگەر لە كاتژمێرەكانی یەكەمیشدا ئەمە روونەدات، بۆیە ئەستەمە ئیسڕائیلێكی دیكە بێتەئاراوەو ...تاد، قەوانی سواوی ئەم هەموو تۆمەتانە تەنیا بۆ رێگەگرتن و ئاستەنگ دانانە لەبەردەم گەلی كوردستان تا بە مافە نیشتمانییەكانی خۆی نەگات و نەتوانێت وەك هەموو كۆمەڵگە مرۆییەكانی دیكەی ئەم جیهانە بە سەربەستی بژی.
هەڵوێستی رژێمە دیكتاتۆرە داگیركارەكانی كوردستان و دڕندایەتیی ئەوان لە مامەڵەكردن لەگەڵ دۆزی گەلی كورد بە درێژایی سەدەیەك زانرا و چاوەڕوانكراویش بوو، بەڵام ئەوەی چاوەڕواننەكراوە و مایەی بڕواپێكردن نییە هەڵوێستی هەندێ لایەن و پێكهاتە سیاسییەكان و چەند كەسانێكە كە لەسەر توێژی رۆشنبیرو نیشتمانپەروەر حیسابكراون، ئەوانە هەر تووتی ئاسا ئەو قسەو قسەڵۆكە رەگەزپەرستانە دووبارە دەكەنەوە و لاسایی ئەو مەرامە پڕوپووچانە دەكەنەوە دەربارەی ئەوەی كە ئەستەمە كوردستان ئازادبكرێت و دەوڵەتی نیشتمانی و نەتەوەیی و دیموكراسیی خۆی دابمەزرێنێت.
راستە كەلتووری داگیركار هەر چۆنێك بێت و لە روانگەی خۆبەزلزانینی نەتەوەییەوە هەموو هەوڵێكی بە درێژایی نزیكەی سەد ساڵ بۆ ئەوە بووە كە بوون و ناسنامەی نەتەوەیی كورد بسڕێتەوەو كەلتووری نیشتمانیی كورد بشێوێنێت و لە رەگوڕیشە مێژووییەكەیەوە هەڵیبكێشێت و هەڵمەتی سیستماتیكی شۆردنەوەی مێشك ئەنجام بدات، لەوانەش بێبەشكردنی لە بەكارهێنانی زمانی دایك، لە هەندێ حاڵەتی باشتریشدا گوایە زمانێكی دواكەوتووە و لەگەڵ پێداویستییەكانی سەردەم ناگونجێت، بێگومان ئەو هەوڵە ستەمكارە نامرۆییانە كە بەشێكن لە هەزاران هەوڵی نەگریسی دیكە شوێنەواریان لێرەو لەوێ لەسەر عەقڵییەتی هەندێ كەس و شێوازی بیركردنەوەو شرۆڤەكردنیان بۆ واقیعەكە بەجێهێشتووە، بە جۆرێك كە نازانن چۆن هەمان ئەو پڕوپاگەندەو قسەوقسەڵۆكانەی رەگەزپەرستان و دوژمنانی میللەت دووبارەبكەنەوە كە گوایە ئەستەمە كورد مافی نەتەوەیی خۆی بەدەست بهێنێت، لەمەشدا پاساو و پۆزشی بێ ماناو بێ ناوەڕۆك دەهێننەوە كە راستەوخۆ خزمەتی ئەو بۆچوون و مەرامە چەوت و نەگریسەی دوژمنان دەكەن، هەر بەوەش ناوەستن، بەڵكو بە جۆرێك پڕۆپاگەندەكانیان تۆختر دەكەنەوە كە گوایە هەر هەوڵدانێك بۆ ئازادی و دابینكردن و بەدەستهێنانی سەربەخۆیی هەوڵێكی نەزۆكە و لە ئەنجامدا دەبێ گەلی كوردستان باجێكی زۆر گەورە بدات و دواتر لەمەشدا مایەپووچ دەبن و هیچ پێشكەوتنێك بەدەست ناهێنن.
ئەو پرسیارەی كە دێتە پێشەوەو خۆی دەسەپێنێت ئەوەیە: ئەو رژێمە داگیركارانەی كوردستان دەیانەوێت چی لەوە زیاتر بكەن كە بەدرێژایی سەد ساڵی رابردوو بەرامبەر كورد ئەنجامیان دا؟
هەوڵی سڕینەوەی بوونی گەلی كورد بە چەندین شێوەی دڕندانەو قێزەوەن ئەنجامدراوە، تەنانەت گەلی كوردستان و بزووتنەوە نیشتمانییەكەی رووبەڕووی چەكی كیمیایی و بایۆلۆجی بۆتەوەو دەیان شاڵاوی دیارو نادیارو ئەنفال و جینۆسایدی بەرامبەر كرا، سەرەڕای زیندانیكردنی هەزاران رۆڵەی ئەو میللەتە و رشتنی خوێن و لەسێدارەدان و زیندەبەچاڵكردن، هەر ئەمانەش نا، بەڵكو ئاوارەكردن و راگواستنی زۆرەملێی و گۆڕینی واقیعی دانیشتووان و خاپووركردنی زیاتر لە هەشت هەزار گوند لە سەرتاسەری كوردستان، كەواتە دەیانەوێت لەمە زیاتر چی بكەن ئەگەر گەلی كوردستان بڕیاری سەربەخۆیی خۆی راگەیاند لەپێناو رزگاربوون لە دیلیی و كۆت و زنجیری كۆلۆنیالیزمی داگیركار؟ بەتایبەتیش كە دوژمنانی گەلی كوردستان لەم قۆناغەی مێژووی ناوچەكەدا بە سەختترین هەلومەرج و بارودۆخدا تێپەڕدەبن لە ئەنجامی بەردەوامبوونیان لە ستەمكردن و پشتگیریكردن لە رژێمە سەركوتكارە دواكەوتووەكان لەگەڵ گەشەكردنی بزووتنەوە دیموكراسیخوازەكان لە كۆمەڵگەكانیاندا، هەروەها كەڵەكەبوونی گۆڕانكاری و پەرەسەندنەكانی بواری بەرگریكردن لە مافەكانی مرۆڤ لەسەر هەردوو ئاستی ئیقلیمی و نێودەوڵەتیدا.
بەڵێ ئەو رژێمە دیكتاتۆرییانە هەرگیز ناتوانن لەمە زیاتر پڵنگ ئاسا كەڵپەیان لە جەستەی میللەت گیربكەن، بۆیە ئێستا كاتی ئەوە هاتووە كە ئەو كەسانە جارێكی دیكە بەخۆیاندا بچنەوەو ئەو خەیاڵانە لە مێشكی خۆیان دەربكەن، چی دیكە كوێرانە لاسایی مەرامی داگیركاران نەكەنەوەو ئاوێتەی بیروبۆچوونیان نەبن و پشتیوانییان لێ نەكەن، بە لای كەم ئەو قسەیەی پێش زیاتر لە نیو سەدەی جەواهیر لال نەهرۆی پێشەوای كۆچكردووی هیندستان بێننەوە یادی خۆیان كە دەڵێت: ئەستەمە خەباتی گەلی كوردستان لەپێناو ئازادی دابمركێنرێتەوە لە كاتێكدا كە ئامادەیە قوربانیی بۆ بدات، دیارە ئەو قوربانییەش هەمیشە لەوە زیاتر نابێت كە تا ئێستا گەلی كورد داویەتی، ئازادییش لە هەموو حاڵەتێكدا شایانی ئەو قوربانیدانەیە، چونكە مرۆڤ تەنیا بە نان ناژی.