بە دەست خۆم نییە ئەم سیاسەتە دوا نەبڕاوە كۆتایی و لەبن نەهاتووە، گرێبان و یەقەم دەگرێ، لەم دووەم ڕۆژی سەرەتای ساڵی"شەست و سێ"ی تەمەنەمدا بە گوناحێكەوە لە "قەلەندەر خانە"كەم خەریكی خوێندنەوە بووم و، گوێیشم هەڵخستبوو بۆ خاتوونە هەواڵ خوێنە خنجیلە كەمێ قەشەنگەكەی كوردستان 24، باسی كادیرێكی پارتێكی سیاسی كوردستانی كرد كە فەرموویەتی: "ئێمە وەك .....هیچ پڕۆژەیەكمان نییە بۆ گەڕانەوەی كەركوك بۆ سەرهەرێمی كوردستان!". هاوارم كرد كورە خوا دەكا پڕۆژەكانتان بۆ دۆڕاندنی كەركوك بە سلێمانی و هەڵەبجە و جەلەولا و خانەقینیشەوە، واز لێ دێنن و ڕایدەگرن، كەی ئێمە چاوەڕوانی ئیشی پیاوانەی یەكگرتوویی و كۆدەنگی و یەكێتی نیشتمان پەروەرانەین لە ئێوە؟.
ئاخر قسەیەو قسە ڕادەكێشێ، كە لە ناوەندی حەفتاكانی سەدەی ڕابردوودا، لە "مەدینەی مونەوەرە" دەم خوێند، لە گەڵ حاجییەكی كوردستان قسەم كرد كە لەو عەشیرەتەبوو كە هەر لەسەر بێشكەوە ناویان بە "جاش" دەنووسرا و باسی كوردایەتیم بۆ دەكرد، ئەویش باسی خۆی كرد و گوتی: "من هێندە باوەڕم بە كوردێنی هەیە، تا نەها نەبوومە جەحشك".
گوتم: دەی سەد شوكر بۆخوا من نەمزانی ئێوە لەناو خۆتان یەكلاتان كردۆتەوە كە هەر دەبێ جاش بن و "ناجاشێتی تەنها" باشێتییە و دەیخوا لێی بەزیادبێت.
هەولێر
2 ئابی 201