شەڕی داعش و تێكشكاندنی دەوڵەتەكەی بەغدادی، بەرەو دوا قۆناغەكانی كۆتایی دەچێ. كورد ئەو هێزە بوو كە لەسەرەتاوە پێشڕەوی و سەركەوتنەكانی داعشی راگرت و بەرەنگارییان بۆوە و ترسی مرۆڤایەتیی لە داعش شكاند. پێشمەرگە ئەو تاكە هێزە بوو كە لە جیاتی هەموو جیهان بەرسنگی لە داعش گرت و پاشەكشەی پێكرد . بە كۆتایی هاتنی شەڕی داعش سەركەوتووەكانی جەنگ دوبارە نەخشەی جێوسیاسیی ناوچەكە دادەڕێژنەوە، كورد یەكێكە لە براوە سەرەكییەكانی جەنگ، بۆیەش دەبێ لە داڕشتنەوەی نەخشەی ناوچەكەدا رۆڵ و نەخشی هەبێت. ئارامبونەوەو گێڕانەوەی سەقامگیریی سیاسی بۆ رۆژهەڵاتی ناوەڕاست تا جارێكی دیكە مەترسیی وەك داعشی تێدا شین نەبێتەوە و كۆی بەها و بەرژەوەندییەكانی جیهان نەكەونەوە بەر هەڕەشە، داڕشتنەوە و تەرتیبات و سیستمێكی نوێ دەخوازێ. ئەو ووڵاتانەی داعشیان تێدا هەراش بوو، زەحمەتە بە نەخشە و پێكهاتە و سیستمی ئێستایانەوە بمێنن. عێراق یەك لەوانەیە.كورد لە عێراقدا نە فیدرالیزم پاراستی و نە توانی عێراقییەكان بە شەراكەت و برابەشی قانع بكات. نە توانیشی بە پاشكۆیەتی هەتاهەتایی قایل بێت. ئیدی كورد لەبەردەم بژاردەیەكی چارەنوسسازدایە. دەبێ لە ئێستاوە چارەنوسی خۆی بۆ قۆناغی دوای داعش دیاری بكات و بڕیاری یەكلاكەرەوە بدات.
ئەو هێزە ئیقلیمییانەی سەربەخۆیی كوردستانیان پێ ئیستعاب ناكرێ و رێگریی لێ دەكەن، لە ئێستاوە كەوتونەخۆ بۆ گەلەكۆمەكێ و لەبەین بردنی پرۆژەی كورد. گرەویان لەسەر ئەوەیە كورد لە نێوخۆدا ناكۆكن و دەكرێ ئیش لەسەر قوڵكردنەوەی ئەو ناكۆكیانە بكرێ. ئەو منەتەی ئەمڕۆ ئەمریكا و رۆژئاوا بە كوردیان هەیە رەنگە دوای شەڕی داعش نەمێنێ. بازنەی ئابڵوقە و گەمارۆ بە ئاستێك لەسەر كورد بەرتەسك بكەنەوە كە لە پێناوی ژیانێكی كولەمەرگی و پاروەنانێكدا دەستبەرداری خەون و ئاواتی لە مێژینەی بێت و لە ئامانجەكەی پاشگەز بێتەوە.
كۆتایی شەڕی داعش ( بە جیاوازی سەردەمی ئێستا و ئەوسا) لە روانگای داگیركەرانی كوردستانەوە، لە سەروەختی كۆتایی شەڕی عێراق و ئێران دەچێت. بۆیە لە ئێستاوە تەمایان بە دەستكرانەوەی دوای نەمانی داعش هەیە تا لێبڕاو بن بۆ گیانی كورد. ئەوەتا لە ئێستاوە ئاماژەكانی سەربەیەكدا كردن و كۆبونەوەی چوارقۆڵی و یەكخستنی هەڵوێست دژی سەربەخۆیی كوردستان وا دەردەكەون. بەڵام هاوتەریب لەگەڵ ئەو پیلان و هەڕەشانە، تێگەیشتنێكی نێودەوڵەتی و هەل و مەرجێكی بابەتی و ئیرادەیەكی كوردی شێلگیرانە بۆ سەربەخۆیی هەیە كە تەنیا هاودەنگیی و كۆبونەوەی تێكڕای هێزە سیاسییەكانی كوردی لە دەور پێویستە.
لەبەردەم هەڕەشەیەكی لەوجۆرە و هەلو مەرجێكی رەخساوی وەهادا، كورد دەبێ كارێك بكات پێش ئەوەی شەڕی داعش یەكلابێتەوە، چارەنوسی خۆی یەكلاكردبێتەوە و بڕیاری خۆی دابێ و سەروەری بەدەستهێنابێ، تا وەك ووڵاتێكی سەربەخۆ یاسای نێودەوڵەتی لەهەر جۆرە دەستدرێژی و تەجاوز و پەلامارێكی ئیقلیمی بیپارێزێ. دەنا بەم رەوشەی ئێستا و بێ ناسنامە و بێ سنور و بێ سەروەری، دەكرێ نەك هەر رێگەی سەربەخۆیی لێ ببەسترێ، بەڵكو سەركەوتنەكان و رۆڵی پێشەنگانەشی لە شەڕی داعشدا لێ بدزرێ و بخرێتە گیرفانی خەڵكی دیكەوە و هەموو دەسكەوتەكانی ئێستاشی لێ بسێندرێتەوە و بگەڕێتەوە بۆ چوارگۆشەی یەكەم. ئاخر پەلاماردانی هەرێمێكی بێدەوڵەت و
نەپارێزراو دواي گۆڕانی موعادەلاتی ئێستای ناوچەكە، ئاسانەو دەرگا لەسەر هەموو جۆرە هەڕەشەیەك كراوەیە. بەڵام ئەگەر تا ئەودەمە كوردستان سەربەخۆ بوبێت، هیچ هێزێكی ئیقلیمی ناتوانێ سەروەری و سنور و بەرژەوەندییەكانی ووڵاتێكی سەربەخۆ و خاوەن سەروەری پێشێل بكات.
لە دوای كۆتایی شەڕی داعش ئەوەی كوردستان لەهەر مەترسی و ئەگەر و پەلامارێك دەپارێزێ تەنیا بڕیاری بوێرانە و لەدواخستن نەهاتووی كورد خۆیەتی. بڕیاری جەسورانە و چاونەترسانەی ئیعلانی سەربەخۆیی.
كورد دەبێ خۆی و هەموو فاكتەرە هاندەر و ئاسانكارەكان و كۆی هەل و مەرجەكە بۆ سەربەخۆیی كۆكاتەوە بەرلەوەی ناحەزانی سەربەخۆیی كوردستان هەموو هێز و توانیان بۆ لەبەین بردنی كۆكەنەوە.