لەو وتانەی كە هەمیشە لەم قۆناغە خوێناوییەی مرۆڤایەتیدا دەگوترێتەوە قسەیەكی "عەبدڵای كوڕی عەبدولعەزیز" پاشای پێشووی وڵاتی سعودیەیە، كە هەردەم دەیگوت: "تیرۆریست هیچی لەگەڵ ناكرێ، چونكە ئەو هاتووە خۆی بكوژێت". دەڵێم: نەما تا ببینێ تیرۆریست بە چی كۆنترۆڵ دەكرێ و چی لەگەڵ دەكرێ؟ بە پێشمەرگە و بەس، ئەوە چ پەروەردەیەكە لەو دیو ئەو ڕۆحە پیرۆزەی ئێوەوەیە و وزەتان پێ دەبەخشێت، تا لە مردن سڵ نەكەنەوە؟ دەبێ سیاسییەكانمان، دانیشتووی بەر سپلێت و فێنككەرەوەكان، ئەوانەیش كە لە قسەی زل بەولاوە چیدی نازانن، بێن لە پێشمەرگە فێری گیانفیدایی و لە خۆ بوردەیی ببن، كەسمان نییە كە ئەمڕۆ بە ڕۆح لەوجیهانە نەژین كە ئێستا دەگوزەرێ لەبەرەكانی شەر.
خوا بۆخواتری ناوە جوانەكانی خۆی بتان پارێزێت و سەربەرزی دنیا و قیامەتتان بكات، سەربەرزی بۆ من كە تۆم بە برای گەورە دانە "بارزانی"، لەكاتێكدا زۆرێك لەوانەی چاوی شەمشەمەكوێرەییان نابێنێ و پێیان نا خۆشە بە باڵای بەرزی پڕ لە سەروەریتا بنواڕن و، پێشبڕكێی پایتەخت گۆڕینیانە بۆ دۆڕان، تۆ لە پێشەوەی، بۆ گیان بەخشین و ڕزگار كردنی دوا بستی خاكی كوردستان و، بۆ جێبەجێكردنی دروشمە هەتاهەتاییەكەت، یان كوردستان یاخود نەمان.